កម្ពុជា-ពាណិជ្ជកម្ម

កម្ពុជារំពឹងថាខេត្តសានតុងរបស់ចិន នឹងអាចវិនិយោគផ្នែកកសិកម្ម និងឧស្សាហកម្មកែច្នៃរបស់ខ្លួន

កិច្ច​ប្រជុំ​ស្តីពី​ CONNECTING SHANDONG WITH​ FORTUNE GLOBAL 500-ASEAN ​
កិច្ច​ប្រជុំ​ស្តីពី​ CONNECTING SHANDONG WITH​ FORTUNE GLOBAL 500-ASEAN ​ © FB

ប្រទេស​កម្ពុជា​នឹង​ខិតខំ​ពង្រីក​ទំនាក់ទំនង​ពាណិជ្ជកម្ម​ជាមួយ​ខេត្ត​ចិន​បន្ថែម​ទៀត​ ខណៈ​ការ​នាំចេញ​ នាំចូល​រវាង​ប្រទេស​កម្ពុជា​និង​ខេត្ត​សានតុង​ ដែលជា​ខេត្ត​ដ៏មាន​សក្តានុពល​សេដ្ឋកិច្ច​របស់​ចិន​មួយ​ដែរ​ នៅមាន​ទំហំ​តិចតួច​នៅឡើយ​។ ​តាមរយៈ​កិច្ច​ប្រជុំ​កាលពី​ថ្ងៃ​អង្គារ​ម្សិលមិញ ​តាម​ប្រព័ន្ធ​អនឡាញ ​ស្តីពី​ CONNECTING ​SHANDONG ​WITH​ FORTUNE​ GLOBAL​ 500-​ASEAN ​រវាង​ខេត្ត​សានតុង​ប្រទេសចិន ​ជាមួយ​បណ្តា​ប្រទេស​អាស៊ាន ​តំណាង​ក្រសួង​ពាណិជ្ជកម្ម​កម្ពុជា​សង្ឃឹម​ថា​កម្ពុជា ​នឹង​អាច​ទាញ​យក​អត្ថប្រយោជន៍​ពី​ខេត្ត​សានតុង​របស់​ចិន​បាន​បន្ថែម​ទៀត​។

ផ្សាយពាណិជ្ជកម្ម

​តាមរយៈ​កិច្ច​ប្រជុំ​រវាង​ខេត្ត​សានតុង​របស់​ចិន ​ជាមួយ​បណ្តា​ប្រទេស​អាស៊ាន​នៅ​ឆ្នាំ​នេះ ​ប្រទេស​កម្ពុជា​បាន​សម្លឹង​ឃើញថា​កម្ពុជា​នឹង​អាច​ទាញយក​ប្រយោជន៍​សេដ្ឋកិច្ច​បន្ថែមទៀត​បាន​ពី​ចិន ​ដោយសារ​សក្តានុពល​នៃ​ខេត្ត​សានតុង ​បានផ្តោត​ទៅលើ​វិស័យ​គ្រឿងចក្រ ​ដែល​សម្ភារៈ​ទាំង​នេះ ​អាច​នឹង​យក​មក​ប្រើប្រាស់​នៅក្នុង​វិស័យ​កសិកម្ម​របស់​កម្ពុជា​បាន​។

លោក ​ស៊ាង ថៃ ​រដ្ឋលេខាធិការ ​និងជា​អ្នក​នាំពាក្យ​ក្រសួង​ពាណិជ្ជកម្ម ​ដែលបាន​ចូលរួម​ក្នុង​កិច្ច​ប្រជុំ​ស្តីពី​ CONNECTING SHANDONG WITH​ FORTUNE GLOBAL 500-ASEAN ​នេះ​ផ្ទាល់​បាន​ថ្លែង​ថា ​កម្ពុជា​ពិតជា​ត្រូវការ​អ្នក​វិនិយោគ​ពី​ខេត្ត​សានតុង​របស់​ចិន ​ក្នុងការ​វិនិយោគ​លើ​វិស័យ​កសិកម្ម ​ដូចជា​ការ​កែច្នៃ​ផលិតផល​កសិកម្ម​សម្រេច​ដើម្បី​នាំចេញ ​និង​ការ​វេច​ខ្ចប់​ជាដើម​។

សូម​បញ្ជាក់​ថា​ការ​វិនិយោគ​របស់​ចិន ​មកលើ​ប្រទេស​កម្ពុជា​ បាន​ឈរ​នៅ​លំដាប់​ខ្ពស់​បំផុត​លើគេ ​ដោយ​មានការ​កើនឡើង​រហូត​ដល់ ​៨,៥៦​ពាន់​លាន​ដុល្លារ ​ក្នុងនោះ​ការ​នាំចូល​ពី​ចិន​មក​កម្ពុជា​មាន ​៧,៥៦​ពាន់លាន​ដុល្លារ​ ហើយ​ការ​នាំចេញ​ពីកម្ពុជា​ទៅចិន​មាន​ចំនួន​១​ពាន់​លាន​ដុល្លារ ​គិតត្រឹម​ឆ្នាំ​២០១៩​។ ​ដោយឡែក ​ការ​នាំចេញ ​នាំចូល ​រវាង​កម្ពុជា ​និង​ខេត្ត​សានតុង​របស់​ចិន​វិញ​គឺ​មាន​តិចតួច​នៅឡើយ​ ដោយ​ពី​សានតុង​មក​កម្ពុជា​មាន ​៤១៤​លាន​ដុល្លារ ​និង​ការ​នាំចេញ​ពី​កម្ពុជា​ទៅ​សានតុង​មាន​ត្រឹម​៣៤​លាន​ដុល្លារ​ប៉ុណ្ណោះ​​។ ក្រៅពី​សានតុង ​កម្ពុជា​ក៏បាន​ពង្រីក​ទំនាក់ទំនង​ទ្វេ​ភាគី​ជាមួយ​ខេត្ត​សក្តានុពល​របស់​ចិន​មួយចំនួន​ទៀត​ផងដែរ​។

សូម​រំលឹក​ដែរ​ថា ​នៅក្នុង​កិច្ចប្រជុំ​កាលពី​ពេលថ្មី​ៗ​នេះ ​ប្រទេស​កម្ពុជា ​និង​ចិន ​បាន​ប្តេជ្ញា​ថា នឹង​ជម្រុញ​ ទំហំ​ពាណិជ្ជកម្ម​ទ្វេភាគី​នៃ​ប្រទេស​ទាំងពីរ​ឲ្យដល់ ​១០​ពាន់​លាន​ដុល្លារ ​ដែល​ការ​កំណត់​ទិសដៅ​នេះ ​នឹងត្រូវ​សម្រេច​ឲ្យបាន​នៅត្រឹម​ឆ្នាំ​២០២៣ ​ខណៈដែល​កិច្ច​ព្រមព្រៀង​ពាណិជ្ជកម្ម​សេរី​រវាង​ប្រទេស​ទាំងពីរ​ នឹងត្រូវ​រំពឹងថា ​អាច​ចុះ​ហត្ថលេខា​នៅពេល​ឆាប់​ៗ​ខាងមុខ​នេះ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI