អានតួអត្ថបទ
កម្ពុជា-រដ្ឋធម្មនុញ្ញ

ខួប២៧ឆ្នាំរដ្ឋធម្មនុញ្ញ៖រដ្ឋាភិបាលអបអរសាទរ ខណៈអតីតបក្សប្រឆាំងចង់ឱ្យពលរដ្ឋក្រោកឈរទាមទារបញ្ឈប់ការបំពាន

រដ្ឋធម្មនុញ្ញកម្ពុជា
រដ្ឋធម្មនុញ្ញកម្ពុជា © FB
ដោយ៖ វណ្ណ សុគន្ធា
១៨ នាទី

ថ្ងៃ​២៤​ កញ្ញា​ ឆ្នាំ​១៩៩៣​-ថ្ងៃ​២៤​ កញ្ញា​ ឆ្នាំ​២០២០​នេះ​ គឺ​គម្រប់​២៧​ឆ្នាំ​គត់​នៃ​ការ​ប្រកាស​ដាក់​ឱ្យ​ប្រើប្រាស់​ជា​ផ្លូវការ​នូវ​រដ្ឋធម្មនុញ្ញ​កម្ពុជា​។ នៅថ្ងៃ​ព្រហស្បតិ៍​នេះ ​អ្នកនយោបាយ ​និង​គណបក្ស​នយោបាយ​មួយ​ចំនួន​បាន​នាំគ្នា​ចេញ​សារ​អបអរសាទរ​ខួប​២៧​ឆ្នាំ​នៃ​រដ្ឋធម្មនុញ្ញ​នេះ​តាម​បណ្តាញ​សង្គម​ហ្វេសប៊ុក​។ ក្នុង​នោះ ​លោក​នាយក​រដ្ឋមន្រ្តី​ហ៊ុន សែន ​បាន​លើក​ឡើង​ពី​គុណ​តម្លៃ​នៃ​រដ្ឋធម្មនុញ្ញ​ ប៉ុន្តែ​អតីត​បក្ស​ប្រឆាំង​នៅ​ក្រៅ​ប្រទេស​វិញ​ចង់​ឱ្យ​ពលរដ្ឋ​ក្រោក​ឈរ​ដោយ​សន្តិវិធី​ទាមទារ​ឱ្យ​បញ្ឈប់​ការ​រំលោភបំពាន​ច្បាប់​កំពូល​របស់​កម្ពុជា​មួយ​នេះ​។

ផ្សាយពាណិជ្ជកម្ម

គឺនៅលើទំព័រហ្វេសប៊ុក លោកនាយករដ្ឋមន្រ្តីហ៊ុន សែន ប្រមុខរដ្ឋាភិបាល និងជាប្រធានគណបក្សប្រជាជនកម្ពុជា បានអះអាងដូច្នេះថា រដ្ឋធម្មនុញ្ញ គឺជាច្បាប់កំពូលនៃប្រទេសកម្ពុជា ហើយច្បាប់ និងសេចក្តីសម្រេចទាំងឡាយនៃស្ថាប័ននា​នារបស់រដ្ឋ ត្រូវស្របទៅនឹងរដ្ឋធម្មនុញ្ញជាដាច់ខាត។ បើតាមលោកនាយករដ្ឋមន្រ្តី គឺចំណុចសំខាន់ៗបំផុតមួយចំនួនបានចែងច្បាស់នៅក្នុងរដ្ឋធម្មនុញ្ញមានដូចជា កម្ពុជាត្រូវគោរពដាច់ខាតនូវ របបរាជានិយមអាស្រ័យរដ្ឋធម្មនុញ្ញ រប​ប​ប្រជាធិបតេយ្យសេរីពហុបក្ស ហើយរដ្ឋធម្មនុញ្ញកម្ពុជា បានចែងអំពីគោលការណ៍នៃការបែងចែកអំណាចដាច់ដោយឡែកពីគ្នា គឺអំណាចនីតិប្បញ្ញត្តិ នីតិប្រតិបត្តិ និង តុលាការ និងបានអនុម័តនូវសិទ្ធិជាមូលដ្ឋានរបស់ប្រជាពលរដ្ឋ និង គោលការណ៍នីតិរដ្ឋជាដើម ។

ផ្ទុយពីស្រឡះពីលោក​ហ៊ុន សែន ក្រុមមន្រ្តីនៃអតីតបក្សសង្រ្គោះជាតិនៅក្រៅប្រទេសឯណោះវិញបានចេញមកចោទប្រ​កាន់ចំៗតែម្តងថា រយៈពេល២៧ឆ្នាំមកនេះ គោលការណ៍គ្រឹះចម្បងៗរបស់រដ្ឋធម្មនុញ្ញកម្ពុជាដូចជា អធិបតេយ្យភាព បូរណភាពទឹកដី សិទ្ធិសេរីភាពពលរដ្ឋ សិទ្ធិមនុស្ស និងឯករាជ្យភាពរបស់តុលាការ ត្រូវបានរំលោភបំពានយ៉ាងធ្ងន់ធ្ងរពីសំណាក់រដ្ឋាភិបាល និងបក្សប្រជាជនកម្ពុជា។ មិនតែប៉ុណ្ណោះ តាមរយៈសេចក្តីថ្លែងការណ៍របស់ខ្លួន អតីតបក្សប្រឆាំងក៏បានអះអាងថា ការរំលោភបំពានយ៉ាងធ្ងន់ធ្ងរលើរដ្ឋធម្មនុញ្ញនេះ បានធ្វើឱ្យមានភាពអយុ​ត្តិធម៌សង្គមកើតមានស្ទើរគ្រប់ទីកន្លែង និងធ្វើឱ្យប្រទេសកម្ពុជាត្រូវអាប់អោនកិត្តិយស និងបាត់បង់កិត្យានុភាពលើឆាកអន្តរជាតិ។

ហេតុដូច្នេះហើយ ក្រុមមន្រ្តីនៃអតីតបក្សសង្រ្គោះជាតិនៅក្រៅប្រទេសបានអំពាវនាវដល់ប្រជាពលរដ្ឋកម្ពុជាទាំងអស់ឱ្យរួបរួមសាមគ្គីគ្នាក្រោកឈរដោយសន្តិវិធី ដើម្បីទាមទារឱ្យរដ្ឋាភិបាលកម្ពុជាបញ្ឈប់ការរំលោភបំពានរដ្ឋធម្មនុញ្ញ ហើយងាកមកគោរពឱ្យបានត្រឹមត្រូវ ដើម្បីលើកតម្កើងនីតិរដ្ឋ និងកិត្យានុភាពនៃប្រទេសកម្ពុជាលើឆាកអន្តរជាតិឡើងវិញ។

ក៏ប៉ុន្តែខុសពីការលើកឡើង និង ការចង់បានរបស់ក្រុមមន្រ្តីនៃអតីតបក្សសង្រ្គោះជាតិនៅក្រៅប្រទេសនេះ លោកកឹម សុខា​ដែលជាប្រធានអតីតបក្សប្រឆាំងនៅក្នុងប្រទេសឯណោះវិញបានលើកឡើងអ៊ីចេះវិញថា ការរំឭកខួប​នៃការប្រកាសរដ្ឋធម្មនុញ្ញ​កម្ពុជា​ គឺជាការរំឭកនូវស្មារតីនៃកិច្ចព្រមព្រៀងសន្តិភាព​ទីក្រុងប៉ារីស។ ដូចនេះហើយ សម្រាប់លោកកឹម សុខា គឺស្មារតីនៃកច្ចព្រមព្រៀងសន្តិភាពទីក្រុងប៉ារីស​ មានសារៈសំខាន់​ និងមានផលប្រយោជន៍ខ្លាំងណាស់​ សម្រាប់ធានាការពារនូវ​ ឯករាជ្យ​ បូរណភាពទឹកដី​ អធិបតេយ្យភាពកម្ពុជាផង​ និងការពារនូវសិទ្ធិសេរីភាពរបស់ប្រជាពលរដ្ឋផង។​ ជាពិសេស​ គឺការអនុវត្តន៍នូវគោលការណ៍ប្រជាធិបតេយ្យសេរីពហុបក្ស និងការធានាស្ដារ​ កសាង​ និងអភិវឌ្ឍន៍ឡើងវិញដែលកម្ពុជាបាន និងបន្តទទួលជំនួយ​ និងកិច្ចសហប្រតិបត្តិការពីសហគមន៍អន្តរជាតិ​ដល់ពេលបច្ចុប្បន្ននេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ