កម្ពុជា-កូវីដ១៩

Lancet៖ កម្ពុជាឈរនៅចំណាត់ថ្នាក់ទី៤ចំណោមបណ្តាប្រទេសក្នុងតំបន់ក្នុងការទប់ស្កាត់បាននូវការចម្លងជំងឺកូវីដ១៩

តារាងចំណាត់ថ្នាក់របស់គណៈកម្មករLancet
តារាងចំណាត់ថ្នាក់របស់គណៈកម្មករLancet © Internet

គណៈ​កម្មការ​Lancet​ កូវីដ​១៩​ដែល​ជា​ស្ថាប័ន​ចេញ​ផ្សាយ​នូវ​របាយការណ៍​វេជ្ជសាស្រ្ត​ប្រចាំ​សបា្តហ៍​  បាន​ចេញ​នូវ​របាយការណ៍​វេជ្ជសាស្រ្ត​មួយ​អំពី​ស្ថានភាព​ជំងឺ​កូវីដ​១៩​នា​លើ​សកលលោក​។ តាម​រយៈ​របាយការណ៍​វេជ្ជសាស្រ្ត​នេះ​ កម្ពុជា​ឈរ​ជា​ប្រទេស​លំដាប់​ទី​៤​ក្នុង​តំបន់​អាស៊ី​ប៉ាស៊ីហ្វិក​ ដែល​ទទួល​បាន​លទ្ធផល​វិជ្ជមាន​ក្នុង​ការ​ទប់ស្កាត់​ករណី​ចម្លង​ជំងឺ​កូវីដ​១៩​។

ផ្សាយពាណិជ្ជកម្ម

របាយការណ៍វេជ្ជសាស្រ្តកម្រាស់២៣ទំព័រដែលរៀបរាប់អំពីស្ថានភាពចម្លងជំងឺកូវីដ១៩ជាសកល បានបង្ហាញថាកម្ពុជាឈរលំដាប់ទី៣បន្ទាប់ពីថៃ និងឡាវក្នុងតំបន់អាស៊ីអាគ្នេយ៍ និងលំដាប់ទី៤ក្នុងចំណោមប្រទេសចំនួន១៩ក្នុងតំបន់អាស៊ីប៉ាស៊ីហ្វិករួមមាន ថៃ ឡាវ វៀតណាម ចិន តៃវ៉ាន់ ភូមា ម៉ាឡេស៊ី ជាដើមនោះ ជាប្រទេសដែលមានអត្រាចម្លងជំងឺកូវីដ១៩ ទាបបំផុតនៅក្នុងខែសីហា ដោយតាមរបាយការណ៍ អត្រាចម្លងនិងស្លាប់គឺមានទាបជាង១០នាក់ក្នុងចំណោម១លាននាក់ជាប្រចាំថ្ងៃ។

សម្រាប់កម្ពុជា មកទល់ថ្ងៃទី២៤កញ្ញានេះ ករណីអ្នកមានផ្ទុកជំងឺកូវីដ១៩មានចំនួន២៧៥នាក់និងមានអ្នកជាស្បះស្បើយចំនួន២៧៤នាក់ស្មើនឹង៩៩,៦៤%។ ជាមួយនឹងការអនុវត្តនូវវិធានការសុវត្ថិភាពដែលណែនាំដោយអង្គការសុខភាពពិភពលោក និងចំណាត់ការមួយចំនួនក្នុងស្រុកមួយរយៈមកនេះ កម្ពុជាមានអត្រាចម្លងជំងឺកូវីដ១៩មានលក្ខណៈទាបបើប្រៀបទៅនឹងប៉ុន្មានខែដំបូងនៃឆ្នាំ២០២០។ តួយ៉ាងក្នុងខែសីហា កម្ពុជារកឃើញអ្នកផ្ទុកជំងឺកូវីដ១៩តែម្នាក់ប៉ុណ្ណោះ។ នេះបើតាមរបាយការណ៍វេជ្ជសាស្រ្តរបស់Lancet។

ទោះយ៉ាងណា របាយការណ៍វាយតម្លៃពីចំណាត់ថ្នាក់់នៃការទប់ស្កាត់ការចម្លងជំងឺកូវីដ១៩នេះ នៅមិនទាន់មានប្រតិកម្មយ៉ាងណាពីក្រសួងសុខាភិបាលកម្ពុជា ក៏ដូចជាអង្គការសុខភាពពិភពលោកប្រចាំកម្ពុជានៅឡើយ។

ជាមួយគ្នានេះរបាយការណ៍វេជ្ជសាស្រ្តនេះក៏បានបង្ហាញថា ប្រទេសនៅតំបន់អឺរ៉ុបខាងលិចនិងអាមេរិក ជាប្រទេសមានអត្រាឆ្លងនិងស្លាប់រហូតដល់៧០០នាក់ក្នុងចំណោម១លាននាក់ក្នុងមួយថ្ងៃ ហើយប្រទេសដែលមានអត្រាចម្លងនិងស្លាប់ខ្ពស់មានដូចជា សហរដ្ឋអាមេរិក អាហ្សង់ទីន និងប្រេស៊ីល។

លោក Gideon Lasco វេជ្ជបណ្ឌិតផ្នែកវេជ្ជសាស្ត្រនិងជាអ្នកស្រាវជ្រាវនៅឯសាកលវិទ្យាល័យ Ateneo de Manilaនៃប្រទេសហ្វីលីពីន បានលើកឡើងថា ហេតុផលមួយសម្រាប់ការបរាជ័យ ក្នុងការទប់ស្កាត់ការរាតត្បាតនៃជំងឺកូវីដ១៩នេះ គឺដោយសារបែបផែននៃភាពជាអ្នកដឹកនាំនយោបាយឬគេហៅថា ប្រជាជននិយមវេជ្ជសាស្រ្ត។ ហើយយ៉ាងណាក្តីលោក Lasco ថាការអះអាងនេះគឺយោងលើស្ថានភាពវិវត្តន៍ជាក់ស្តែងនៃជំងឺកូវីដ១៩ដែលកំពុងកើតកើតមានក្នុងប្រទេសហ្វីលីពីន ប្រេស៊ីល និងសហរដ្ឋអាមេរិក។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI