កម្ពុជា-ទេសចរណ៍

វិស័យឯកជនសោកស្ដាយដែលកម្ពុជាបាត់បង់ឱកាសទទួលបានទេសចរចិន ក្នុងទិវាបុណ្យជាតិចិន

ភ្ញៀវទេសចរកម្សាន្តនៅប្រាសាទអង្គរវត្តនាពេលកន្លងមក
ភ្ញៀវទេសចរកម្សាន្តនៅប្រាសាទអង្គរវត្តនាពេលកន្លងមក ASSOCIATED PRESS - Heng Sinith

នៅ​រៀងរាល់​ឆ្នាំ​នៃ​ទិវា​បុណ្យជាតិ​ចិន​នៅ​ថ្ងៃ​ទី​១​តុលា​ ​ប្រទេស​កម្ពុជា​បាន​ក្លាយ​ជាគោល​ដៅ​ទេសចរ​ដ៏​ពេញ​និយម​សម្រាប់​ដំណើរ​កំសាន្ត​ប្រចាំ​ឆ្នាំ​របស់​ជនជាតិ​ចិន​។​ ​ដោយសារតែ​បញ្ហា​សកល​កូ​វី​ដ​១​៩​ ​រួម​នឹង​បម្រាម​មួយ​ចំនួន​របស់​រដ្ឋាភិបាល​កម្ពុជា​ ​ជនជាតិ​ចិន​មិនបាន​ធ្វើដំណើរ​មក​កម្ពុជា​ដូច​រាល់​ឆ្នាំ​ឡើយ​។​ ​នេះ​បើ​តាម​ការ​ឲ្យដឹង​ពី​អ្នកធ្វើការ​លើ​វិ​ស័​យ​ទេសចរ​។​ ​នៅចំពោះមុខ​ការ​អាក់ខាន​នេះ​ វិ​ស័យ​ឯកជន​បង្ហាញ​ការ​សោកស្ដាយ​ដែល​កម្ពុជា​បាត់បង់​ឱកាស​ទទួល​បាន​ភ្ញៀវ​ទេសចរ​ទូទៅ​ ​និង​និយាយដោយឡែក​ចំពោះ​ទេសចរ​ចិន​។

ផ្សាយពាណិជ្ជកម្ម

លទ្ធភាពដែលកម្ពុជាអាចធ្វើទៅបានសម្រាប់ទទួលភ្ញៀវទេសចរទូទៅ និងនិយាយដោយឡែកសម្រាប់ជនជាតិចិននៅក្នុងពេលកូវីដ១៩នេះ គឺរដ្ឋាភិបាលគួរបើកទិដ្ឋាការទេសចរឡើងវិញជាមួយនឹងវិធានការតែរឹតបន្តឹងលើបែបបទមួយចំនួនឲ្យបានតឹងរឹងដើម្បីបញ្ជាក់ថា ទេសចរចូលមកកម្ពុជា គ្មានវីរុសកូវីដ១៩។ ហើយការធ្វើដំណើររបស់ទេសចរទាំងនោះ ផ្ដោតតែទៅលើដំណើរកំសាន្តតាមតំបន់ដោយមានការគ្រប់គ្រង់កូវីដ១៩បានល្អឬតំបន់ដែលគ្មានកូវីដ១៩។ នេះជាយោបល់លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា។ អ្នកជំនាញរូបនេះបានត្អូញត្អែរទៀតថា បើពុំមានការបន្ធូរបន្ថយខ្លះទេ ផ្នែកឯកជនក្នុងវិស័យទេសចរណ៍កម្ពុជា នឹងរងផលប៉ះពាល់កាន់តែខ្លាំង។

បើតាមលោកស្រី ឆាយ ស៊ីវលីន នៅរៀងរាល់ឆ្នាំនៃទិវាជាតិចិនដែលជាឱកាសឈប់សម្រាក់របស់ជនជាតិចិននោះ ទេសចរចិនបានសម្រុកមកកម្ពុជាយ៉ាងគំហុករហូតខ្វះជើងហោះហើរ និងបន្ទប់ស្នាក់នៅទៀតផង។ ជាក់ស្ដែងកាលពីឆ្នាំ២០១៩ កម្ពុជាទទួបានទេសចរចិនជាង២លានកន្លះ។ នេះបើតាមរបាយការណ៍មួយផ្នែករបស់សមាគមទីភ្នាក់ងារទេសចរណ៍កម្ពុជា។

ជាមួយគ្នានេះលោកលោក​ស៊ិន ចាន់​សិរី​វុត្ថា អគ្គនាយករង​បច្ចេកទេស និង​ជា​អ្នកនាំពាក្យ​អាកាសចរ​ស៊ីវិលកម្ពុជាបានឲ្យដឹងថា នៅមុនពីរថ្ងៃនៃទិវាបុណ្យជាតិចិននៅថ្ងៃទី១តុលា ផ្នែកអាកាសចរណ៍ស៊ីវិលមិនទទួលបានជើងហោះហើរពីខាងចិនឡើយ ក្រៅតែពីប្រភេទទេសចរណ៍ធុរកិច្ចនោះ។ ចំពោះការធ្វើដំណើរជាទូទៅវិញ កម្ពុជាទទួលបានជើងហោះហើរ១០ជើងក្នុងមួយថ្ងៃ ហើយរាប់ចាប់តាំងពីការផ្ទុះឡើងជំងឺកូវីដក្នុងរយៈពេល៨ខែកន្លងទៅនេះ កម្ពុជាទទួលបានអ្នកដំណើរជាង២លាននាក់ដែលភាគច្រើនជាធុរកិច្ចចិន។

សូមជម្រាបជូនថា ជំនួសឲ្យទេសចរពីខាងក្រៅ រដ្ឋាភិបាលកំពុងជំរុញទេសចរក្នុងស្រុក តាមរយៈឱកាសឈប់សម្រាកក្នុងពេលកន្លងមករួមមាន៖ សម្រាកសង់ចូលឆ្នាំខ្មែរកាលពីខែកញ្ញា ពលរដ្ឋជាង២៣ម៉ឺន៣ពាន់នាក់(២៣៣,៣២៩នាក់) ខណៈរយពេល៣ថ្ងៃនៃបុណ្យភ្ជុំបិណ្ឌមានចំនួនជាង១លាននាក់បានធ្វើដំណើរកំសាន្តនៅទូទាំងប្រទេស៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI