កម្ពុជា

ក្រសួង​សុខាភិបាល​រំឭក​ឲ្យ​ពលរដ្ឋ​ការពារ​ខ្លួន​ពី​ជំងឺ​គ្រុន​ឈីក បន្ទាប់​ពី​ជំងឺនេះ​កើន​ឡើង​ដល់​ជិត៦​ពាន់​ករណី

រោគសញ្ញានៃអ្នកកើតជំងឺគ្រុនឈីក
រោគសញ្ញានៃអ្នកកើតជំងឺគ្រុនឈីក © @Internet

ក្រសួងសុខាភិបាល​បានចេញ​សេចក្តី​ក្រើន​រំឭក​មួយ​កាល​ពី​ប៉ុន្មាន​ថ្ងៃ​មុន​នេះ ឲ្យ​ពលរដ្ឋ​បង្កើន​ការការពារ​ជំងឺគ្រុន​ឈីក បន្ទាប់​ពី​ជំងឺ​នេះ​បាន​តែ​ឆ្លង​រាល​ដាល​ដល់​មនុស្ស​ប្រមាណ​ជិត​៦​ពាន់​នាក់​នៅ​ទូទាំង​ប្រទេស​កម្ពុជា​។ ជំងឺ​គ្រុន​ឈីកនេះ​គឺ​ជា​ក្តី​បារម្ភមួយ​បន្ទាប់​ពី​ជំងឺ​កូវីដ១៩ បើ​ទោះ​បី​ជា​ជំងឺដែល​ចម្លងដោយ​មូសខ្លាញីនេះ​មិន​ទាន់​បាន​សម្លាប់​មនុស្ស​ណា​ម្នាក់​នៅឡើយក៏​ដោយ​។ 

ផ្សាយពាណិជ្ជកម្ម

លោកស្រី ឱ វណ្ណឌីន អ្នកនាំពាក្យ​ក្រសួង​សុខាភិបាល បានកត់​សំគាល់ថា ជំងឺគ្រុន​ឈីក​នេះ​មាន​ការ​កើន​ឡើង​គួរ​ឲ្យ​ព្រួយបារម្ភ​ បន្ទាប់​ពី​បាន​ផ្ទុះ​ឡើង​ដំបូង​គេ​នៅ​បន្ទាយមានជ័យ​ដែល​មាន​តែ​ជិត​១០០០​ករណី ហើយ​បាន​រីករាល​ដាល​ទៅ​ដល់ខេត្ត​ចំនួន​២១​នៅ​ទូទាំង​ប្រទេស​។ នៅ​ទូទាំង​ប្រទេស​ករណី​ដែល​សង្ស័យ​ជំងឺ​គ្រុន​ឈីក​បាន​កើន​ឡើង​ដល់​៥៩៩៨​ករណីគិត​ត្រឹម​ថ្ងៃ​ទី​២៧​កញ្ញា ខណៈ​មន្ទីរ​ពេទ្យ​ខេត្ត​សៀមរាប ខេត្តតាកែវ និង​ខេត្ត​ព្រះ​វិហារ ​ទទួលអ្នក​ជំងឺ​នេះច្រើនជាងគេ។

បើ​តាម​ក្រសួង​សុខាភិបាល ករណី​ជំងឺ​គ្រុន​ឈីក​នេះ ​ត្រូវបាន​ព្យាបាល​ជា​សះ​ស្បើយ​រហូតដល់៩៦%​ ពោល​នៅ​សល់​អ្នកជំងឺ​តែ​៤%​ប៉ុណ្ណោះ​ដែល​កំពុង​នៅ​សម្រាក​ព្យាបាល​នៅ​មន្ទីរពេទ្យ​នៅ​ឡើយ។

ការ​ចម្លង​ជំងឺគ្រុន​ឈីក​មានសមាត្រខុសគ្នា​ទៅតាម​ក្រុម​អាយុ។ អ្នក​ដែល​កើត​ជំងឺ​គ្រុន​ឈីក​ចំនួន៥៤%​គឺ​ជា​មនុស្ស​ពេញវ័យ ប៉ុន្តែ ៣១% ឆ្លងទៅ​លើ​កុមារ​ដែល​អាយុ​៥​ឆ្នាំ​ឡើង​ទៅ ខណៈ​កុមារ​អាយុ​ក្រោម​៥ឆ្នាំ​មាន​ឆ្លង​ជំងឺ​នេះ​ត្រឹម​១៥%ប៉ុណ្ណោះ។ នេះ​ដោយ​យោង​តាម​របាយ​ការណ៍​អង្កេត​ប្រព័ន្ធតាមដាន​ជំងឺ​គ្រុន​ឈាម​ថ្នាក់​ជាតិ​របស់​ក្រសួង​សុខា​ភិបាល។

ចំពោះ​រោគ​សញ្ញា​វិញ គឺ​ក្រោយ​ពី​មូស​ខ្លាញី​ខាំ ២​ទៅ​៣​ថ្ងៃ អ្នក​ជំងឺ​មាន​អាការៈ​ក្តៅ​ខ្លួន​លើស​ពី​៣៨​អង្សា ឈឺក្បាល ឈឺ​ខ្លួន​ប្រាណ និង​សន្លាក់​ដៃជើង ហើយ​មាន​ចេញ​កន្ទួល​ក្រហម​នៅ​ចំហៀង​ខ្លួន។ អាការៈ​នៃជំងឺគ្រុន​ឈីក​នេះគឺស្រដៀង​គ្នា​នឹង​ជំងឺគ្រុន​ឈាមដែរ ពោលអ្នក​សង្ស័យ​កើត​ជំងឺនេះ​ត្រូវ​ប្រញាប់​ទៅ​រក​ការ​ពិនិត្យ​នៅតាម​មន្ទីរ​ពេទ្យ ដោយជៀសវាង​ការ​ប្រើ​ថ្នាំដោយ​ខ្លួន​ឯង​នាំឲ្យ​ស្ថានភាពជំងឺ​កាន់តែ​ធ្ងន់​ធ្ងរ ពិបាក​ព្យាបាល និង​ឈានទៅការស្លាប់​បាត់​បង់​ជីវិត។

ដើម្បី​ការពារ​ជំងឺ​គ្រុន​ឈីក ក៏​ដូច​ជា​ជំងឺ​គ្រុន​ឈាម ក្រសួង​សុខាភិបាល​បានអំពាវនាវ​ឲ្យ​ប្រជាពលរដ្ឋ​នាំគ្នា​កម្ចាត់​ចោល​ជម្រក​មូសខ្លា​នៅ​ជុំ​វិញផ្ទះ និង​ដង្កូវទឹក ព្រម​ទាំង​ធ្វើ​អនាម័យ​នៅក្នុង​ផ្ទះ ​ដោយ​បន្ទប់​គេង​ត្រូវ​មាន​ពន្លឺ​ចេញ​ចូ​​ល​ជា​ដើម៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI