ជំនួយ

ជំនន់​ទឹក​ភ្លៀង៖ប៉ះពាល់​ពលរដ្ឋ​ជាង​១ម៉ឺន​១ពាន់​អ្នក​នៅ​ក្នុង​ខេត្ត​ចំនួន​១០

មួយផ្នែកនៃស្ថានភាពទឹកជំនន់ក្នុងខេត្តបាត់ដំបងនៅថ្ងៃទី១០តុលាឆ្នាំ២០២០
មួយផ្នែកនៃស្ថានភាពទឹកជំនន់ក្នុងខេត្តបាត់ដំបងនៅថ្ងៃទី១០តុលាឆ្នាំ២០២០ © ហ្វេសបុកក្រសួងធនធានទឹកនិងឧតុនិយម

យ៉ាងហោច​ណាស់​ពលរដ្ឋ​ជាង​១ម៉ឺន​១​ពាន់​នាក់ បាន​រង​ផល​ប៉ះពាល់​ដោយ​សារ​ជំនន់​ទឹក​ភ្លៀង ចាប់​តាំងពី​ថ្ងៃ​ទី​១​ដល់​៩​តុលា ស្ថិត​នៅ​ក្នុង​ខេត្ត​ចំនួន​១០​ក្នុង​ប្រទេស​កម្ពុជា។ ស្ថាន​ភាពនេះ បាន​បង្ខំ​ឲ្យ​អាជ្ញាធរខេត្ត​នីមួយៗ​ជម្លៀស​ពលរដ្ឋ​ខ្លួន​ទៅ​កាន់​ទីទួល​មាន​សុវត្ថិ​ភាព​បាន​ចំនួន​សរុប​ជិត​៨០០​គ្រួសារ។ ដោយ​សារ​ជំនន់​ទឹក​ភ្លៀង​នេះ​ដែរ មនុស្ស​ម្នាក់​បាន​ស្លាប់។ នេះ​បើ​តាម​ការ​បញ្ជាក់​ប្រាប់​ពី​អ្នក​នាំ​ពាក្យ​គណៈកម្មាធិការជាតិ​គ្រប់គ្រង​គ្រោះមហន្តរាយ ដែល​បាន​ថ្លែង​ប្រាប់​វិទ្យុ​បារាំង​អន្ដរជាតិ​នៅ​ថ្ងៃ​សៅរ៍នេះ ប៉ុន្តែ​គេ​នៅមិន​ទាន់​កំណត់​អត្តសញ្ញាណ​អ្នក​ស្លាប់​នេះ​បាន​នៅ​ឡើយ​ទេ។

ផ្សាយពាណិជ្ជកម្ម

គិត​ត្រឹម​ថ្ងៃ​ទី​៩​តុលា​ មាន​ស្រុក​ចំនួន១៩​និង​ឃុំ​ចំនួន​៦៣​ស្ថិត​នៅ​ក្នុង​ខេត្ត​ជាង​១០ កំពុង​រង​ផល​ប៉ះពាល់ដោយ​សារ​ជំនន់​ទឹក​ភ្លៀង។ ខេត្ត​ទាំង​នោះ​រួមមានៈ ប៉ៃលិន បន្ទាយមានជ័យ កំពង់ឆ្នាំង កំពង់ស្ពឺ កណ្ដាល ភ្នំពេញ តាកែវ ស្វាយរៀង ព្រះវិហារ ពោធិ៍សាត់ និងបាត់ដំបង ជាដើម។ ក្នុង​ចំណោម​ខេត្តទាំង​១០​នេះ ពោធិ៍សាត់ និងបាត់ដំបង បាន​រង​ផល​ប៉ះ​ពាល់​យ៉ាង​ដំណំ ដោយសារ​ជំនន់​ទឹក​ភ្លៀង​គិតមក​ដល់​ថ្ងៃ​ទី​១០​តុលា​នេះ​នៅ​តែ​បន្ត​ធ្លាក់​យ៉ាង​គំហុគ។ ចំពោះ​ទឹក​ស្ទឹងពោធិ៍សាត់ មន្ត្រី​ជំនាញ​បានព្រមាន​ពី​កម្រិត​កម្ពស់​ទឹក​អាច​ឈាន​ការ​ប្រកាស​ឲ្យ​ប្រុង​ប្រយ័ត្ន។

នេះទិដ្ឋភាពមួយផ្នែកដើម្បីទប់ទល់នឹងការជន់លិចនៃស្ទឹងពោធិ៍សាត់ស្ថិតនៅក្នុងខេត្តពោធិ៍សាត់នៅយប់ថ្ងៃទី៩តុលាឆ្នាំ២០២០
នេះទិដ្ឋភាពមួយផ្នែកដើម្បីទប់ទល់នឹងការជន់លិចនៃស្ទឹងពោធិ៍សាត់ស្ថិតនៅក្នុងខេត្តពោធិ៍សាត់នៅយប់ថ្ងៃទី៩តុលាឆ្នាំ២០២០ © ទូរទស្សន៍ជាតិពោធិ៍សាត់

ដោយឡែក​ពី​ខេត្ត​បាត់​ដំបង​ឈរ​ជើង​នៅ​អាង​ស្តុក​ទឹក​បាសាក់​ទី​ដែល​អាជ្ញាធរ​កំពុង​ជួស​ជុល​អាង​នេះដែល​បាក់​ដោយ​សា​រ​កម្លាំង​ទឹក លោក ចាន់ យុត្ថា អ្នក​នាំ​ពាក្យ​ក្រសួង​ធនធានទឹក និង​ឧតុនិយម​បាន​ឲ្យដឹង​ថា​ ជំនន់​ទឹក​ភ្លៀង​អាច​នឹង​មាន​ការ​កើន​ឡើង​បន្ថែម​ទៀត​នៅ​ក្នុង​ខេត្តបាត់​ដំបង ជា​ពិសេស​ស្រុកមួយ​ចំនួន​នៅ​តាម​បណ្ដោយ​ព្រំដែន​កម្ពុជា​ថៃ ដោយ​សារ​នៅ​យប់​ថ្ងៃ​ទី​៩​តុលា​ភ្លៀង​បាន​ធ្លាក់​មក​យ៉ាងកំហុគ​ដែល​ធ្វើ​ឲ្យ​ស្ទឹងមួយ​ចំនួន​ជន់​លិច​ដូច​ជាៈ ស្ទឹង​បវិល និង​ស្ទឹង​មង្គលបុរី ស្ទឹង​សង្កែ​ជាដើម។ ចំពោះ​ស្ទឹង​សង្កែ​កម្ពស់​ទឹក​នៅ​សល់​តែ​មួយម៉ែត្រ​បី​តឹក​ទៀត នឹង​ឈាន​ដល់​កម្រិត​ប្រកាស​ឲ្យ​ប្រុងប្រយ័ត្ន។

ស្ថានភាពទឹកជំនន់ក្នុងខេត្តបាត់ដំបងនៅថ្ងៃទី១០តុលាឆ្នាំ២០២០
ស្ថានភាពទឹកជំនន់ក្នុងខេត្តបាត់ដំបងនៅថ្ងៃទី១០តុលាឆ្នាំ២០២០ © ហ្វេសបុកក្រសួងធនធានទឹក

ពី​ភ្នំពេញ​ឯណេះ​វិញ​លោក ស ខេង រដ្ឋមន្ត្រី​ក្រសួង​មហាផ្ទៃ ក្នុង​ឋានៈ​ជា​ប្រធាន​ក្រុម​ការងារ​ថ្នាក់​ជាតិ និង​ក្រុម​ការងារ​គណបក្ស ចុះ​ជួយ​ខេត្ត​បាត់​ដំបង នៅ​ថ្ងៃ​ទី​១០​តុលា​នេះ បាន​បញ្ជា​មន្ត្រី​ដឹក​ស្បៀង​ទៅចែក​ជូន​ពលរដ្ឋ ក្នុង​ខេត្ត​បាត់​ដំបង​រួមមានៈ អង្ករ​២០តោន មី​២០០កេស ត្រី​ខ​២០០​យួរ។

ចំណែក​ខេត្ត​៩​ផ្សេង​ទៀត​អាជ្ញាធរ​ខេត្ត​នីមួយៗ​បាន​ផ្ដល់​ស្បៀង​ដល់​ពលរដ្ឋ​រង​គ្រោះ​ដែ​រ អំឡុង​ពេលជម្លៀស​មក​រក​ន្លែង​ទីទួល​មាន​សុវត្ថិភាព។ លោក ឃុន សុខា អ្នកនាំ​ពាក្យ​គណៈកម្មាធិការ​ជាតិ​គ្រប់​គ្រងគ្រោះ​មហន្តរាយ​បាន​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​សៅរ៍​នេះ​ថា ក្រៅ​តែ​ពី​ប៉ះពាល់​មនុស្ស​ជាង​១ម៉ឺន​១ពាន់​នាក់ ស្ថានភាព​ជំនន់​ទឹក​ភ្លៀង​ជិត​១០​ថ្ងៃ​នេះ ធ្វើ​ឲ្យ​ប៉ះ​ពាល់​ដល់​ស្រូវ​ជិត​២​ម៉ឺន​ហិកតា​និង​ដំណាំ​រួមផ្សំ​ជិត​៤​ម៉ឺន​ហិកតា។

កម្លាំងទ័ពចេញប្រតិបត្តិជួយសង្គ្រោះពលរដ្ឋនៅថ្ងៃទី២០តុលាឆ្នាំ២០២០
កម្លាំងទ័ពចេញប្រតិបត្តិជួយសង្គ្រោះពលរដ្ឋនៅថ្ងៃទី២០តុលាឆ្នាំ២០២០ © ហ្វេសបុក លោក ហ៊ុន ម៉ាណែត

ប៉ុន្តែយ៉ាងណាក៏​ដោយ​មន្ត្រី​ជំនាញ បាន​មូល​មាត់​គ្នា​ថា ពួក​គេ​អាច​គ្រប់គ្រង​ស្ថានភាព​ជំនន់​ទឹក​ភ្លៀង​នេះបាន​ពោល​គឺ​មិន​ទាន់​ឈាន​ដល់​ការ​ប្រកាស​អាសន្ន​ឡើយ​ទេ​គិត​មក​ថ្ងៃ​ទី​១០​តុលា ដោយ​សារ​បាន​សង្គ្រោះ​ពលដ្ឋ​ទាន់​ពេល​វេលា។ គួរកត់សម្គាល់ដែរ នៅ​ក្នុង​ប្រតិបត្តិ​នោះ អាជ្ញាធរ​បាន​មូល​ដៃ​អាវ លាត់ជើង​ខោ លុយ​ទឹក​ចុះ​សង្គ្រោះ​ពល​រដ្ឋ​ចេញ​ពី​ទឹក​ជំនន់។ ពីភ្នំ​ពេញ​ឯណេះ​ដែរ គេ​ឃើញ​រដ្ឋមន្ត្រី​ក្រសួងធនធាន​ទឹកលោក លឹម គានហោ លោក ស៊ុយ ស៊ែម រដ្ឋមន្ត្រី​ក្រសួងរ៉ែ និង​ថាមពល រួមនឹងលោក គន់ គីម ប្រធាន​គណៈកម្មាធិការ​គ្រប់គ្រង​គ្រោះមហន្តរាយ​ជាដើម ចុះ​ទៅ​កាន់​ខេត្តពោធិ៍សាត់ ទី​ដែល​រងគ្រោះ​យ៉ាង​ដំណំពី​ជំនន់​ទឹក​ភ្លៀង៕

បង់កក្រម៉ាជាអភិបាលខេត្តពោធិ៍សាត់ លោក លឹម  គានហោ នៅកណ្ដាល ហើយជាប់គាត់គឺលោក ស៊ុយ ស៊ែម កាលពីយប់ថ្ងៃទី៩តុលាឆ្នាំ២០២០
បង់កក្រម៉ាជាអភិបាលខេត្តពោធិ៍សាត់ លោក លឹម គានហោ នៅកណ្ដាល ហើយជាប់គាត់គឺលោក ស៊ុយ ស៊ែម កាលពីយប់ថ្ងៃទី៩តុលាឆ្នាំ២០២០ © ទូរទស្សន៍ជាតិពោធិ៍សាត់

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI