កម្ពុជា ពាណិជ្ជកម្ម

កម្ពុជា-ចិន ចុះកិច្ចព្រមព្រៀងពាណិជ្ជកម្មសេរីក្នុងដំណើរទស្សនៈកិច្ច​រដ្ឋមន្ត្រីការបរទេសចិន

រូប​ទង់ជាតិ​កម្ពុជា ចិន
រូប​ទង់ជាតិ​កម្ពុជា ចិន រូបភាព​ឯកសារ

កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន​នឹង​ត្រូវ​ចុះហត្ថលេខា​ជាផ្លូវការ​នៅ​ក្នុង​ដំណើរ​ទស្សនកិច្ច​របស់ប្រមុខ​ការបរទេស​ចិន លោក វ៉ាង យី មក​កាន់​កម្ពុជា​នៅ​ថ្ងៃទី​១១ ទី១២ ខែ​តុលា​នេះ​។ នេះ​បើ​តាម​សេចក្តីប្រកាស​របស់​ក្រសួង​ការ​បរទេស​កម្ពុជា​។ តើ​កិច្ច​ព្រមព្រៀង​ពាណិជ្ជកម្ម​សេរី​កម្ពុជា-ចិន ផ្ដល់​ប្រយោជន៍​អ្វីដល់​កម្ពុជា​? ឆ្លៀត​ឱកាស​នេះវិទ្យុបារាំង​សូម​រំលឹកឡើងវិញពីកិច្ចព្រមព្រៀងសេរីកម្ពុជា-ចិន៖

ផ្សាយពាណិជ្ជកម្ម

តាមរយៈ​កិច្ចព្រមព្រៀង​ពាណិជ្ជកម្ម​ខាង​លើ​នេះ រដ្ឋាភិបាល​កម្ពុជា​រំពឹង​ថា ការ​នាំចេញ​ពី​កម្ពុជា​ទៅ​ចិន នឹង​មាន​ការ​កើន​ឡើង​ប្រមាណ ២៥%បន្ទាប់​ពី​កិច្ច​ព្រម​ព្រៀង​នេះ​ចុះហត្ថ​លេខា​រួចរាល់។ ក្រសួង​ពាណិជ្ជកម្ម​កម្ពុជា​ធ្លាប់​បាន​អះអាង​ថា ទំនិញ​កម្ពុជា​ជាង​៣០០​មុខ​អាច​នាំ​ទៅ​ចិន ​ដោយ​មិន​គិត​ពន្ធ​នៅ​ពេល​កិច្ច​ព្រមព្រៀង​ពាណិជ្ជកម្ម​សេរី​ទ្វេ ភាគី​កម្ពុជា​ចិន​(FTA)​ចូល​ជា​ធរមាន នៅ​ដើម​ឆ្នាំ​២០២១។ នៅក្នុង​ចំ​ណោម​មុខ​ទំនិញ​ជាង​៣០០​មុខ​នេះ គឺ​ផលិតផល​កសិកម្ម​៩៥​ភាគ​រយ​ត្រូវ​រួច​ពន្ធ​សម្រាប់​ការ​នាំ​ចេញ​ទៅ​ចិន​។ ប៉ុន្តែផលិតផលគ្រឿងចក្រ និង​យានយន្ត​ផ្សេងៗវិញ ចិននៅតែបន្តយកពន្ធនាំចូលដដែល។

លោកបណ្ឌិត គី សេរីវឌ្ឍន៍ ប្រធាន​មជ្ឈមណ្ឌល​សិក្សាចិន​នៃ​រាជបណ្ឌិត្យ​សភា​កម្ពុជា បាន​អះអាង​ប្រាប់​វិទ្យុបារាំង​អន្តរជាតិ​នៅ​ថ្ងៃទី១១ ខែ​តុលា​នេះ​ថា កិច្ច​ព្រមព្រៀង​ពាណិជ្ជកម្ម​សេរី​កម្ពុជា-ចិន នឹង​ធ្វើ​ឱ្យ​ភាគី​ចិន​ចំណេញ​ច្រើន​ជាង​កម្ពុជា​។ លោក​បន្ដ​ថា​ចិន​ចំណេញ​ច្រើន​ជាង​កម្ពុជា ព្រោះ​ថា ទោះបី​កម្ពុជា​បើក​ឲ្យ​មាន​ការ​នាំចេញ​ខាង​វិស័យ​ចិញ្ចឹម​សត្វ​ច្រើន​មែន តែ​បច្ចុប្បន្ន​នេះ កម្ពុជា​មិន​ទាន់​រៀប​​ចំ​ខ្លួន​រួច​រាល់​នៅ​ឡើយ​ទេ ដូច្នេះ​កម្ពុជា​ត្រូវ​ការ​ពេល​វេលា​បន្ថែម ខណៈ​ប្រទេស​ចិន​បាន​ត្រៀម​រួចរាល់​សម្រាប់​ធ្វើ​ការ​នាំ​ចេញ​មក​កម្ពុជា​។

អ្នកនាំពាក្យក្រសួង​ពាណិជ្ជកម្ម លោក ស៊ាង ថៃ បាន​បញ្ជាក់​ថា តាម​ការ​គណនា ពេល​អនុវត្ត​កិច្ច​ព្រមព្រៀងនេះ ការ​នាំចេញ​របស់​កម្ពុជា​នឹង​កើន​ឡើង​ប្រមាណ ២៥%រៀងរាល់​ឆ្នាំ ឬ​អាច​លើស​ពី​នេះ​ទៀត​។ លោក​បន្តថា គឺ​កិច្ច​ព្រមព្រៀង​ពាណិជ្ជកម្ម​សេរី​កម្ពុជា-ចិន បាន​បើក​ច្រក​ទីផ្សារ​ទូលំទូលាយ​សម្រាប់​កម្ពុជា​រួច​ទៅ​ហើយ ប៉ុន្តែ​អ្វី​ដែល​សំខាន់​នោះ គឺ​កម្ពុជា​ត្រូវ​រៀប​ចំគោល​នយោបាយ​ផលិតកម្ម វិនិយោគ ដឹកជញ្ជូន កិច្ច​សម្រួលពាណិជ្ជកម្ម និង​បញ្ហា​ផ្សេងៗ​ទៀត ឲ្យ​បាន​ល្អ​ប្រសើរ នោះ​ទើប​កម្ពុជា​អាច​ផលិត និង​នាំ​ទំនិញ​ទៅ​កាន់ប្រទេស​ចិន បាន​ច្រើន​តាម​ការ​រំពឹង​ទុក​។

សូមជម្រាប​ជូន​ថា ចិន និង​កម្ពុជា គ្រោង​ជំរុញ​ទំហំ​ពាណិជ្ជ​កម្ម​ទ្វេភាគី​ឱ្យ​បាន​ដល់ ១០​ពាន់​លាន​ដុល្លារ​អាមេរិក នៅ​ឆ្នាំ​២០២៣​ខាង​មុខ​នេះ​។ កាល​ពី​ឆ្នាំ​២០១៩​ ទំហំ​ពាណិជ្ជ​កម្ម​រវាង​កម្ពុជា-ចិន សម្រេច​បាន​ដល់ប្រមាណ​ជាង ៨ពាន់​លាន​ដុល្លារ កើន​ឡើង​២៧% ធៀបនឹងឆ្នាំ២០១៨។ កម្ពុជា​នាំ​ចេញ​ទំនិញ​ទៅប្រទេស​ចិន​គិត​ជា​ទឹក​ប្រាក់​កើន​ឡើង​ដល់​១ពាន់លាន​ដុល្លារ ខណៈ​​នាំ​ចូល​ពីចិនវិញក្នុង​​ទឹក​ប្រាក់​ជិត​៧​ពាន់​លាន​ដុល្លារ។ ភាគ​ច្រើន​នៃ​ទំនិញ​នាំចូល​ពី​ចិន​ជា​គ្រឿង​ចក្រ​បំរើ​ឲ្យ​តម្រូវ​ការ​ផ្នែក​សំណង់ រីឯ​ទំនិញ​កម្ពុជា​នាំ​ចូល​ទៅ​ចិន​ភាគ​ច្រើន​ជាផលិតផល​កសិកម្ម។

លោក​នាយក​រដ្ឋមន្ត្រី​ ហ៊ុន សែន​ កាលពីថ្ងៃទី២១ ខែកញ្ញា កន្លងទៅ ធ្លាប់​បាន​ប្រាប់​ក្រុម​ប្រឹក្សា​ធុរកិច្ច​សហរដ្ឋអាមេរិក-អាស៊ាន ថា ប្រទេស​កម្ពុជា​នឹង​ចុះកិច្ច​ព្រមព្រៀង​ពាណិជ្ជកម្ម​សេរី​កម្ពុជា-ចិន ហើយតាម​រយៈ​កិច្ចព្រម​ព្រៀង​នេះ លោក ហ៊ុន សែន សង្ឃឹម​ថានឹង​ជួយ​ដល់​កម្ពុជា ក្លាយ​ជា​គោល​ដៅ​សម្រាប់​ក្រុម​ហ៊ុន​អាមេរិក ដែល​កំពុង​រក​ទីតាំង​ផលិត​កម្មថ្មី នៅ​តំបន់​អាស៊ី​អាគេ្នយ៍៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI