កម្ពុជា នយោបាយ

អ្នកនាំពាក្យ៖ បញ្ហាអាកាសធាតុជា​ឧបសគ្គខ្លះ​ដល់​ដំណើរ​ការចុះឈ្មោះ​បោះឆ្នោត តែមិន​ប៉ះពាល់​ធ្ងន់ធ្ងរ​

ប្រជាពលរដ្ឋចុះឈ្មោះបោះឆ្នោតកាលពីឆ្នាំ២០១៦ (រូបភាពឯកសារ)
ប្រជាពលរដ្ឋចុះឈ្មោះបោះឆ្នោតកាលពីឆ្នាំ២០១៦ (រូបភាពឯកសារ) AP - Heng Sinith

​គិត​ត្រឹម​ថ្ងៃ​ទី​ ​១​១​ ​តុលា​នេះ​ ​មាន​អ្នក​ចុះឈ្មោះ​បោះឆ្នោត​ថ្មី​ប្រមាណ​ជាង​១​៦​ម៉ឺន​នាក់​ក្នុងចំណោម​ជាង​៣​០​ម៉ឺន​នាក់​នៅ​ទូទាំង​ប្រទេស​។​ ​ការពិនិត្យ​និង​ចុះឈ្មោះ​បោះឆ្នោត​ថ្មី​ ​នឹង​ត្រូវ​បញ្ចប់​នៅ​ថ្ងៃ​ទី​ ​១​៩​ ​តុលា​។​ ​យ៉ាងណាក៏ដោយ​ ​បើ​តាម​អ្នកនាំពាក្យ​ ​គជ​ប​ ​ការពិនិត្យ​និង​ចុះឈ្មោះ​បោះឆ្នោត​ថ្មី​ ​បាន​ជួប​ឧបសគ្គ​ខ្លះ​ៗ​ដែល​បង្កឡើង​ដោយ​បញ្ហា​អាកាសធាតុ​។​ ​ប៉ុន្តែ​វា​មិន​ប៉ះពាល់​ធ្ងន់ធ្ងរ​នោះ​ទេ​។

ផ្សាយពាណិជ្ជកម្ម

គិត​ត្រឹម​ថ្ងៃ​ទី​ ​១​១​ ​តុលា​នេះ​ ​គឺ​មាន​រយៈពេល​១​១​ថ្ងៃ​ហើយ​ ​នៃ​ដំណើរ​ការពិនិត្យ​និង​ចុះឈ្មោះ​បោះឆ្នោត​ថ្មី​សម្រាប់​ឆ្នាំ​២​០​២​០​។​ ​បើ​ផ្អែក​តាម​ ​តួលេខ​ដែល​ផ្តល់​ដោយ​ ​គជ​ប​ ​គិត​ត្រឹម​ថ្ងៃ​ទី​ ​១​០​ ​តុលា​ ​មាន​អ្នក​ចុះឈ្មោះ​បោះឆ្នោត​ថ្មី​ប្រមាណ​ជាង​១​៦​ម៉ឺន​នាក់​ស្មើនឹង​៤​៧​.​១​១​% ​នៃ​ចំនួន​អ្នក​ចុះឈ្មោះ​បោះឆ្នោត​ថ្មី​ ​ចំនួនជាង​៣០​ម៉ឺន​នាក់​នៅ​ទូទាំង​ប្រទេស​។​

​បើ​តាម​អ្នកនាំពាក្យ​ ​គជ​ប​ ​ដំណើរ​ការពិនិត្យ​និង​ចុះឈ្មោះ​បោះឆ្នោត​នៅ​ក្នុង​ក្របខណ្ឌ​ទូទាំង​ប្រទេស​បាន​ប្រព្រឹត្តទៅ​ជា​ធម្មតា​ ​ដោយ​មិន​មានការ​ព​ន្យារ​ពេល​នោះ​ទេ​ ​បើ​ទោះបីជា​នៅ​តំបន់​មួយ​ចំនួន​បាន​ជួប​ឧបសគ្គ​ខ្លះ​ៗ​ ​ដោយសារ​បញ្ហា​អាកាសធាតុ​និង​បញ្ហា​ទឹកជំនន់​ក្តី​។​ ​តួយ៉ាងដូចជា​ ​ខេត្ត​ប៉ៃលិន​ ​ខេត្ត​ឧត្តរមានជ័យ​ ​បាត់​ដំបង​ ​ពោធិ៍សាត់​ ​និង​ខេត្ត​បន្ទាយ​មានជ័យ​ជាដើម​។​ ​បើ​តាម​ការ​បញ្ជាក់​ពី​អ្នកនាំពាក្យ​ ​គជ​ប​ ​ឧបសគ្គ​ទាំងនេះ​ ​មិនបាន​បង្ក​ផល​ប៉ះពាល់​ធ្ងន់ធ្ងរ​ដល់​ដំណើរ​ការពិនិត្យ​និង​ចុះឈ្មោះ​បោះឆ្នោត​ថ្មី​ក្នុងរយៈពេល​១​០​កន្លងទៅ​នេះ​ទេ​។​ ​លើកលែង​ឃុំ​មួយ​នៅ​ក្នុងស្រុក​សំបូរ​ខេត្ត​ក្រចេះ​ ​ដែល​ទឹក​អូ​ស្ថិតនៅ​ក្នុង​ឃុំ​ស្រែ​ជិះ​ ​ស្រុក​សំបូរ​ ​ដែល​ទឹកឡើង​ខ្លាំង​ ​មិន​អាច​ធ្វើ​អោយ​ក្រុម​ការងារ​ចុះឈ្មោះ​ចល័ត​របស់​ ​គជ​ប​ ​ចុះទៅ​ដល់​ទីតាំង​ផ្ទាល់​នោះ​ឡើយ​ ​កាលពី​ថ្ងៃ​ទី​ ​០​៦​ ​តុលា​។​ ​ប៉ុន្តែ​យ៉ាងណាក៏ដោយ​ ​ជា​រួម​ឧបសគ្គ​ទាំងនេះ​ ​មិនបាន​បង្ក​ការ​រាំង​ស្ទះ​ដល់​ដំណើរ​ការពិនិត្យ​និង​ចុះឈ្មោះ​បោះឆ្នោត​ក្នុងរយៈពេល​ប៉ុន្មាន​ថ្ងៃ​មកនេះ​ឡើយ​។​

​លោក​ ​សំ​ ​គន្ធា​ម៉ី​ ​នាយក​ប្រតិបត្តិ​អង្គការ​ឃ្លាំមើល​ការបោះឆ្នោត​និ​ច​ហ្វិ​ច​បាន​សង្កេត​ជា​រួម​ថា​ ​ដំណើរ​ការពិនិត្យ​និង​ចុះឈ្មោះ​បោះឆ្នោត​ថ្មី​រយៈពេល​១​០​ថ្ងៃ​កន្លងទៅ​នេះ​ ​មិន​មាន​បញ្ហា​ភាព​មិន​ប្រក្រតី​អ្វី​កើតឡើង​ ​គួរ​អោយ​កត់សំគាល់​នោះ​ទេ​។​ ​ប៉ុន្តែ​ជា​រួម​លោក​បាន​លើកឡើង​ថា​ ​បញ្ហា​អាកាសធាតុ​ ​បាន​នឹង​កំពុង​បង្ក​ជា​ឧបសគ្គ​ខ្លះ​ៗ​ដល់​ដំណើរ​ការពិនិត្យ​និង​ចុះឈ្មោះ​បោះឆ្នោត​ក្នុងរយៈពេល​ជាង​១​០​ថ្ងៃ​មកនេះ​។​

​សូម​បញ្ជាក់​ថា​ ​ជា​រៀងរាល់​ឆ្នាំ​ ​គ​.​ជ​.​ប​ ​តែងតែ​រៀបចំ​បច្ចុប្បន្នភាព​បញ្ជី​ឈ្មោះ​បោះឆ្នោត​ថ្មី​ ​តាមរយៈ​កា​រដាក់​អោយ​ប្រជាពលរដ្ឋ​ពិនិត្យ​បញ្ជី​ឈ្មោះ​និង​ការ​ចុះឈ្មោះ​បោះឆ្នោត​ថ្មី​ ​ដើម្បី​ផ្តល់​ឱកាស​ឱ្យ​ពលរដ្ឋ​មាន​អាយុ​គ្រប់​១​៨​ឆ្នាំ​ឡើង​ទៅ​ ​អាច​ចូលរួម​បោះឆ្នោត​បាន​។​ ​ការ​ចុះឈ្មោះ​បោះឆ្នោត​ពេលនេះ​ ​នឹង​ត្រូវ​ប្រើប្រាស់​សម្រាប់​ការបោះឆ្នោត​ក្រុមប្រឹក្សា​ឃុំ​-​សង្កាត់​នៅ​ឆ្នាំ​២០២២​ ​និង​ការបោះឆ្នោត​ជ្រើសតាំង​តំណាងរាស្ត្រ​នា​ឆ្នាំ​២០២៣។​ ​បើ​តាម​ ​គ​.​ជ​.​ប​ ​បញ្ជី​ឈ្មោះ​បោះឆ្នោត​ចុងក្រោយ​គិត​ត្រឹម​ឆ្នាំ​២០១៩​ ​មាន​ចំនួន​៨ ​៦២៩​ ៣៥៧នាក់​។​ ​ការពិនិត្យ​ ​និង​ចុះឈ្មោះ​បោះឆ្នោត​ថ្មី​សម្រាប់​ឆ្នាំ​២​០​២​០​ ​នឹង​ត្រូវ​បិទ​បញ្ចប់​នៅ​ត្រឹម​ថ្ងៃ​ទី​ ​១​៩​ ​តុលា​ ​ខាងមុខនេះ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI