កម្ពុជា-សង្គម

ទឹកលិចទីក្រុងនៅពេលនេះជាការដាស់អារម្មណ៍ឲ្យគេនឹកឃើញដល់ការលុបបឹងធម្មជាតិ

ទិដ្ឋភាពទីក្រុងភ្នំពេញតាមផ្លូវជាតិលេខ៤ នៅតែបន្តជន់លិច
ទិដ្ឋភាពទីក្រុងភ្នំពេញតាមផ្លូវជាតិលេខ៤ នៅតែបន្តជន់លិច © សហការី

តំបន់​មួយ​ចំនួន​ក្នុង​ទីក្រុង​ភ្នំពេញ ​ទឹក​នៅតែ​បន្ត​ជន់​លិច​ មិន​ទាន់​ស្រក​អស់​នៅ​ឡើយ​ បើ​ទោះបី​ជា​អាជ្ញាធរ​បាន​ប្រើប្រាស់​ម៉ាស៊ីន​ បូម​ទឹក​ចេញ​ពី​បឹង​ទំពុន​យ៉ាង​ណា​ក៏​ដោយ​។​ តំបន់​ខ្លះ​ដែល​មិន​ធ្លាប់​ទឹក​លិច​ទាល់​តែ​សោះ ​ប៉ុន្តែ​នៅ​ឆ្នាំនេះ​បែរ​ជា​ត្រូវ​ទឹក​ជន់​លិច​យ៉ាង​ដំណំ​លាយ​ឡំ​ជាមួយ​នឹង​សំរាម​ទៅ​វិញ​។ ការ​នេះ​បាន​ញាំង​ឲ្យ​អ្នក​នយោបាយ ​និង​អ្នក​ឃ្លាំមើល​សង្គម​មួយ​ចំនួន​ស្តី​បន្ទោស​ជាថ្មី​ទៀត​ ទៅ​លើ​ការ​លុប​បឹង​ធម្មជាតិ ដែលធ្វើឲ្យ​​អ្នក​រស់​នៅ​ក្រុង​ភ្នំពេញ​ជួប​ផល​វិបាក​បែប​នេះ​។

ផ្សាយពាណិជ្ជកម្ម

លោកស្រី ចក់ សុភាព នាយិការមជ្ឈមណ្ឌល​សិទ្ធិមនុស្សកម្ពុជា ​បានលើក​ឡើង​នៅតាមហ្វេសប៊ុក​របស់​លោកស្រីថា ឃើញព័ត៌មាននេះ[ទឹកលិចក្រុង]ហើយ​ ធ្វើឱ្យគាត់នឹកឃើញដល់របាយការណ៍ស្តីពីការលុបបឹងទំពុន​ ហើយក៏នឹកថែមទៀតដល់បឹងតាមោកដែលគេកំពុងពុះច្រៀក​ជាបន្តបន្ទាប់។​

អ្នកការពារសិទ្ធិមនុស្សរូបនេះ យល់ថា​ ទាំងអាជ្ញាធរតាមមូលដ្ឋាន​ និងពលរដ្ឋកំពុងតែលំបាកហើយ។ ការលើកបញ្ហាលុបបឹង ជាដដែលៗនេះ​ ក៏ដើម្បីចូលរួមចំណែកជាដំណោះស្រាយនិងបង្កាបញ្ហាលំ​បាកនេះដែរ។

បើតាម លោកស្រី ចក់ សុភាព រដ្ឋាភិបាលគួរពិចារណានូវសចក្តីសម្រេចរបស់ខ្លួនឡើងវិញពាក់ព័ន្ធនឹងការធ្វើឱ្យអន្តរាយតាមរយៈការលុបបឹង​ និង​ការចាក់ដី​ចូល​​ទន្លេ​ សមុទ្រ​ ឬតំបន់នានាដែលនឹងផ្តល់ផលអាក្រក់ដល់សង្គមទាំងមូល។​ ការអភិវឌ្ឍន៍ទាំងឡាយមិនគួរបង្កហានិភ័យដល់សង្គមបរិស្ថាននោះឡើយ​ បើមិនដូច្នេះទេ​ វា​មិនមែនជាការអភិវឌ្ឍន៍ដោយចេរភាពនោះឡើយ។

ចំណែក លោក សាម អ៊ីន ជាអគ្គលេខាធិការនៃគណបក្សប្រជាធិបតេយ្យមូលដ្ឋាន បានរំឭកពីការសោកស្តាយផងដែរដល់ការលុបបឹងកក់។ លោកថា បើរក្សាទុកបឹងកក់ បឹងទំពុន បឹងជើងឯក បឹងពោងពាយ គឺអាចជួយរំដោះទឹកបានមួយចំនួនធំ ពេលភ្លៀងធំម្តងៗនៅភ្នំពេញ ហើយការជន់លិចរាជធានីភ្នំពេញនឹងមិនធ្ងន់ធ្ងរបែបនេះទេ។ លោកស្នើថា បើបានដឹងពីកំហុសឆ្គងនេះហើយ សូមជួយរក្សាទុកបឹងតាមោកផង។

​បន្ថែមពីនេះ លោក លោក យង សាំងកុមារ ជាអ្នកនយោបាយនៃគណបក្សប្រជាធិបតេយ្យមូលដ្ឋាន បានលើកឡើងដែរថា ក្នុងនាមជាអ្នកដឹកនាំដែលមានការទទួលខុសត្រូវគេមិនបន្ទោសតែកត្តាខាងក្រៅដូចជាទឹកជំនន់ដោយសារភ្លៀងច្រើនឬក៏និយាយថាប្រទេសគេក៏លិចដែរទេ។

បើតាមអ្នកនយោបាយនៅក្រៅរដ្ឋាភិបាលរូបនេះ គឺត្រូវរៀនចោទជាសំណួរឲ្យបានច្រើន តើកន្លងមកយើងបានធ្វើអ្វីខុសខ្លះឬមានការខ្វះខាតអ្វីខ្លះបានជាបញ្ហាទឹកជំនន់ធ្ងន់ធ្ងរបែបនេះកើតឡើង?«កំហុស​ជាមេរៀនតែបើមិនរៀន កំហុសនឹងពិន័យអ្នកហើយ»។

ទឹកលិចក្រុងភ្នំពេញនៅពេលនេះ ជាភស្តុតាងមួយ ដែលអង្គការសម្ព័ន្ធខ្មែរជំរឿននិងការពារសិទ្ធិមនុស្សលីកាដូ (LICADHO) បណ្តាញយុវជនកម្ពុជា (CYN) អង្គការសមធម៌កម្ពុជា (EC) និងអង្គការសមាគមធាង​ត្នោត (STT) កាលពីប៉ុន្មានខែមុនបានព្រមានថា ប្រជាជនរាប់លាននាក់នឹងរងផលប៉ះពាល់ពីការលុប​បឹងទំពុន ឬបឹង​ជើងឯក ដោយ ក្រុមហ៊ុនឯកជន។

បើតាមក្រុមអង្គការទាំងនេះផ្ទៃតំបន់បឹងទំពុនដែលពីមុនមានទំហំយ៉ាងហោច​ណាស់១.៥០០ហិក​តា ប៉ុន្តែឥឡូវនេះនឹងត្រូវកាត់មកនៅត្រឹមទំហំ ១០៧ ហិកតាតែប៉ុណ្ណោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI