កម្ពុជា-សត្វព្រៃ

នៅកម្ពុជា៖ អង្គការ WCS ថតបានរូប «ទាព្រៃស្លាបស» ដែលរងការគំរាមកំហែងជិតផុតពូជលើពិភពលោក

ទាព្រៃស្លាបស ដែលថតបានដោយមា៉ស៊ីនថតស្វ័យប្រវត្តិ
ទាព្រៃស្លាបស ដែលថតបានដោយមា៉ស៊ីនថតស្វ័យប្រវត្តិ © WCS

ទា​ព្រៃ​ស្លាប​ស​ ដែល​ជា​​បក្សីព្រៃមួយប្រភេទ​កំពុង​រង​នូវ​ការ​គំរាមកំហែង​ជិត​ផុត​ពូជ​ ត្រូវ​អង្គការ​អភិរក្ស​សត្វ​ព្រៃ WCS​ ថត​បាន​ដោយ​ម៉ាស៊ីន​ថត​ស្វ័យ​ប្រវត្តិ​ នៅ​ក្នុង​ដែន​ជម្រក​សត្វ​ព្រៃ​គូលែន ​ព្រហ្មទេព​ ខេត្ត​ព្រះវិហារ​។ សូម​ជម្រាប​ថា ​ទា​ព្រៃ​ស្លាប​ស​នេះ​ ជា​ប្រភេទ​សត្វ​បក្សីព្រៃ​ ដែល​មាន​មិន​ដល់​១០០០​ក្បាល​ទេ​ នៅ​លើ​ពិភពលោក​នាបច្ចុប្បន្ន​។ សព្វ​ថ្ងៃ សត្វ​ដ៏​កម្រ​នេះ មានវត្តមានតែនៅក្នុងប្រទេស​ចំនួន​៩​ក្នុង​ទ្វីបអាស៊ីប៉ុណ្ណោះ ដែល​ក្នុងនោះក៏​មាន​ប្រទេស​កម្ពុជាផង​ដែរ។

ផ្សាយពាណិជ្ជកម្ម

តាម​រយៈ​សេចក្ដី​ប្រកាស​ព័ត៌មាន​នា​ថ្ងៃ​ពុធ​​ទី​១៤​​តុលា អង្គការ​អភិរក្ស​សត្វ​ព្រៃ WCS បញ្ជាក់​ថា ខ្លួន​ថត​បាន​រូប​ទា​ព្រៃ​ស្លាប​ស  បន្ទាប់ពីវាបានចេញពីសំបុកដែលមានកម្ពស់៤ម៉ែត្រពីដីជាមួយមេរបស់វា នៅក្នុងដែនជម្រកសត្វព្រៃគូលេនព្រហ្មទេព នៃ​ខេត្ត​ព្រះវិហារ​។ អង្គការអភិរក្សសត្វព្រៃនៅកម្ពុជា បានជឿថា កូន​ទា​ព្រៃ​ស្លាប​ស​ដែល​ថត​បាន​នោះ ជាកូនទាព្រៃស្លាបស១ក្នុងចំណោម៥ក្បាល ដែលមានវត្តមាន​នៅក្នុង​ប្រទេស​កម្ពុជា។

លោក ម៉ៅ ឃៀន ប្រធានក្រុមជីវចម្រុះនៃអង្គការ WCS បានលើកឡើងថា ការថតយកសកម្មភាពទាព្រៃស្លាបសនៅក្នុងសំបុកនេះ មិនមែនជារឿងងាយស្រួលទេ​។ រូប​ភាព​ដែល​បាន​មកនា​ពេល​​នេះ គឺ​ទទួល​បាន​​តាមរយៈការដំឡើងម៉ាស៊ីនថតសត្វព្រៃស្វ័យប្រវត្តិនៅក្បែរសំបុកពួកវា ដោយធ្វើយ៉ាងណាមិនឲ្យមានការរំខានដល់ទាព្រៃស្លាបសទាំង​នោះ​​ឡើយ​។

សូម​ជម្រាប​ថា ទាព្រៃស្លាបស ជាប្រភេទសត្វព្រៃ​កំពុងរងការគំរាមកំហែងជិតផុតពូជ ស្ថិត​នៅ​ក្នុង​បញ្ជី​ក្រហម​របស់​អង្គការ IUCN។ សព្វ​ថ្ងៃ សត្វ​ដ៏​កម្រ​នេះ មានចំនួន​តិច​ជាង​១០០០​ក្បាល នៅ​ក្នុងប្រទេស​ចំនួន​៩​ក្នុង​ទ្វីបអាស៊ីប៉ុណ្ណោះ ដែល​ក្នុងនោះក៏​មាន​ប្រទេស​កម្ពុជាផង​ដែរ។ បើ​តាម​អង្គការ WCS ជម្រករបស់​សត្វ​ទា​ព្រៃស្លាប​ស ដែល​​ភាគ​ច្រើន​ស្ថិត​នៅ​ក្នុង​ប្រភេទដើមឈើចាស់ៗនិងតាមដងអូរ ត្រូវមានការអភិរក្សជាចាំបាច់ ព្រោះថា មួយរយៈពេលកន្លងមក ប្រទេសកម្ពុជារមែងជួបគ្រោះរាំងស្ងួត ជាហេតុធ្វើឲ្យទឹកអូររីងហួតទៅជារាក់។ ជាមួយ​គ្នា​នេះ ដើមឈើចាស់ៗដែលជាជម្រករបស់ទាព្រៃស្លាបសនេះ ក៏កំពុងប្រឈមខ្ពស់ទៅនឹងកាប់បំផ្លាញ​ដោយ​ខុសច្បាប់ដែរ។

នៅក្នុងគម្រាងការពារទាព្រៃស្លាបសនេះ អង្គការ WCS និងក្រសួងបរិស្ថាន រូមនឹងដៃគូផ្សេងទៀត បានជម្រុញដល់​ប្រជាពលរដ្ឋក្នុងសហគមន៍ក្នុង​តំបន់ ឲ្យ​ចូលរួមសង្គ្រោះនិងអភិរក្សសត្វទា​ព្រៃស្លាប​ស​នេះ ដោយ​ជំរុញ​តំបន់​នេះ​ឲ្យ​ក្លាយជាតំបន់ទេសចរណ៍ធម្មជាតិតាមរយៈការចូលទស្សនាសត្វព្រៃ សម្រាប់ជាប្រភពចំណូលដល់ប្រជាសហគមន៍​ផង​ដែរ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI