អានតួអត្ថបទ
កម្ពុជា សង្គម

ការថែទាំសុខភាពគួរត្រូវបានយកចិត្តទុកដាក់ខ្ពស់ ខណៈទឹកជំនន់នៅមិនទាន់ថមថយ

ការជួយសង្រ្គោះពលរដ្ឋក្នុងតំបន់រងគ្រោះដោយទឹកជំនន់ នាខេត្តព្រះសីហនុ កាលពីថ្ងៃទី១៨ ខែកញ្ញា
ការជួយសង្រ្គោះពលរដ្ឋក្នុងតំបន់រងគ្រោះដោយទឹកជំនន់ នាខេត្តព្រះសីហនុ កាលពីថ្ងៃទី១៨ ខែកញ្ញា © FB: រដ្ឋបាលខេត្តព្រះសីហនុ
ដោយ៖ អ៊ឹង ប៊ុនថន
១៣ នាទី

ស្ថាន​ភាព​ទឹក​ជំនន់​នៅ​កម្ពុជា​នៅ​មិន​ទាន់​អស់​ឥទ្ធិពល​នៅ​ឡើយ ​ហើយ​ខេត្ត​មួយ​ចំនួន​ចាប់​ផ្តើម​រង​គ្រោះម្តង​ទៀត​ដោយ​សារ​ការ​បើក​ទ្វារ​អាង​ស្តុក​ទឹក​។ បើ​តាម​ការ​ព្យាករណ៍​របស់​ក្រសួងធនធាន​ទឹក​ ភ្លៀង​នៅតែបន្ត​ធ្លាក់​រហូត​ដល់​ថ្ងៃ​ទី​២១​តុលា​សប្តាហ៍​ក្រោយ​។​ តើ​ប្រជា​ជន​ត្រូវថែទាំ​សុខភាព​ដោយរ​បៀបណា​នៅគ្រា​​ទឹក​ជំនន់​នេះ​?

ផ្សាយពាណិជ្ជកម្ម

នៅចំពោះមុខបញ្ហាទឹកជំនន់ ការការពារសុវត្ថិភាពពីការលង់ទឹក ការការពារសត្វទិចឬខាំ ការ​សំរាន្តក្នុងមុង ដើម្បីការពារជំងឺគ្រុនឈាម គ្រុនចាញ់ និងការរក្សាអនាម័យក្នុងការបរិភោគគឺជារឿងចាំបាច់បំផុត។

ក្នុងករណីត្រូវធ្វើដំណើរពេលយប់គឺត្រូវស្លៀកខោជើងវែង និងពាក់ស្បែកជើងកវែង ចៀសវាងកន្លែងដែលមានស្មៅស៊ុបទ្រប់ ដោយពិនិត្យឲ្យបានត្រឹមត្រូវមុនទៅកាន់ទីទួលសុវត្ថិភាព ឬមុនទៅធ្វើការជិតគំនរអុស និងគំនរឈើ ហើយហាមដាច់ខាតមិនត្រូវយកដៃទៅចាប់ពស់ ឬសត្វអាសិរពិសនោះឡើយ។ លើសពីនេះ មិនត្រូវចូលទៅក្នុងផ្ទះចាស់ ឬអាគារទ្រុឌទ្រោម ព្រោះអាចបាក់ស្រុត បង្កឲ្យមានគ្រោះថ្នាក់​។ជាមួយគ្នានោះក៏មិនត្រូវប៉ះពាល់គ្រឿងប្រើប្រាស់អគ្គិសនីដោយដៃសើមឬកំពុងឈរនៅក្នុងទឹក ហើយ​​នៅពេលធ្វើដំណើរដោយជិះទូក ឬកាណូតនៅពេលយប់ត្រូវតែមានភ្លើងបំភ្លឺ និងមិនត្រូវផ្ទុក មនុស្ស​​ហួសកំរិតនោះឡើយ។

ចំពោះស្រ្តីមានផ្ទៃពោះត្រូវតាមដាន និងពិនិត្យផ្ទៃពោះតាមការកំណត់របស់មណ្ឌលសុខភាព ឬមន្ទីរពេទ្យ ប្រសិនបើស្ត្រីគ្រប់ខែជិតដល់ពេលសម្រាល ត្រូវរកកន្លែងស្នាក់នៅក្បែរមណ្ឌលសុខភាព ឬមន្ទីរពេទ្យដែលនៅជិតបំផុត។ ដោយឡែក​សម្រាប់ក្មេងៗ គឺត្រូវប្រុងប្រយ័ត្នបំផុតនូវការលង់ទឹក ដោយហាមពួកគេកុមារតូចៗមិនឲ្យចុះទឹក ហើយនាំកុមារទៅកន្លែងខ្ពស់ និងមានអ្នកថែទាំ ឬប្រើអាវពោង ឬប៊ីដុងជ័រគ្រប់ពេលកុមារចេញពីផ្ទះ។

សម្រាប់កុមារឬទារក គឺត្រូវនាំពួកគេ ទៅចាក់ថ្នាំបង្កាតាមការកំណត់របស់គ្រូពេទ្យ និងផ្តល់អាហារដល់ពួកគេឲ្យបានត្រឹមត្រូវ ជាពិសេសត្រូវប្រុងប្រយ័ត្នចំពោះកុមារី និងក្មេងស្រីនៅទីទួលសុវត្ថិភាព ក្រែងមានអំពើហិង្សាផ្លូវភេទកើតឡើង។

ចំពោះមនុស្សចាស់ឬជនពិការ ក្នុងក្រុមគ្រួសារ គឺត្រូវផ្តល់ការគាំទ្រដល់ពួកគេ ដូចជា ឈើច្រត់ រទេះរុញ ឬថ្នាំពេទ្យដែលគាត់កំពុងប្រើប្រាស់ជាប្រចាំមួយចំនួន ដែលជាតម្រូវការចាំបាច់បំផុត។

បើតាម​ក្រសួង​សុខាភិបាល ដើម្បីចៀសវាងនូវជំងឺផ្សេងៗដូចជា ជំងឺរាគរូស ពុល ជំងឺរលាកផ្លូវដង្ហើម និងជំងឺផ្សេងទៀត គឺត្រូវបរិភោគទឹកស្អាតដោយប្រើធុងចម្រោះ ឬដាំទឹកឲ្យពុះ ឬប្រើប្រាស់ទឹកដោយប្រើថ្នាំក្លរីន ឬក្ខរ៉ាមីន (ថ្នាំក្លរីន ឬក្លរ៉ាមីន៥០០មីល្លីក្រាម ពីរគ្រាប់ អាចលាយទឹក ២០លីត្រ)។ ត្រូវលាងសម្អាតបន្លែ និងផ្លែឈើជាមួយទឹកស្អាត អាហារត្រូវចម្អិនឲ្យបានឆ្អិនល្អ និងគ្របអាហារទុកឲ្យបានជិត ដើម្បីការពាររុយរោម និងធូលីដីហុយចូល ព្រមទាំងសម្អាតកន្លែងធ្វើម្ហូប និងសម្ភារផ្ទះបាយបានស្អាតជាប្រចាំ។ ហើយត្រូវលាងសម្អាតដៃជាមួយសាប៊ូឲ្យបានញឹកញាប់ មុន និងក្រោយពេលបរិភោគអាហារ និងក្រោយចេញពីបង្គន់ជាដើម៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ