អានតួអត្ថបទ
កម្ពុជា-សង្គម

២៣តុលាឆ្នាំនេះ៖ មេដឹកនាំនយោបាយ រំលេចសារលើហ្វេសប៊ុកជំនួសឲ្យការធ្វើពិធីសាធារណៈ

ថ្ងៃទី២៣ ខែតុលានេះ គឺជាគម្រប់ខួប២៩ឆ្នាំនៃការកកើតកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១
ថ្ងៃទី២៣ ខែតុលានេះ គឺជាគម្រប់ខួប២៩ឆ្នាំនៃការកកើតកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ © RFI
ដោយ៖ ញឹម សុផល
១៦ នាទី

នៅក្នុង​ឱកាស​ខួប​ទី​២៩​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស ​២៣​តុលា​នេះ ​មេដឹកនាំ​ខ្មែរ​ ដែលមាន​និន្នាការ​នយោបាយ​ផ្សេង​ៗ​គ្នា ​ក៏ដូចជា​ព្រះ​បរមរាជវាំង​ បាន​សរសេរ​សារ​រំលឹក​ដល់​ទិវា​នេះ ​នៅ​តាម​បណ្តាញ​សង្គម​នានា​។ ជំនួស​ដោយ​សារ​អេឡិចត្រូនិច​ ដែល​រំលឹក​ពី​កិច្ច​ព្រមព្រៀង​បញ្ចប់​ជំលោះ​រវាង​ភាគី​ខ្មែរ​ដូច្នេះ​ គឺ​ធ្វើ​ឡើង​ខណៈ​ដែល​ រដ្ឋាភិបាល​បាន​ដក​ថ្ងៃ​២៣​តុលា​នេះ​ ពី​បញ្ជី​ឈប់​សម្រាក​ប្រចាំ​ឆ្នាំ​ ហើយ​មិន​បាន​រៀប​ចំ​ធ្វើ​ពិធី​នេះ​ធំ​ដុំ​ដូច​ឆ្នាំ​កន្លង​ទៅ​ទេ​។

ផ្សាយពាណិជ្ជកម្ម

ផ្តើមចេញពីព្រះបរមរាជវាំង ទំព័រហ្វេសប៊ុក Royal du Cambodge បានអបអរសាទរខួប​អនុស្សាវរីយ៍លើក​ទី ​២៩​ឆ្នាំ​ ​នៃសន្ធិសញ្ញាសន្តិភាពទីក្រុងប៉ារីស ២៣ តុលា ១៩៩១ - ២៣ តុលា ២០២០

ក្រោម​ព្រះ​រាជបូជនីយ​កិច្ច​ នៃ​ព្រះ​ករុណា​ ព្រះ​បាទ​សម្ដេច​ព្រះ​ នរោត្ដម​ សីហនុ​ ព្រះ​មហា​វីរក្សត្រ​ ព្រះ​វររាជ​បិតា​ឯករាជ្យ​ ព្រះ​បរម​រតន​កោដ្ឋ​ ព្រះវររាជបិតាបង្រួបបង្រួមជាតិ ដែលព្រះអង្គបាននាំឲ្យកម្ពជាទទួលបាននូវសុខសន្តិភាពឡើងវិញបន្ទាប់ពីសង្រ្គោមដ៏រាំរៃជាច្រើនទសវត្ស តាមរយៈការចរចារបង្រួបបង្រួមបញ្ចប់សង្រ្គោមរហូតឈានដល់ការចុះហត្ថលេខាសន្តិភាពទីក្រុងប៉ារីសពីបណ្តាភាគីធំៗ ។

ទោះជាស្ងាត់ស្ងៀមមិនរៀបចំពិធីជាសាធារណៈក៏ដោយ លោកនាយករដ្ឋមន្ត្រី ហ៊ុន សែន ក៏មិនបានបំភ្លេចដែរ ដោយទំព័រហ្វេសប៊ុករបស់លោកក៏មានសារអបអរដូចគ្នាដែរ។ លោក ហ៊ុន សែន សរសេរថា ២៩ ឆ្នាំមុន ពោលគឺនៅថ្ងៃទី២៣ តុលា ឆ្នាំ១៩៩១ ភាគីទាំង៤ របស់កម្ពុជារួមមាន លោកនាយករដ្ឋមន្ត្រី តំណាងអោយរដ្ឋាភិបាលកម្ពុជា ចលនាតស៊ូហ៊្វុនស៊ីនប៉ិច ដែលតំណាងដោយ សម្តេចព្រះ នរោត្តម សីហនុ និង សម្តេចក្រុមព្រះ នរោត្តម រណប្ញទ្ឋិ រណសិរ្សជាតិរំដោះប្រជាពលរដ្ឋខ្មែរ ដែលតំណាងដោយ លោក សឺន សាន និង ក្រុមចលនាកម្ពុជាប្រជាធិបតេយ្យ តំណាងដោយ លោក ខៀវ សំផន បានឈានទៅចុះហត្ថលេខា លើកិច្ចព្រមព្រៀងសន្តិភាពនៅទីក្រុងប៉ារីស ប្រទេសបារាំង ក្រោមវត្តមានសាក្សីមកពី១៨ប្រទេស រួមទាំងអគ្គលេខាធិការអង្គការសហប្រជាជាតិផងដែរ ដើម្បីបញ្ចប់សង្រ្គាមស៊ីវិលនៅកម្ពុជា។ មុននឹងឈានមកដល់កិច្ចព្រមព្រៀងនាទីក្រុងប៉ារីស ២៣ តុលា លោក ហ៊ុន សែន បានផងដែរពីប្រវត្តិជំនួបចរចាជាច្រើនជុំរវាងលោក និងសម្តេចព្រះនរោត្តម សីហនុ។

ជាមួយគ្នានេះ លោក កឹម សុខា ដែលជាប្រធានអតីតគណបក្សសង្គ្រោះជាតិ បានចាត់ទុកថ្ងៃ២៣តុលានេះ​ គឺជាព្រឹត្តិការណ៍ប្រវត្តិសាស្ត្រដ៏សំខាន់សម្រាប់ពលរដ្ឋខ្មែរ។  តាមហ្វេសប៊ុករបស់លោក លោក កឹម សុខា បានចោទសួរការសន្យា និងកាតព្វកិច្ចរបស់ខ្មែរ ក្នុងការអនុវត្តខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស និងតួនាទីរបស់សហគមន៍អន្តរជាតិ ដែលជាប្រទេសហត្ថលេខីផងដែរ។

តាមទស្សនៈរបស់លោក លោក កឹម សុខា បញ្ជាក់ថា មានតែការរួបរួមគ្នារវាងខ្មែរនិងខ្មែរ ក៏ដូចជាសហគមន៍អន្តរជាតិ យកស្មារតីនៃកិច្ចព្រមព្រៀងនេះ​ មកបន្តធ្វើនូវអ្វីដែលមិនទាន់សម្រេចបាន ដើម្បីឲ្យកាន់តែប្រសើរឡើង ជាជាងការយកប្រជាពលរដ្ឋខ្មែរ​ និងទឹកដីកម្ពុជា​ ដែលរងទុក្ខវេទនាជាច្រើនណាស់មកហើយ បម្រើតាមមហិច្ឆតារៀងៗខ្លួនតទៅទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ