អានតួអត្ថបទ
កម្ពុជា-នយោបាយ

លោក កឹម សុខា៖ មាសទឹកដប់ ទោះបីគេទម្លាក់ក្នុងភក់ជ្រាំ ក៏នៅតែមានតម្លៃ

លោក​ កឹម សុខា ​ជួប​ជាមួយ​​ឯកអគ្គរដ្ឋទូត​សហរដ្ឋ​អាមេរិក​ប្រចាំនៅ​កម្ពុជា​​នៅគេហដ្ឋាន​របស់​លោកកន្លង​មក​។
លោក​ កឹម សុខា ​ជួប​ជាមួយ​​ឯកអគ្គរដ្ឋទូត​សហរដ្ឋ​អាមេរិក​ប្រចាំនៅ​កម្ពុជា​​នៅគេហដ្ឋាន​របស់​លោកកន្លង​មក​។ © FB
ដោយ៖ វ៉ា សំណព្វ
១៨ នាទី

លោក កឹម សុខា ​តាមរយៈទំព័រ​ហ្វេសប៊ុក​របស់ខ្លួន​នៅថ្ងៃទី​២៩​ តុលានេះ ​បានបង្ហាញ​រូបភាព​ជាច្រើន​សន្លឹក ​ដែលរៀបរាប់​ពីសកម្មភាព​របស់លោក​ក្នុងជំនួប​ជាមួយ​បណ្តាអង្គទូត​បរទេស​នានា ដូចជា ​សហរដ្ឋអាមេរិក ​សហភាពអឺរ៉ុប​ និង​ជប៉ុន​ រួមនឹង​សកម្មភាព​របស់លោក​ក្នុងការ​ចុះទៅចែកអំណោយ​ដល់ជន​រងគ្រោះ​ក្នុងគ្រោះទឹកជំនន់​នារយៈពេល​ចុងក្រោយ​នេះ​។ ​អមដោយ​សំណេរ​ថ្លែងអំណរគុណ ​លោក កឹម សុខា ​ក៏បានលើក​យកសុភាសិត​ខ្មែរមួយឃ្លា​មកបង្ហាញ​ថា​ «មាស​ទឹកដប់​ ទោះបីគេ​ទម្លាក់​ក្នុងភក់ជ្រាំ ​ក៏នៅតែមាស​ទឹកដប់​ នៅតែមាន​តម្លៃដដែល​»​។ ​សូមបញ្ជាក់ថា ​លោក កឹម សុខា ​ត្រូវបាន​តុលាការកម្ពុជា​ចោទប្រកាន់​ពីបទក្បត់ជាតិ ​និង​កំពុង​ស្ថិតនៅក្នុង​បំរាម​របស់តុលាការ​កម្ពុជា​។

ផ្សាយពាណិជ្ជកម្ម

«​គតិបណ្ឌិតពិត​ តែងតែ​ផ្តល់តម្លៃ​ដល់អ្វីដែល​ពិត​ មិនក្លែងបន្លំ ​ដូចដែល​ខ្មែរយើង​តែងពោល​ថា ​៖​«មាសទឹកដប់ ​ទោះបីគេទម្លាក់​ក្នុងភក់ជ្រាំ ​ក៏នៅតែមាស​ទឹកដប់ ​និង​នៅតែមាន​តម្លៃដដែល​»​។ ​នេះ​គឺជាសំណេរ​របស់​លោក កឹម សុខា ​អតីត​ប្រធាន​គណបក្ស​សង្គ្រោះជាតិ ​នៅថ្ងៃទី​ ២៩​ តុលា​នេះ​។​ នៅក្នុងន័យ​នេះ ​លោក ​កឹម សុខា ​បានពន្យល់​ថា​ មិនខុស​អីពីមនុស្ស​បរិសុទ្ធ ​ដែលមាន​គុណតម្លៃពិត​ ទោះបី​ជាទទួល​រងការចោទ​ប្រកាន់​មួលបង្កាច់ ​ការជេរប្រមាថ​លាបពណ៌ ​មាន​ឬ​មិនមានតួនាទី ​ឋានៈបុណ្យស័ក្តិ​អ្វីក៏ដោយ ​បើធ្លាក់​ដល់ទីណា​ក៏​ដោយ ​ក៏អ្នក​ទាំងឡាយ​ណាដែល​ជាគតិបណ្ឌិតពិត​ នៅតែស្វះស្វែង​ទទួល​ស្គាល់ ​ផ្តល់តម្លៃ ​គោរព​ ចំពោះបុគ្គល​ដែល​តម្កល់​នូវគុណ​តម្លៃនោះ​ដែ​រ។

គួរជំរាប​ជូនថា ​នៅជិត​ដំណាច់​ខែតុលា ​ឆ្នាំ២០២០​នេះ ​អតីតប្រធាន​គណបក្ស​សង្គ្រោះជាតិ ​លោក ​កឹម សុខា ​បានបង្ហាញ​រូបភាព​ជាច្រើន​សន្លឹក​ ដែលបានបង្ហាញ​ពី​សកម្មភាព​របស់លោក ​ពេលចុះទៅ​ចែកអំណោយ​ជូនដល់ជនរងគ្រោះ​ក្នុងគ្រោះទឹកជំនន់ ​ការចូលរួម​ក្នុងពិធី​បុណ្យ​អង្គកឋិនទាន ​និង​ជាពិសេស ​គឺរូបភាព​ដែលបង្ហាញ​ពីជំនួប​របស់​លោក​ជាមួយ​បណ្តាអង្គទូត​បរទេសនានា ​ទាំងនៅទី​កន្លែង​សាធារណៈ ​និង​គេហដ្ឋាន​របស់លោក​ផងដែរ​។​

តាមរយៈទំព័រ​ហ្វេសប៊ុក​របស់ខ្លួន ​លោក កឹម សុខា ​បានថ្លែង​អំណរគុណ​ចំពោះជន​រួមជាតិ​របស់​លោក ​ទាំងក្នុង​និង​ក្រៅប្រទេស ​ដែលនៅតែគាំទ្រនូវ​ជំហរអហិង្សា ​ការមិនយក​ខ្មែរណាជាសត្រូវ​ ការតស៊ូ​អត់ធ្មត់​របស់លោក ​និង​ការគោរព​ស្រឡាញ់​រាប់អាន​ចំពោះលោក​ នៅក្នុងគ្រា​ដែលលោក​កំពុងស្ថិត​នៅជាប់បំរាម​របស់​តុលាការ​កម្ពុជានេះ។​ លោក​ កឹម សុខា ​ក៏បានថ្លែង​អំណរគុណ​ដល់ប្រទេសជាមិត្ត​ដែលប្រកាន់​យក​នូវ​គោលការណ៍​ប្រជាធិបតេយ្យ ​លើកស្ទួយ​គុណតម្លៃ​សិទ្ធិមនុស្ស ​ដែលនៅតែគោរព​និង​ផ្តល់​តម្លៃ​ដល់រូបលោក ​តាមរយៈការ​ឲ្យ​មន្ត្រីទូត​ដែលជា​តំណាង​ប្រទេស​របស់ខ្លួន​មកជួប​លោក​ដល់​គេហដ្ឋាន ​និង​អញ្ជើញ​លោក​ទៅ​ស្ថានទូត ​ដើម្បី​សួរសុខទុក្ខ ​ទទួល​ទានអាហារ ​និង​សម្តែង​ពីកង្វល់​ចំពោះស្ថានភាព​សិទ្ធិសេរីភាព​ សុវត្ថិភាព​របស់លោក ​និង​ខ្លះទៀត​ថែមទាំង​បាន​បញ្ជូន​វេជ្ជបណ្ឌិតមក​ជួយពិនិត្យ​ព្យាបាល​និងតាមដាន​សុខភាព​លោក​ជាប្រចាំ​ផងដែរ។

សូមបញ្ជាក់​ថា ​អតីត​ប្រធាន​គណបក្សប្រឆាំង​លោក កឹម សុខា ​ត្រូវបាន​តុលាការ​កម្ពុជា​កាលពី​ខែវិច្ឆិកា ​ឆ្នាំ ​២០១៩ ​បាន​អនុញ្ញាត​អោយលោក​មានសេរីភាព​ដើរហើគ្រប់ទីកន្លែង​នៃ​ប្រទេស​កម្ពុជា ​ប៉ុន្តែមិនអាច​ធ្វើសកម្មភាព​នយោបាយ ​ឬ​ធ្វើដំណើរ​ចេញទៅក្រៅ​ប្រទេស​នោះ​ឡើយ​។ លោក​ត្រូវបាន​តុលាការ​កម្ពុជា​ចោទប្រកាន់​ពីបទ​ «សន្និដ្ឋិភាព​»​ ឬ ​ត្រូវរ៉ូវ​ជាមួយ​រដ្ឋបរទេស​ ដើម្បី​ប៉ុនប៉ង​ផ្តួលរំលំ​រដ្ឋាភិបាល​កម្ពុជា ​កាលពី​​ខែកញ្ញា ​ឆ្នាំ២០១៧ ។ ​ប៉ុន្តែលោក​បាន​បដិសេធ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ