បន្លែកំពុងឡើងថ្លៃនៅក្នុងអន្តរកាលដែលកម្ពុជាកំពុងជួបជំនន់ទឹកភ្លៀងនិងវិបត្តិកូវីដ១៩
ចុះផ្សាយនៅថ្ងៃ៖
នៅលើទីផ្សារម្ហូបអាហារគេសង្កេតឃើញថា ប្រភេទមុខទំនិញបន្លែកំពុងឡើងថ្លៃ នៅក្នុងអន្តរកាលដែលកម្ពុជាកំពុងជួបជំនន់ទឹកភ្លៀង និងវិបត្តិកូវីដ១៩។ នៅចំពោះមុខស្ថានភាពនេះ មន្ត្រីជំនាញមកពីក្រសួងកសិកម្មបានអះអាងប្រាប់វិទ្យុបារាំងអន្តរជាតិនៅថ្ងៃនេះថា ក្រសួងកសិកម្មកំពុងតែដោះស្រាយលើបញ្ហានេះហើយ ដែលជាដំណោះស្រាយរួមនៃការស្ដារវិស័យកសិកម្មឡើងវិញក្រោយជំនន់ទឹកភ្លៀង។
ត្រសក់ ជី ត្រកួន សាឡាដ ស្ពៃ ដែលធ្លាប់តែថោកប្រែជាឡើងថ្លៃស្ទើរតែពាក់កណ្ដាលនៃតម្លៃសរុប។ជាក់ស្ដែងនៅតាមផ្សារមួយចំនួនក្នុងរាជធានីភ្នំពេញគឺតម្លៃជីចង់ជាបាច់តូចៗធ្លាប់លក់ក្នុងមួយដុំតម្លៃ៥០០រៀលហក់ឡើងដល់១០០០រៀល ហើយត្រសក់ ត្រកួន ស្ពៃ សាឡាដ ដែលធ្លាប់មានតម្លៃក្នុងមួយគីឡូមិនក្រោម៥ពាន់រៀលហក់ឡើងថ្លៃដល់ទៅ៨០០០ឬលើសពីនេះទៀត។ នេះគេនៅមិនទាន់រាប់បញ្ចូលប្រភេទតម្លៃបន្លែមួយចំនួនដែលកម្ពុជានាំចូលពីក្រៅផងដូចជាៈស្ពៃបូកគោ ផ្កាខាត់ណា ពោតបារាំង។
លោក ហ៊ាន វណ្ណហន រដ្ឋលេខាធិការក្រសួងកសិកម្មឲ្យដឹងថា ការប្រែប្រួលតម្លៃបន្លែនៅលើទីផ្សារដោយសារកត្តាកូវីដ១៩ និងជំនន់ទឹកភ្លៀង។ កូវីដ១៩ បង្ខំឲ្យកម្ពុជាផ្អាកការនាំចូលបន្លែមួយចំនួនពីប្រទេសក្បែរខាងដោយសារការរឹតត្បិតចរាចរ នៅតាមព្រំដែន។ រីឯជំនន់ទឹកភ្លៀងវិញបានបង្ករផលប៉ះពាល់ដល់ផ្ទៃដីដាំដុះជិត១ម៉ឺនហិកតា នៅក្នុងក្របខណ្ឌស្ទើរទូទាំងប្រទេស។ បើតាមអ្នកជំនាញ ប្រភេទបន្លែមួយចំនួនដែលប្រើរយៈពេលដាំដុះចន្លោះពី១ខែទៅ៣ ឆាប់រងផលប៉ះពាល់ ក្នុងករណីកើតមានជំនន់មកបន្ទាន់។
លោក យ៉ង សាំងកុមារ មើលឃើញថា មួយផ្នែកនៃផលប៉ះពាល់ទៅលើប្រទេសវៀតណាមដោយសារឥទ្ធិពលព្យុះ និងទឹកជំនន់ក៏បានប៉ះពាល់ដល់តម្លៃបន្លែនៅកម្ពុជាដែរ។ ប៉ុន្តែយ៉ាងណាក៏ ដោយ អ្នកជំនាញកសិកម្មរូបនេះយល់ថា ឧបសគ្គបន្លែឡើងថ្លៃ នឹងមិនអូសបន្លាយយូរពេលទេ ពោលគឺអ្វីៗនឹងត្រឡប់មកដូចដើមនៅខែ១២។
នៅចំពោះមុខការឡើងថ្លៃបន្លែ បើតាមលោក ហ៊ាន វណ្ណហន ក្រសួងកិសកម្ម កំពុងមមាញឹកក្នុងការស្ដាវិស័យកសិកម្មជារួមមិនចំពោះមុខតែការដោះស្រាយលើបញ្ហាបន្លែតែមួយមុខនោះទេ។ នេះក៏ដោយសារតែផលប៉ះពាល់ ដែលបន្សល់ទុកក្រោយជំនន់ទឹកភ្លៀង មិនប៉ះពាល់ទៅលើបន្លែតែមួយមុខពោលគឺផលដំណាំកសិកម្មជារួមដូចជាស្រូវ ត្រី សាច់ ជាដើម។
នៅក្នុងដំណោះស្រាយរយៈពេលយូរ លោក យ៉ង សាំងកុមារ ផ្ដល់យោបល់ថា រដ្ឋាភិបាលគួរត្រៀមខ្លួនទុកជាមុននៅក្នុងការជំរុញការដាំដុះបន្ថែម តាមតំបន់ ទីកន្លែង តាមប្រភេទបន្លែ ដើម្បីធានាថា ប្រជាពលរដ្ឋកម្ពុជាមានបន្លែបរិភោគគ្រប់រដូវការ គ្រប់ស្ថានការណ៍។
សូមជម្រាបជូនថា កម្ពុជាបានចំណាយថវិកាជាង២០០លានដុល្លារក្នុងមួយឆ្នាំ សម្រាប់នាំចូលបន្លែផ្គត់ផ្គង់ទីផ្សារក្នុងស្រុក ហើយកម្ពុជាមានតម្រូវការបន្លែប្រមាណ៥៧៣តោនក្នុង១ថ្ងៃ ដែលចំនួននេះ កសិករកម្ពុជាអាចផលិតបានប្រមាណ៤០០តោន និងសល់ពីនេះនាំចូល១៧០តោន ពីប្រទេសវៀតណាម ថៃ និងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ