អតីតបក្សប្រឆាំងហៅការកោះហៅលោកសម រង្សី និងមន្រ្តីដទៃទៀតថា ជាសង្គ្រាមចិត្តសាស្រ្តរបស់លោកហ៊ុន សែន
ចុះផ្សាយនៅថ្ងៃ៖
អតីតគណបក្សសង្រ្គោះជាតិនៅព្រឹកថ្ងៃពុធ ទី០៤ ខែវិច្ឆិកានេះ បានប្រតិកម្មទៅនឹងការកោះហៅរបស់តុលាការក្រុងភ្នំពេញទៅលើលោកសម រង្ស៊ី និងមន្រ្តីនៃអតីតបក្សប្រឆាំងជិត៦០នាក់ផ្សេងទៀតឱ្យចូលមកតុលាការនៅថ្ងៃទី២៦ ខែវិច្ឆិកានេះ។ ពួកគេទាំងអស់នេះ ត្រូវបានចោទប្រកាន់ពីបទរួមគំនិតក្បត់ និងញុះញង់ឱ្យប្រព្រឹត្តបទឧក្រិដ្ឋជាអាទិ៍។ អតីតបក្សប្រឆាំង បានចាត់ទុកការកោះហៅនេះថា ជាសង្រ្គាមចិត្តសាស្រ្ត ដើម្បីបំភិតបំភ័យដល់សកម្មជនអតីតបក្សប្រឆាំងនៅក្នុងប្រទេសកម្ពុជា។
លោកអុំ សំអាន មន្រ្តីជាន់ខ្ពស់ និងតំណាងឱ្យអតីតគណបក្សសង្រ្គោះជាតិ បានអះអាងប្រាប់វិទ្យុបារាំងអន្តរជាតិថា ការកោះហៅរបស់តុលាការក្រុងភ្នំពេញមកលើថ្នាក់ដឹកនាំ និងមន្រ្តីអតីតបក្សប្រឆាំងនេះ គឺជាសង្រ្គាមចិត្តសាស្រ្ត និងជាល្បិចនយោបាយរបស់លោកនាយករដ្ឋមន្រ្តីហ៊ុន សែន។ បើតាមលោកអុំ សំអាន ការធ្វើបែបនេះ គឺដើម្បីបំភិតបំភ័យសកម្មជនអតីតបក្សប្រឆាំងនៅក្នុងស្រុកមិនឱ្យហ៊ានធ្វើសកម្មភាពផ្សេងៗដូចជា តវ៉ា និង ការត្រៀមខ្លួនទទួលការវិលត្រឡប់មកវិញរបស់លោកសម រង្ស៊ី និង មន្រ្តីជាន់ខ្ពស់ដទៃទៀត។
តុលាការក្រុងភ្នំពេញបានចេញដីកាកោះហៅលោកសម រង្ស៊ី និងមន្ត្រីដទៃទៀតប្រមាណជិត៦០នាក់ឱ្យចូលរួមក្នុងសវនាការនៅថ្ងៃទី ២៦ខែវិច្ឆិកាខាងមុខពាក់ព័ន្ធនឹងសំណុំរឿង«រួមគំនិតក្បត់» និង «ញុះញង់ឲ្យប្រព្រឹត្តបទល្មើសជាអាទិ៍»។ ដីកាកោះហៅនេះ ត្រូវបានអាជ្ញាធរកម្ពុជាយកទៅបិទលើជញ្ជាំងទីស្នាក់ការអតីតគណបក្សសង្គ្រោះជាតិក្នុងសង្កាត់ចាក់អង្រែក្រោម រាជធានីភ្នំពេញ។ អ្នកដែលត្រូវកោះហៅទាំងនេះ មានខ្លះកំពុងស្ថិតនៅក្រៅប្រទេសដូចជានៅអាមេរិក កាណាដា កូរ៉េខាងត្បូង ជប៉ុន និងប្រទេសថៃជាដើម។ រីឯ អ្នកផ្សេងទៀតកំពុងស្ថិតនៅក្នុងប្រទេស ដូចជានៅខេត្តកណ្តាល កំពង់ចាម ព្រះសីហនុ ព្រៃវែង តាកែវ កំពង់ស្ពឺ បាត់ដំបង និងបន្ទាយមានជ័យជាដើម។
មេធាវីការពារក្តីឱ្យមន្រ្តី និងសកម្មជនអតីតគណបក្សសង្រ្គោះជាតិ លោកសំ សុគង់ បានចាត់ទុកការចោទប្រកាន់ និងការកោះហៅនេះថា ជារឿងនយោបាយ។ ដូច្នេះហើយ លោកយល់ថា រឿងនេះគួរតែត្រូវដោះស្រាយតាមផ្លូវនយោបាយ ល្អជាងការដោះស្រាយគ្នាតាមផ្លូវតុលាការ។ លោកអុំ សំអាន ក៏យល់ឃើញដូចគ្នានេះដែរ។ ប៉ុន្តែ លោកថា ប្រសិនបើលោកនាយករដ្ឋមន្រ្តីហ៊ុន សែន ចង់ឱ្យក្រុមថ្នាក់ដឹកនាំ និងមន្រ្តីអតីតបក្សប្រឆាំងត្រូវតុលាការកាត់ទោសនោះ គឺលោកត្រូវដកបម្រាមដែលបានហាមក្រុមហ៊ុនអាកាសចរណ៍ដឹកថ្នាក់ដឹកនាំអតីតបក្សប្រឆាំងចូលមកកម្ពុជា និង ផ្តល់សុពលភាពឡើងវិញដល់លិខិតឆ្លងដែនរបស់មន្រ្តីអតីតបក្សប្រឆាំង។ ធ្វើបែបនេះ ថ្នាក់ដឹកនាំ និងមន្រ្តីនៃអតីតបក្សប្រឆាំងនឹងអាចមកចូលរួមសវនាការតាមការកោះហៅរបស់តុលាការកម្ពុជាបាន។
សូមបញ្ជាក់ថា សាលាដំបូងរាជធានីភ្នំពេញកាលពីថ្ងៃទី២០ ខែតុលាកន្លងទៅ ក៏បានចេញដីកាបង្គាប់ឱ្យថ្នាក់ដឹកនាំអតីតគណបក្សសង្រ្គោះជាតិដែលកំពុងស្នាក់នៅក្រៅប្រទេសចំនួន៩រូបឱ្យចូលមកបំភ្លឺនៅតុលាការនៅថ្ងៃទី១១ ខែវិច្ឆិកាខាងមុខនេះផងដែរ។ តុលាការបានកោះហៅពួកគេឱ្យមកឆ្លើយបំភ្លឺនឹងការចោទប្រកាន់លើសំណុំរឿង «ឧបឃាត»ឬ «ប៉ុនប៉ងធ្វើរដ្ឋប្រហារ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ