ផលិតផលក្លែងក្លាយ៥រយតោន ត្រូវបានដុតបំផ្លាញចោល
ចុះផ្សាយនៅថ្ងៃ៖
ផលិតផលក្លែងក្លាយដែលអាចបង្កគ្រោះថ្នាក់ដល់សុខភាពប្រជាជនកម្ពុជា សរុបជាង ៥រយតោន ត្រូវបានដុតបំផ្លាញចោល នៅព្រឹកថ្ងៃទី០៥ ខែវិច្ឆិកានេះ។ ជាផលិតផល ដែលកម្លាំងសមត្ថកិច្ចចម្រុះនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ បានបង្ក្រាប និងរឹបអូសបាន នាពេលកន្លងមក។ នេះបើតាមសេចក្តីប្រកាសរបស់ក្រសួងមហាផ្ទៃ។
គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ជ.ក) បានដុតបំផ្លាញចោលនូវផលិតផលខូចគុណភាពនិងក្លែងក្លាយ ដែលបង្កអោយមានគ្រោះថ្នាក់ដល់ប្រជាពលរដ្ឋ និងសុវត្ថិភាពសង្គម ជិត៥៤០តោន ដែលក្នុងនោះក៏មានឱសថខុសច្បាប់ចំនួនជិត ៨តោនផងដែរ។ ផលិតផលក្លែងក្លាយដែលសមត្ថកិច្ចបង្រ្កាបបាន រួមមាន ភេសជ្ជៈ ឱសថ និងផលិតផលមួយចំនួនទៀត។ ការកម្ទេចនេះធ្វើឡើងនៅក្នុងបរិវេណទីលានចាក់សំរាម ខណ្ឌដង្កោ រាជធានីភ្នំពេញ។
នៅចំពោះមុខនៃការបង្ក្រាបជាញឹកដងនេះ លោក កើត រិទ្ធ រដ្ឋមន្ត្រីយុត្តិធម៌ ក៏បានលើកឡើងនាឱកាសដែរនេះថា ការផលិត នាំចេញនាំចូល និងការចែកចាយផលិតផលខុសច្បាប់ទាំងនោះ គឺជាបទល្មើសធ្ងន់ធ្ងរ ដែលមិនត្រូវបានលើកលែងនោះឡើយ។ លោកបានបញ្ជាក់ថា យុទ្ធនាការបង្រ្កាបផលិតផលក្លែងក្លាយនេះ គឺជារឿងអទិភាពមួយដ៏សំខាន់ សម្រាប់បញ្ហាសុខភាពសាធារណៈ នៅកម្ពុជា។
ក្នុងរយៈពេលប្រាំបួនខែកន្លងមកនេះ ផលិតផលក្លែងក្លាយ រួមមានគ្រឿងញៀននិងឱសថខុសច្បាប់ផង សរុបជិត៦០០តោន ត្រូវបានរឹបអូស ក្នុងអំឡុងពេលបង្ក្រាបទូទាំងប្រទេស នេះបើយោងតាមរបាយការណ៍កាលពីខែតុលា។
ពាក់ព័ន្ធនឹងការបង្ក្រាបផលិតផលក្លែងក្លាយឥតឈប់ឈរនេះ លោក សន ជ័យ នាយកអង្គការ សម្ព័ន្ធគណនេយ្យភាពសង្គមកម្ពុជា ហៅកាត់ថា អានសា (ANSA) បានលើកឡើងថាសកម្មភាពបង្ក្រាបកន្លងមក គឺជាការខិតខំប្រឹងប្រែងមួយរបស់រដ្ឋាភិបាល ប៉ុន្តែបើតាមការសង្កេតរបស់លោក គឺជាសកម្មភាពដដែល និងគ្មានប្រសិទ្ធភាព ខណៈការអនុវត្តត្រួតពិនិត្យរបស់អាជ្ញាធរនៅមានចន្លោះប្រហោង។
សូមបញ្ជាក់ផងដែរថា គណៈកម្មាធិការប្រយុទ្ធប្រឆាំងផលិតផលក្លែងក្លាយ បានធ្វើការដុតបំផ្លាញផលិតក្លែងក្លាយទូទៅ រួមមានឱសថ ប្រមាណជាជាង ១៣០តោន នៅក្នុងខែមិថុនា និងប្រមាណជា ១១០តោនទៀត នៅក្នុងខែកុម្ភៈនិងខែមិនា។
កន្លងមកនេះ គណៈកម្មាធិការប្រយុទ្ធប្រឆាំងផលិតផលក្លែងក្លាយបានធ្វើយុទ្ធនាការបង្ក្រាបផលិតផលក្លែងក្លាយទូទាំងប្រទេសចំនួន ១៣៤ករណីដែលឈានដល់ការរឹបអូសផលិតផលក្លែងក្លាយចំនួន ជាង៦ម៉ឺនតោន (៥៩៤.៦៥តោន)។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ