អានតួអត្ថបទ
កម្ពុជា-សង្គម

ទឹកជំនន់៖ ផ្លូវនៅជនបទប្រមាណជាង៥០០ខ្សែ នឹងត្រូវបានជួសជុលដោយប្រើទឹកប្រាក់ជាង៦០លានដុល្លារ

អ្នកភូមិធ្វើដំណើរក្បែរទំនប់ស្ទឹងព្រែកត្នោតបន្ទាប់ពីវាត្រូវបានជន់លិចបន្ទាប់ពីមានភ្លៀងថ្មីៗនេះនៅជាយក្រុងភ្នំពេញប្រទេសកម្ពុជានៅថ្ងៃពុធទី ១៤ ខែតុលាឆ្នាំ២០២០។
អ្នកភូមិធ្វើដំណើរក្បែរទំនប់ស្ទឹងព្រែកត្នោតបន្ទាប់ពីវាត្រូវបានជន់លិចបន្ទាប់ពីមានភ្លៀងថ្មីៗនេះនៅជាយក្រុងភ្នំពេញប្រទេសកម្ពុជានៅថ្ងៃពុធទី ១៤ ខែតុលាឆ្នាំ២០២០។ AP - Heng Sinith
ដោយ៖ អោ ស្រីពេជ្រ
១៣ នាទី

ផ្លូវ​តាម​ទី​ជនបទដែលត្រូវបានខូចខាតដោយវិបត្តិទឹកជំនន់​​កន្លងទៅ​ ប្រមាណ​ជាង​៥០០ខ្សែ​ នឹងត្រូវបានជួសជុល​ ក្រោម​ការចំណាយ​ទឹកប្រាក់ជាង ៦០​លាន​ដុល្លារអាមេរិក។ នេះ​បើតាម​ការប៉ាន់ស្មាន​ជាបឋម​របស់​ក្រសួង​​អភិវឌ្ឍជនបទ​។

ផ្សាយពាណិជ្ជកម្ម

​ក្រោយពីស្ថានភាពទឹកជំនន់បានធូរស្រាល ផ្លូវ​នៅតាម​ទីជនបទ​ត្រូវទទួលរងការខូចខាត​យ៉ាងធ្ងន់ធ្ងរ​ ដោយការលិច​ និងរហូតដល់​​កាត់ផ្តាច់ផ្លូវ​ផងក៏មាន។ ផ្លូវដែលរងការខូចខាតនោះ​ មានសរុប​ចំនួន​​ ៥៥៣​ខ្សែ ស្មើ​​​​​ប្រវែងជាង​​ ៤ពាន់គីឡូម៉ែត្រ (៤៥០២គីឡូម៉ែត្រ)​ ដែល​ក្នុងនោះ ផ្លូវដែល​រងការខូចខាតខ្លាំង​រហូតដល់ដាច់មាន​ជាង ​២ពាន់​គីឡូម៉ែត្រ (២៤៣៧គីឡូម៉ែត្រ​)។​ ផ្លូវទាំងនោះ​នឹងត្រូវ​បាន​​ស្តារឡើងវិញ​​​ ក្នុងទំហំទឹកប្រាក់​ ៦៥​លានដុល្លារអាមេរិក។  ​​នេះ​ជាការបញ្ជាក់របស់ លោក ចាន់ ដារ៉ុង អ្នកនាំពាក្យនៃក្រសួងអភិវឌ្ឍន៍ជនបទ តាមរយៈវិទ្យុបារាំងRFI នៅរសៀល ថ្ងៃទី០៦វិច្ឆិកា នេះ។

វិសាលភាព​ទឹកជំនន់​ បានគ្របដណ្តប់ និងផ្តល់​​ផលប៉ះពាល់កម្រិតខ្លាំងនិងមធ្យមនៅក្នុងខេត្តចំនួន​១៣ រួមមានខេត្តបន្ទាយ​មានជ័យ​ បាត់ដំបង ពោធិ៍សាត់ ប៉ៃលិន ព្រះសីហនុ សៀមរាប តាកែវ​ កំពង់ឆ្នាំង កណ្តាល កំពង់ចាម ​​កំពត មណ្ឌលគីរី និង​ខេត្តព្រះវិហារ​។  នេះបើយោងតាម​របាយការណ៍ចុងក្រោយរបស់ក្រសួង​អភិវឌ្ឍន៍ជនបទ​ គិត​ត្រឹម​ថ្ងៃទី​០៣ វិច្ឆិកានេះ។ ​

ទន្ទឹមនឹងនេះដែរ អ្នកនាំពាក្យក្រសួង​អភិវឌ្ឍន៍ជនបទ លោក ចាន់ ដារ៉ុង បាន​បញ្ជាក់ថា ​ចំនួនទឹកប្រាក់ប្រមាណជា​ង ៦៥លានដុល្លារអាមេរិកនោះ ជា​ការប៉ាន់ស្មានជាបឋម​ ដើម្បីស្តារផ្លូវ​​ជន​បទ​ដែល​ខូចខាត​ឡើងវិញ​ជា​​បន្ទាន់​​ ក៏ដូចជា​ដើម្បី​សម្រួលដល់​ចរាចររបស់​ប្រជាពលរដ្ឋ​​​ក្នុងការ​ប្រកប​មុខ​របរ​​រស់នៅប្រចាំថ្ងៃ​ឱ្យបាន​​ឆាប់រហ័ស​​។ លោកក៏បានបញ្ជាក់បន្ថែមដែរថា ក្នុង​ករណី លទ្ធភាពនៃថវិកាជាតិ​មិនអាច​ផ្តល់បានទៅតាមតម្រូវការ​ ​ក្រសួងអភិវឌ្ឍន៍ជនបទនឹង​ស្វែងរកថវិកា​ដែល​ខ្វះខាត​ពីដៃគូពាក់ព័ន្ធបន្ថែមទៀត​​។

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមថ្ងៃទី ២៧​ តុលា ទឹកជំនន់បានប៉ះពាល់ដល់ប្រជាពលរដ្ឋប្រមាណជិត ៦០ម៉ឺននាក់ (៥៩៩,៤២៨នាក់) រស់នៅ​ក្នុង​២០ខេត្តក្រុង ដោយ​ក្នុងនោះ សម្លាប់មនុស្ស៤៤នាក់។ ក្រៅពីនេះ លំនៅដ្ឋានរបស់ប្រជាពលរដ្ឋចំនួនជាង​ ១៣ម៉ឺនខ្នង​ (១៣៤,០០៣ខ្នង) សាលារៀនចំនួន ៩៥១ខ្នង​ ក៏ត្រូវ​បានរង​ផលប៉ះពាល់ដោយទឹកជំនន់ផងដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ