ក្រុមថ្នាក់ដឹកនាំបក្សប្រឆាំងប្រកាសជាថ្មីពីការធ្វើមាតុភូមិនិវត្តន៍ ខណៈតុលាការកម្ពុជាកោះហៅ

លោក សម រង្ស៊ី និងថ្នាក់ដឹនាំបក្សប្រឆាំង​ដែលនៅក្រៅប្រទេស
លោក សម រង្ស៊ី និងថ្នាក់ដឹនាំបក្សប្រឆាំង​ដែលនៅក្រៅប្រទេស © Sam Rainsy

ក្រុម​មេ​ដឹក​នាំ​គណ​បក្ស​ប្រឆាំង​ដែល​កំពុង​និរទេស​ខ្លួន​នៅ​ក្រៅ​ប្រទេស​បាន​ប្រកាស​ជា​ថ្មី​នៅថ្ងៃ​សៅរ៍នេះ​ពី​ផែន​ការ​ធ្វើ​មាតុភូមិ​និវត្តន៍​មក​កម្ពុជា​វិញ បន្ទាប់​ពី​ផែនការ​វិល​ត្រឡប់​កាលពី​ថ្ងៃ៩​វិច្ឆិកា​ឆ្នាំ​២០១៩​ត្រូវ​បាន​ខក​ខាន​។ ​ការ​ប្រកាស​វិល​ចូល​ស្រុក​របស់​អ្នក​នយោបាយ​និរទេស​ខ្លួន​នេះ​គឺ​បន្ទាប់​ពី​តុលាការ​កម្ពុជា​បាន​ចេញ​ដីកាកោះហៅ​ពួកគេ​ឲ្យ​ចូល​ខ្លួន​ក្នុង​សវការ​នៅ​ចុង​ខែវិច្ឆិកា​នេះ ក្រោមបទ​ចោទ​ប្រកាន់«រួមគំនិត​ក្បត់ ​និង​ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍​»ដែល​ជា​សំណុំ​រឿង​ចាស់​ពាក់ព័ន្ធ​នឹង​ផែនការ​វិលត្រឡប់​ចូល​ស្រុក​របស់​លោក​ សម​ រង្ស៊ី ​កាលពី​ឆ្នាំ​២០១៩។

ផ្សាយពាណិជ្ជកម្ម

លោក អេង ឆៃអ៊ាង អនុប្រធានអតីតគណបក្សសង្រ្គោះជាតិ​ដែល​កំពុងនៅ​ក្រៅប្រទេសបាន​ប្រាប់​វិទ្យុ​បារាំង​អន្តរជាតិ​RFIថា ដោយសារតែមានបទពិសោធន៍នៃផែនការធ្វើ​មាតុភូមិ​និវត្តន៍៩​វិច្ឆិកា​២០១៩ មិនបានជោគជ័យ ដូច្នេះការវិល​ចូល​ស្រុកវិញ​នៅពេល​ខាង​មុខ​លោក​សុំ​មិនប្រាប់​ពីពេល​វេលា​ជាក់លាក់ទេ។

 

តែការប្រកាសពីផែនការវិលចូលស្រុកវិញ​របស់​មន្ត្រីជាន់ខ្ពស់​បក្សប្រឆាំងនេះ គឺបន្ទាប់ពីតុលាការ​​ក្រុងភ្នំពេញ​ ចេញដីកា​កោះហៅ​ថ្នាក់ដឹកនាំ ​និង​សកម្មជនអតីត​បក្ស​សង្គ្រោះ​ជាតិ ​៥៩នាក់​ដែល​ភាគ​ច្រើន​កំពុង​​និរទេស​ខ្លួន​នៅ​ក្រៅ​ប្រទេស ឲ្យ​ចូលសវនាការនៅ​ថ្ងៃទី២៦ ​ខែវិច្ឆិកា​ ខាង​មុខ​នេះ​ ពាក់ព័ន្ធ​នឹង​បទ​ចោទ​​រួម​គំនិត​ក្បត់ ​និង​ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍។ គឺ​ជា​សំណុំរឿង​ចាស់​ពាក់ព័ន្ធ​នឹង​ផែន​ការ​វិលត្រឡប់​ចូល​ស្រុក​របស់​លោក​ សម​ រង្ស៊ី ​កាលពី​ឆ្នាំ​២០១៩។

សម្រាប់ លោក អេង ឆៃអ៊ាង ក៏ដូចជាលោក សម រង្ស៊ី បានសំដែងការភ្ញាក់​ផ្អើល​នៅពេល​តុលាការកោះហៅពួកគេ​ឲ្យទៅចូលសវនាការ​ប៉ុន្តែ​រដ្ឋាភិបាលកម្ពុជានៅតែបន្តហាមយន្តហោះមិនឲ្យដឹកមេដឹកនាំបក្សប្រឆាំងចូលកម្ពុជា រួមទាំងដកហូតលិខិត​ឆ្លង​ដែន​របស់មនុស្សមួយចំនួនទៀតផង។ តែលោក អេង ឆៃអ៊ាង អះអាងថា ​ពួកលោក​នឹង​ទៅសុំ​លិខិត​ឆ្លង​ដែន​ពីស្ថានទូត​ខ្មែរ​ប្រចាំ​នៅប្រទេសនីមួយៗនោះមកវិញ​។

យ៉ាងណាក៏ដោយសម្រាប់អ្នកវិភាគដូចជា​លោកបណ្ឌិត សេង សារី ការប្រកាស​វិល​ស្រុក​របស់​មេដឹកនាំ​បក្សប្រឆាំង មិនមែនជារឿងថ្មីទេ។ ប៉ុន្តែក្នុងករណី​ពួកគេអាចវិល​ចូលវិញបានគឺជាក្តីសង្ឈឹម​របស់​សកម្ម​ជន​នៅក្នុងស្រុក និងមិនឲ្យ​រដ្ឋាភិបាល​កម្ពុជាធ្វើអ្វីមួយស្រេចតែចិត្ត។ ផ្ទុយមកវិញ លោកយល់ថា ការ​ចេញដីកា​កោះ​ហៅ​មេដឹកនាំនិងមន្ត្រីបក្សប្រឆាំងជិត៦០នាក់មកចូលសវនាការនៅពេលខាងមុខ អាចថាជាសញ្ញាភ្លើងខៀវរបស់​រដ្ឋាភិបាលក្នុងការបើកផ្លូវឲ្យមន្ត្រីបក្សប្រឆាំងចូលស្រុកវិញ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI