អតីតមន្ត្រីCNRPស្នើឲ្យរដ្ឋាភិបាលបញ្ចប់ការបំភិតបំភ័យលើអ្នកមិនជាប់ពាក់ព័ន្ធនយោបាយ
ចុះផ្សាយនៅថ្ងៃ៖
អតីតគណបក្សសង្គ្រោះជាតិ ស្នើឲ្យរដ្ឋាភិបាលកម្ពុជាបញ្ចប់ការបំភិតបំភ័យលើអ្នកមិនជាប់ពាក់ព័ន្ធនយោបាយ។ ការស្នើសុំនេះធ្វើនៅក្នុងវេទិកាស្ដីពីមាតុភូមិនិវត្តន៍ថ្នាក់ដឹកនាំអតីតគណបក្សសង្គ្រោះជាតិ នៅថ្ងៃទី៧វិច្ឆិកាម្សិលមិញ។
ការស្នើសុំរបស់ថ្នាក់ដឹកនាំ អតីតគណបក្សសង្គ្រោះជាតិ ឲ្យរដ្ឋាភិបាលបញ្ចប់ការបំភិតបំភ័យលើអ្នកមិនជាប់ពាក់ព័ន្ធនយោបាយ ធ្វើឡើងស្របពេលដែលពួកគេបារម្ភពីសុវត្ថិភាពក្រុមគ្រួសាររបស់ខ្លួននៅកម្ពុជា។ ក្ដីព្រួយបារម្ភនេះកើតមានឡើងបន្ទាប់ពី លោក ហ៊ុន សែន ធ្លាប់លើកឡើងជាសាធារណៈអំពីសុវត្ថិភាពក្រុមគ្រួសារលោក ហូរ វ៉ាន់ និងលោក អេង ឆៃអ៊ាង។
នៅចំពោះមុខការព្រួយបារម្ភពីសុវត្ថិភាពក្រុមគ្រួសាររបស់ខ្លួននៅកម្ពុជា លោក អេង ឆៃអ៊ាង អនុប្រធាននៃអតីតគណបក្សសង្គ្រោះជាតិបានឆ្លើយតបនឹងចម្ងល់លោកនាយករដ្ឋមន្ត្រី ហ៊ុន សែន ថា ហេតុអ្វីបានជាលោក ហូរ វ៉ាន់ និងលោក អេង ឆៃអ៊ាង មិនយកកូនប្រពន្ធទៅរស់នៅក្រៅប្រទេសជាមួយ។ សម្រាប់លោក អេង ឆៃអ៊ាង ប្រពន្ធកូនរបស់លោកមានសិទ្ធិពេញ ក្នុងការរស់នៅប្រទេសកម្ពុជាដូចពលរដ្ឋទូទៅដែរ។
ទោះជាបារម្ភខ្លាចមានការយាយីក្រោមរូបភាពណាមួយមកលើក្រុមគ្រួសាររបស់ខ្លួននៅកម្ពុជាក៏ដោយ លោក អេង ឆៃអ៊ាង បង្ហាញភាពជឿជាក់ថា ការដឹកនាំរបស់លោកនាយករដ្ឋមន្ត្រី ហ៊ុន សែន នឹងមិនបំភិតបំភ័យលើសមាជិកក្រុមគ្រួសារអ្នកនយោបាយនៃអតីតគណបក្សសង្គ្រោះជាតិឡើយ។ ប្រសិនបើមានការបំភិតបំភ័យណាមួយកើតមានឡើងលើក្រុមគ្រួសារមែននោះ លោក អេង ឆៃអ៊ាង អះអាងថា ស្ម័គ្រចូលពន្ធនាគារនៅកម្ពុជាជំនួសឲ្យតែរដ្ឋាភិបាលបើកជើងហោះសម្រាប់អ្នកនយោបាយមកពីអតីតគណបក្សសង្គ្រោះជាតិ។
គេនៅចាំបានថា រវាងគ្រួសារលោកអេង ឆៃអ៊ាង និងលោក ហូរ វ៉ាន់ លោកនាយករដ្ឋមន្រ្តីហ៊ុន សែន បានសង្កត់ធ្ងន់ទៅលើគ្រួសារលោកហូរ វ៉ាន់ ច្រើនជាងលោក អេង ឆៃអ៊ាង ។ នេះក៏ដោយសារតែលោក ហ៊ុន សែន ចោទលោក ហូរ វ៉ាន់ នៅពីក្រោយការធ្វើបាតុកម្មប្រឆាំងវត្តមានកងទ័ពចិននៅកម្ពុជា នៅមុខស្ថានទូតចិន និងអាមេរិកនៅទីក្រុងភ្នំពេញ។ ហើយក្នុងនោះពេលជាមួយគ្នានោះ លោកហ៊ុន សែន បានបញ្ជាដាច់ណាត់ឱ្យលោកហូរ វ៉ាន់ បញ្ឈប់សកម្មភាពរបស់ខ្លួនជាបន្ទាន់ បើគិតគូដល់សមាជិកគ្រួសាររបស់ខ្លួនដែលកំពុងរស់នៅកម្ពុជា។
បើតាមអ្នកវិភាគ រឿងរ៉ាវក្ដីក្ដាំរវាងលោកនាយករដ្ឋមន្ត្រី ហ៊ុន សែន និងមន្ត្រីអតីតគណបក្សសង្គ្រោះជាតិ ត្បិតតែមិនទាន់មានសមាជិកក្រុមគ្រួសាររបស់ពួកគេណាម្នាក់រងគ្រោះ តែសកម្មជនរបស់គណបក្សនេះភាគច្រើនបានរងគ្រោះជំនួសរួចទៅហើយក្រោមរូបភាពហិង្សាដោយមិនមានមូលហេតុ។ សង្គមស៊ីវិលធ្លាប់តាមដានរឿងនេះនិយាយថា មានសកម្មជនអតីតគណបក្សប្រឆាំងមិនក្រោម២០នាក់បានឡើយបានរងអំពើហិង្សាដោយមិនដឹងខ្លួនមុនរាប់ចាប់តាំងពីគណបក្សសង្គ្រោះជាតិត្រូវបានរំលាយនៅឆ្នាំ២០១៧ ហើយជនបង្ករមិនត្រូវបាននាំមកផ្តន្ទាទោសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ