លោក ស ខេង៖ ព័ត៌មានដែលប្រជាពលរដ្ឋប្រាប់លោកតាមហ្វេសប៊ុក គឺពិតស្ទើរ៩០%
ចុះផ្សាយនៅថ្ងៃ៖
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានថ្លែងកាលពីពេលថ្មីៗនេះថា ព័ត៌មានរបស់ប្រជាពលរដ្ឋ ដែលលោកទទួលបានតាមរយៈហ្វេសប៊ុក គឺស្ទើរតែ៩០% ជាព័ត៌មានពិត។ ការលើកឡើងរបស់លោក ស ខេង ដូច្នេះគឺបន្ទាប់ពីលោកបានបង្កើតក្រុមការងារតាមដានព័ត៌មានតាមហ្វេសប៊ុកមួយ ដើម្បីទទួលសំណើរ ចំងល់ និងបញ្ហាផ្សេងៗរបស់ប្រជាពលរដ្ឋពីមូលដ្ឋាន ហើយដោះស្រាយបញ្ហាដែលបានចោទឡើង ត្រលប់ទៅប្រជាពលរដ្ឋវិញ ប្រកបដោយប្រសិទ្ធភាព។
ក្រៅពីកត់សម្គាល់ថាព័ត៌មាន ដែលប្រជាពលរដ្ឋទាក់ទងទៅលោកតាមរយៈហ្វេសប៊ុកគឺពិតស្ទើរតែ៩០% នោះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបញ្ជាក់ថា ការផ្តល់ព័ត៌មានលើហ្វេសប៊ុកលោកគឺមិនមានការលែបខាយរឿងនយោបាយអ្វីទេ។ តាមលោក ស ខេង ហ្វេសប៊ុករបស់លោក គឺលោកទទួលដោះស្រាយតែរឿងរ៉ាវអយុត្តិធម៌ផ្សេងៗរបស់ប្រជាពលរដ្ឋ ហើយបើនិយាយរឿងផ្សេងពីនេះ លោកប្រាប់ឲ្យក្រុមការងារបិទគណនីអ្នកផ្ញើចូល។
លោក ស ខេង បានលើកយកឧទាហរណ៍មួយមកបង្ហាញថា កន្លងមកមានការបើកខារ៉ាអូខេ រាំរែកទល់ភ្លឺ ប្រជាពលរដ្ឋមិនបានដេកពួនទេ លុះដល់សមត្ថកិច្ចចុះទៅមើលគឺពិតប្រាកដមែន និងមានប្រើប្រាស់គ្រឿងញៀន រួមនឹងការគំរាមកំហែងនានាផងដែរ។ យន្តការការងារដូច្នេះ គឺមានប្រសិទ្ធភាព និងជួយដោះស្រាយបញ្ហាបានលឿន ខណៈរឿងរ៉ាវនានាត្រូវបានបែងចែកទៅឲ្យក្រុមការងារជំនាញដោះស្រាយ ហើយបញ្ហាមួយចំនួនទៀត ដែលស្ថិតក្នុងការស្រាវជ្រាវត្រូវបានដាក់ឲ្យដោះស្រាយបន្ត និងជូនដំណឹងទៅម្ចាស់បញ្ហាជាក្រោយ។ នេះបើតាមលោក ស ខេង។
ដោយឡែក លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លើកឡើងថាចំណាត់ការដោះស្រាយបញ្ហាផ្សេងៗរបស់ថ្នាក់លើ គឺជាការងាយស្រួលនៅពេលដែលទទួលបានដំណឹងពីប្រជាពលរដ្ឋពីការរំលោភបំពាននានា ជាពិសេសការបំពានរបស់មន្ត្រីថ្នាក់ក្រោមទៅលើប្រជាពលរដ្ឋ។ ក៏ប៉ុន្តែលោក សន ជ័យ បារម្ភថា ការឆ្លើយតបរបស់ថ្នាក់លើអាចជួបប្រទះនឹងករណី«ឆ្អឹងទទឹងក ឬបាតដៃក៏សាច់ ខ្នងដៃក៏សាច់»។
សូមបញ្ជាក់ថា ស្របតាមគោលការណ៍ e-Government រដ្ឋមន្ត្រីក្រសួងមហាផ្ទៃ កាលពីពេលថ្មីៗនេះ បានណែនាំឲ្យអគ្គនាយក និងគ្រប់អភិបាលខេត្តបើក Account ហ្វេសប៊ុក ដើម្បីត្រងយកមតិយោបល់របស់ប្រជាពលរដ្ឋ ទាក់ទងផ្ទាល់ជាមួយអាជ្ញាធរ ហើយដោះស្រាយត្រលប់ទៅពលរដ្ឋវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ