៨ខែដើមឆ្នាំ២០២០នេះ ទុនវិនិយោគឯកជននៅកម្ពុជា បានធ្លាក់ចុះ៥៧%
ចុះផ្សាយនៅថ្ងៃ៖
ទុនវិនិយោគក្នុងវិស័យវិនិយោគឯកជននៅកម្ពុជា នៅក្នុងរយៈពេល៨ខែដើមឆ្នាំ២០២០នេះ បានធ្លាក់ចុះប្រមាណជា៥៧% ធៀបនឹងរយៈពេលដូចគ្នាកាលពីឆ្នាំមុន។ យ៉ាងណាមិញ អ្នកជំនាញរំពឹងថា សេដ្ឋកិច្ចកម្ពុជានឹងត្រូវបានស្តារឡើងវិញក្នុងពេលឆាប់ៗ ខណៈដែលវិស័យនាំចេញទំនិញទៅទីផ្សារអន្តរជាតិមានភាពវិជ្ជមាន។
ក្នុងរយៈពេល៨ខែដើមឆ្នាំ២០២០នេះ គម្រោងវិនិយោគឯកជនសេដ្ឋកិច្ចក្រៅប្រព័ន្ធនៅកម្ពុជាធ្លាក់ចុះ ៥៧.១% ធៀបនឹងរយៈពេលដូចគ្នាឆ្នាំមុន ក្នុងទំហំទឹកប្រាក់វិនិយោគប្រមាណជាង ២៣០០ លានដុល្លារ នេះបើយោងតាមរបាយការណ៍និន្នាការសេដ្ឋកិច្ច-សង្គមរបស់ក្រសួងសេដ្ឋកិច្ចនិងហិរញ្ញវត្ថុ។ សូមបញ្ជាក់ថា ក្រុមប្រឹក្សាអភិវឌ្ឍកម្ពុជាបានធ្វើការអនុម័តចុះបញ្ជីដល់ក្រុមហ៊ុនវិនិយោគ រយៈពេល៨ខែឆ្នាំ២០២០នេះ មានចំនួន១១៣គម្រោង ដែលជាការធ្លាក់ចុះ២២គម្រោង (ធៀបនឹងរយៈពេលដូចគ្នាឆ្នាំមុន)។
ក្នុងបរិបទនៃវិបត្តិកូវីដ១៩ អនុប្រធានសភាពាណិជ្ជកម្មកម្ពុជា លោក លឹម ហេង មានគំនិតសុទិដ្ឋិនិយមថា សេដ្ឋកិច្ចកម្ពុជានឹងមិនរងផលប៉ះពាល់ធ្ងន់ធ្ងរនោះទេ បើទោះបីជាវិស័យវិនិយោគឯកជនមានការធ្លាក់ចុះក្នុងរយៈពេល៨ខែដើមឆ្នាំ២០២០នេះក៏ពិតមែន។ លោកបន្ថែមថា សេដ្ឋកិច្ចកម្ពុជានៅមានលក្ខណៈល្អប្រសើរនៅឡើយ តាមរយៈកំណើននៃការនាំចេញទំនិញទៅកាន់ទីផ្សារអន្តរជាតិ។
បន្ថែមពីនេះ លោក លឹម ហេង ក៏បានបញ្ជាក់ដែរថា សេដ្ឋកិច្ចកម្ពុជានឹងស្ទុះងើបឡើងវិញយ៉ាងលឿនក្នុងពេលខាងមុខ តាមរយៈកិច្ចព្រមព្រៀងសេដ្ឋកិច្ចសេរីពាណិជ្ជកម្មជាមួយបណ្តាប្រទេសនានា រួមមានចិន កូរ៉េ រុស្ស៊ី ក៏ដូចជាឥណ្ឌាដែលកំពុងធ្វើកិច្ចចរចារ។
សូមបញ្ជាក់ថា ការនាំចេញទំនិញពីកម្ពុជាទៅកាន់ទីផ្សារអន្តរជាតិរយៈពេល៩ខែឆ្នាំ២០២០នេះ មានការកើនឡើងជាង២០% ក្នុងទំហំទឹកប្រាក់ប្រមាណ១៤.១ពាន់លានដុល្លារ នេះបើតាមរបាយការណ៍នៃក្រសួងសេដ្ឋកិច្ច។ ក្នុងនោះទំនិញដែលមានកំណើននាំចេញខ្ពស់មានដូចជា អង្ករ (កើន២៣,១%), កង់ (កើន២៧%), គ្រឿងអគ្គិសនី (កើន២២,៣%), ផលិតផលកសិកម្ម សណ្តែក ចេក និងគ្រាប់ស្វាយចន្ទី (កើន២៣២.៣%) និងមាស (កើន៧១៦.៨%)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ