លោក ផៃ ស៊ីផាន៖ ការបញ្ចេញម៉ាសរបស់រដ្ឋាភិបាលចំនួន២លាន អាចទប់ស្កាត់ម៉ាសឡើងថ្លៃនៅទីផ្សារ
ចុះផ្សាយនៅថ្ងៃ៖
ក្រោយកើតមានព្រឹត្តការណ៍៣វិច្ឆិកា និងការរកឃើញថាមន្ត្រីកម្ពុជាបានឆ្លងកូវីដ១៩ ពីរដ្ឋមន្ត្រីការបរទេសហុងគ្រីកាលពីថ្ងៃទី៩វិច្ឆិកា តម្លៃម៉ាស់នៅលើទីផ្សារចាប់ផ្តើមហក់ខ្ពស់ឡើងវិញ។ ជាការទទូចដោយប្រមុខរដ្ឋាភិបាលកម្ពុជា លោក ហ៊ុន សែន នៅព្រឹកថ្ងៃទី១២វិច្ឆិកានេះ បានស្នើដល់ប្រជាពលរដ្ឋគ្រប់រូបពាក់ម៉ាសឲ្យបានត្រឹមត្រូវ និងថែមទាំងបានបញ្ជា បញ្ចេញម៉ាសចំនួន២លានម៉ាស សម្រាប់ចែកជូនប្រជាពលរដ្ឋ។ ការបញ្ចេញម៉ាសនេះ គឺអាចទប់ស្កាត់ការឡើងថ្លៃនៃតម្លៃម៉ាសនៅក្នុងទីផ្សារបាន នេះបើតាមលោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា។
នៅអំឡុងពេលមានឆ្លងជំងឺកូវីដ១៩ជាថ្មី តម្លៃម៉ាសនៅលើទីផ្សារចាប់ផ្តើមប្រែប្រួលនៅក្នុងរាជធានីភ្នំពេញ នាប៉ុន្មានថ្ងៃចុងក្រោយនេះ បន្ទាប់ពីក្រសួងសុខាភិបាលបានប្រកាសឲ្យប្រជាពលរដ្ឋមានការប្រុងប្រយ័ត្នខ្ពស់ចំពោះការឆ្លងមេរោគកូវីដ១៩ ក្រោយព្រឹត្តការណ៍៣វិច្ឆិកាមក។ តម្លៃម៉ាសបានស្ទុះឡើងស្ទើគុណជាពីរ ពីតម្លៃ៨ពាន់-១ម៉ឺនរៀលក្នុងមួយប្រអប់នៅថ្ងៃទី០៩វិច្ឆិកា ដល់១ម៉ឺន៦ពាន់-២ម៉ឺនរៀលក្នុងមួយប្រអប់នៅថ្ងៃទៅ១២ខែវិច្ឆិកានេះ ធៀបនឹងសប្តាហ៍មុន។
ជាថ្មីម្តងទៀត នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានណែនាំ ឲ្យប្រជាពលរដ្ឋគ្រប់រូបត្រូវពាក់ម៉ាស រក្សាគំលាត និងលាងដៃជាមួយសាប៊ូនិងអាកុលឱ្យបានត្រឹមត្រូវស្របតាមវិធានរបស់ក្រសួងសុខាភិបាល ក្នុងការទប់ស្កាត់ការឆ្លងជំងឺកូវីដចូលសហគមន៍។ បន្ថែមពីនេះ លោក នាយករដ្ឋមន្ត្រីក៏បានបញ្ជាឱ្យបញ្ចេញម៉ាសក្រណាត់ចំនួន២លានម៉ាស់ដើម្បីចែកជូនប្រជាជនក្រីក្រ និងអ្នកធ្វើដំណើរតាមដងផ្លូវដែលមិនបានពាក់ម៉ាស។ ជាការកត់សម្គាល់ ម៉ាសជាច្រើនត្រូវបានអាជ្ញាធរក្រុមភ្នំពេញចាប់ផ្តើមចែកជូនសាធារណៈជននៅថ្ងៃព្រហស្បតិ៍ទី១២វិច្ឆិកានេះ។
ឆ្លើយតបទៅនឹងការឡើងថ្លៃតម្លៃម៉ាសនេះ អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានថ្លែងប្រាប់វិទ្យុបារាំង RFI នៅថ្ងៃទី១២នេះថា រដ្ឋាភិបាលកម្ពុជាជឿជាក់ថា ការបញ្ចេញម៉ាសនៅពេលនេះ អាចទប់ស្កាត់ការឡើងថ្លៃនៃតម្លៃម៉ាសក្នុងទីផ្សារបាន។ លោក ក៏បានអំពាវនាវដែរថា កម្ពុជាទាមទារការសហការពីប្រជាពលរដ្ឋទូទៅ ក្នុងនោះមានអាជីវករផងនោះ ដើម្បីទប់ស្កាត់កុំឲ្យមានការឆ្លងចូលទៅក្នុងសហគមន៍។
លោក ផៃ ស៊ីផាន បានបញ្ជាក់ថា កន្លងមកក្រសួងសុខាភិបាលបានធ្វើការអប់រំណែនាំ និងក្រើនរំព្ញកម្តងហើយម្តងទៀតទៅកាន់អាជីវករលក់ម៉ាស ទឹកអាកុល ក៏ដូចជាជែលលាងដៃកុំឲ្យតម្លើងតម្លៃ ហើយប្រសិនបើពួកគេនៅតែបន្តសកម្មភាពតម្លើងតម្លៃទៀត ពួកគេអាចឈានដល់ការបិទអាជីវកម្មជាមិនខាន។
សូមជម្រាបជូនថា គិតត្រឹមខែឧសភាឆ្នាំ២០២០នេះ ម៉ាស់ចំនួន១១លានម៉ាស បានស្តុកទុកក្នុងឃ្លាំងយុទ្ធសាស្ត្រ ដើម្បីចែកជូនប្រជាពលរដ្ឋ ប្រសិនបើកម្ពុជាមានការរីករាលត្បាតជាទ្រង់ទ្រាយធំណាមួយ កើតឡើងជាយថាហេតុ នេះបើយោងតាមក្រសួងសុខាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ