ប្រមុខការទូតកម្ពុជា៖ ឧប្បត្តិហេតុនៃការចម្លងCovid-19 មិនអាចធ្វើឱ្យប៉ះពាល់ដល់ទំនាក់ទំនងទ្វេរភាគីកម្ពុជា-ហុងគ្រី
ចុះផ្សាយនៅថ្ងៃ៖
នៅថ្ងៃទី ១២ ខែវិច្ឆិកានេះ គឺចូលដល់ថ្ងៃទី១០ហើយ ដែលរដ្ឋមន្ត្រីការបរទេសកម្ពុជា លោក ប្រាក់ សុខុន បានទទួលជួបប្រាស្រ័យការងារជាមួយលោករដ្ឋមន្ត្រីការបរទេសហុងគ្រី Péter Szijjártó ដែលបានអញ្ជើញមកបំពេញទស្សនកិច្ចផ្លូវការនៅកម្ពុជា។ នៅថ្ងៃនេះ លោករដ្ឋមន្ត្រីការបរទេសកម្ពុជា បានបញ្ចេញសារមួយ ដោយបានថ្លែងការពាររដ្ឋមន្ត្រីការបរទេសហុងគ្រីដែលមកចម្លងជំងឺកូវីដ១៩ដល់មន្ត្រីកម្ពុជាពេលនេះថា គឺជាឧប្បត្តិហេតុ ហើយវាមិនអាចធ្វើអោយប៉ះពាល់ដល់ទំនាក់ទំនងការទូតនៃប្រទេសទាំងពីរឡើយ ខណៈរដ្ឋមន្រ្តីរូបនេះបានជួយប្រឆាំងនឹងការព្យួរប្រព័ន្ធអនុគ្រោះពន្ធ EBA ២០ភាគរយពីកម្ពុជា។
«គេមិនត្រូវភ្លេចទេថា លោក Szijjártóគឺជារដ្ឋមន្ត្រីការបរទេសនៃប្រទេសជាសមាជិកសហភាពអឺរ៉ុបមួយរូប ដែលតែងតែហ៊ានចេញមុខការពារយុត្តិធម៌ចំពោះកម្ពុជា។គាត់គឺជាអ្នកក្រោកឡើង បន្លឺសំលេងប្រឆាំងនឹងការជ្រៀតជ្រែកពីខាងក្រៅចូលកិច្ចការផ្ទៃក្នុងកម្ពុជា។ គាត់គឺជាអ្នកតវ៉ាប្រឆាំងនឹងការព្យួរភាពអនុគ្រោះពន្ធក្រោមក្របខ័ណ្ឌEBA 20% ពីកម្ពុជា»។ ទាំងនេះគឺជាសាររបស់ប្រមុខការទូតកម្ពុជាលោក ប្រាក់ សុខុន នៅថ្ងៃទី ១២ វិច្ឆិកានេះ ដោយបានចាត់ទុកថា «ឧប្បត្តិហេតុនៃការចម្លងCovid-19 នៅកម្ពុជាពេលនេះ មិនអាចធ្វើឱ្យប៉ះពាល់ ឬសាបរលាបបំណងល្អ សេចក្តីថ្លៃថ្នូរ ដែលដិតដានដោយមិត្តភាពជ្រាលជ្រៅនៃដំណើរទស្សនកិច្ចរបស់លោក Szijjártóដែលបាននាំមកនូវផលចំណេញដល់ទំនាក់ទំនងទ្វេភាគីរបស់យើងនោះទេ»។
គួរជំរាបជូនថា ការចេញមុខមកការពាររដ្ឋមន្ត្រីការបរទេសហុងគ្រីរូបនេះ គឺបន្ទាប់ពីមានការអត្ថាធិប្បាយចម្រុះជុំវិញដំណើរទស្សនកិច្ចរបស់លោកនៅកម្ពុជាដែលបានចម្លងជំងឺកូវីដ១៩ដល់មន្ត្រីជាន់ខ្ពស់កម្ពុជាពីររូប និងអង្គរក្សមួយរូប ខណៈអ្នកពាក់ព័ន្ធព្រឹត្តិការណ៍ ៣ វិច្ឆិកា ជាង១ពាន់នាក់ត្រូវបានយកសំណាកទៅធ្វើតេស្តក្នុងនោះក៏មានលោកនាយករដ្ឋមន្ត្រី ហ៊ុន សែន និងភរិយាផងដែរ។ ប៉ុន្តែរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ដែលពេលនេះកំពុងដាក់ខ្លួនអោយនៅដាច់ដោយឡែកនៅក្នុងផ្ទះដែលនោះ បានលើកឡើងក្នុងទំព័រហ្វេសប៊ុករបស់លោកនៅថ្ងៃព្រហស្បតិ៍នេះថា តាមរយៈការសន្ទនាតាមទូរសព្ទ លោករដ្ឋមន្ត្រីការបរទេសហុងគ្រី Péter Szijjártó បានបង្ហាញការសោកស្តាយយ៉ាងខ្លាំង និងបានផ្ញើនូវសុំអភ័យទោសដែលលោកបានបង្កផលលំបាកដល់កម្ពុជា ពាក់ព័ន្ធនឹងការចម្លងជំងឺកូវីដ១៩នេះ។ លោក ប្រាក់ សុខុន បានបន្តថា រដ្ឋមន្ត្រីការបរទេសហុងគ្រីបានអះអាងសារជាថ្មីថា ពេលលោកបានធ្វើតេស្តមុនពេលលោកចេញដំណើរមកកម្ពុជា លទ្ធផលពេលនោះ គឺអវិជ្ជមាន។ តែយ៉ាងណាលោកថា រូបលោក Péter Szijjártó ត្រូវបានផ្សព្វផ្សាយយ៉ាងល្បីល្បាញក្នុងបណ្តាញសង្គមនៅកម្ពុជា និងមានការធ្វើអត្ថាធិប្បាយបែបចម្រុះ ស្តីពី ដំណើរទស្សនកិច្ចរបស់គាត់មកភ្នំពេញនេះ។
ដោយឡែក ទាក់ទងនឹងស្ថានភាពសុខភាពរបស់លោកផ្ទាល់វិញ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជាបានអោយដឹងថា គិតមកដល់ថ្ងៃទី ១២ វិច្ឆិកានេះ គឺមានរយៈពេល១០ថ្ងៃមកហើយ ដែលលោកបានទទួលជួបប្រាស្រ័យការងារជាមួយរដ្ឋមន្ត្រីការបរទេសហុងគ្រីដែលបានមកបំពេញទស្សនកិច្ចផ្លូវការនៅកម្ពុជា កាលពីថ្ងៃទី០៣ ខែវិច្ឆិកា ហើយបច្ចុប្បន្នស្ថានភាពសុខភាពរបស់លោកមានសភាពល្អធម្មតា និងមានលទ្ធផលតេស្តអវិជ្ជមានវីរុសកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ