កម្ពុជា និងជប៉ុន ដាក់ទិសដៅ៥ឆ្នាំជួយពលរដ្ឋខ្មែរឲ្យចេះដាំបន្លែតាមបែបទំនើប ដើម្បីផ្គត់ផ្គង់វិស័យទេសចរណ៍
ចុះផ្សាយនៅថ្ងៃ៖
ក្រសួងទេសចរណ៍ និងក្រុមហ៊ុនជប៉ុន មួយបានចុះអនុស្សរណៈនៃការយោគយល់គ្នា កាលពីម្សិលមិញ ស្ដីពីការអភិវឌ្ឍខ្សែក្រវាត់បៃតងក្នុងវិស័យទេសចរណ៍ ដើម្បីជួយកសិករខ្មែរឲ្យចេះ ដាំបន្លែតាមបច្ចេកទេសទំនើបរបស់ជប៉ុន។ ជាកិច្ចសហការដើម្បីទទួលបានកសិផលដែលមានគុណភាព និងសុវត្ថិភាពខ្ពស់សម្រាប់យកទៅផ្គត់ផ្គង់តម្រូវការម្ហូបអាហារក្នុងវិស័យទេសចរណ៍នៅកម្ពុជា និងអាចឈានដល់ការនាំចេញទៅលក់នៅប្រទេសជប៉ុនទៀតផង។
អនុស្សរណៈនេះត្រូវបានចុះហត្ថលេខាដោយ លោក ថោង រដ្ឋស័ក្តិ អគ្គនាយកនៃអគ្គនាយកដ្ឋានសហប្រតិបត្តិការអន្តរជាតិ និងអភិវឌ្ឍន៍ផលិតផលទេសចរណ៍ និងលោក ណាបេស៊ីម៉ា កាតស៊ូហ៊ីតុ (Nabeshima Katsuhito) ប្រធានក្រុមហ៊ុនយ៉ាម៉ាតុហ្គ្រីន នាថ្ងៃទី១២ ខែវិច្ឆិកា ឆ្នាំ២០២០ ។
អនុស្សរណៈនេះផ្តោតលើគោលដៅបួនចំណុច រួមមាន ក្រវាត់បៃតងក្នុងវិស័យទេសចរណ៍ ឧស្សាហកម្មទេសចរណ៍ កសិទេសចរណ៍ និងទេសចរណ៍ជនបទ។ នេះបើតាមហ្វេសប៊ុកផ្លូវការរបស់ក្រសួងទេសចរណ៍។
បើតាមក្រសួងដដែល គោលបំណងនៃការចុះអនុស្សរណៈនេះគឺដើម្បីគាំទ្រលក្ខណៈបច្ចេកទេសដាំបន្លែដែលមានគុណភាព សុវត្ថិភាពខ្ពស់ (គ្មានជាតិគីមី) សម្រាប់ផ្គត់ផ្គង់ដល់តម្រូវការម្ហូបអាហារនៅតាមគោលដៅទេសចរណ៍នានាក្នុងប្រទេស និងអាចនាំចេញទៅលក់នៅប្រទេសជប៉ុនថែមទៀតផង។ កិច្ចការនេះក៏ជំរុញការយល់ដឹងទៅដល់ប្រជាកសិករកម្ពុជាឱ្យចេះដាំដុះ និងថែទាំបន្លែក្នុងផ្ទះកញ្ចក់ (Green House) តាមលក្ខណៈបច្ចេកទេសថ្មីដែលធានាបាននូវស្ដង់ដាគុណភាព និងសុវត្ថិភាពខ្ពស់។
គម្រោងនេះនឹងចាប់អនុវត្តចេញពីស្រុកបារាយណ៍ ខេត្តកំពង់ធំមុនគេបង្អស់ ដោយសារនៅភូមិសាស្ត្រស្រុកនេះសម្បូរទៅដល់ប្រព័ន្ធធារាសាស្ត្រ ដូចជា ស្ទឹងជីនិត ប្រឡាយមេ ប្រឡាយរង និងប្រឡាយស្រោចស្រពច្រើនខ្វាត់ខ្វែង។ ចេញពីខេត្តកំពង់ធំនេះទៅ គម្រោងអភិវឌ្ឍន៍នឹងបន្តអនុវត្តនៅទូទាំងប្រទេសកម្ពុជា។
បន្លែដែលនឹងដាំដុះដំបូងមាន ប្រមាណ ១០ មុខ ភាគច្រើនដែលជាបន្លែដាំលើដី រយៈពេលខ្លី និងអាស្រ័យទៅតាមតំបន់ដែលអំណោយផងដល់ដំណាំនីមួយៗ។
នៅពេលឈានដល់ការនាំចេញទៅប្រទេសជប៉ុន មុខបន្លែដែលត្រូវដាំ គឺជាបន្លែដែលប្រទេសជប៉ុនដាំដុះមិនបាន ឬនៅតាមរដូវ។ ឧទាហរណ៍ដូចជានៅរដូវត្រជាក់ខ្លាំង ប្រទេសជប៉ុនមិនអាចដាំប៉េងបោះបានឡើយ ប៉ុន្តែនៅកម្ពុជាអាចដាំដុះបាន ដូច្នេះដំណាំដែលប្រជាកសិករខ្មែរត្រូវដាំគឺប៉េងបោះ ហើយក្រុមហ៊ុននឹងជូនដំណឹងអំពីតម្រូវការនៅប្រទេសជប៉ុនប្រាប់ដល់កសិករខ្មែរ។
បើតាម លោក ណាបេស៊ីម៉ា កាតស៊ូហ៊ីតុ ក្រុមហ៊ុនយ៉ាម៉ាតុហ្គ្រីន រ៉ាប់រងលើការផលិត វេចខ្ចប់ និងចែកចាយនៅប្រទេសកម្ពុជា ព្រមទាំងអាចនាំចេញទៅក្រៅប្រទេស ពិសេសគឺប្រទេសជប៉ុន។ មូលហេតុដែលប្រជាជនជប៉ុនបានចាប់អារម្មណ៍ខ្លាំងលើបន្លែ និងដំណាំផ្សេងៗនៅកម្ពុជា គឺដោយសារតែមិនសូវប្រើជីគីមី ដែលពលរដ្ឋជប៉ុនមានការជឿទុកចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ