មូលដ្ឋានទ័ពជើងទឹករាម៖ កម្ពុជា-អាមេរិក ប៉ះសម្តីគ្នានៅក្នុងកិច្ចប្រជុំអាស៊ីបូព៌ាលើកទី១៥
ចុះផ្សាយនៅថ្ងៃ៖
សហរដ្ឋអាមេរិក នៅតែមានការព្រួយបារម្ភ ជុំវិញព័ត៌មានដែលថាកម្ពុជាធ្វើជាម្ចាស់ផ្ទះសម្រាប់កងទ័ពជើងទឹកបរទេសនៅឯមូលដ្ឋានកងទ័ពជើងទឹករាម។ នេះជាការអះអាងរបស់ទីប្រឹក្សាសន្តិសុខជាតិអាមេរិក ក្នុងកិច្ចប្រជុំកំពូលអាស៊ីបូព៌ាលើកទី១៥ កាលពីថ្ងៃម្សិលមិញ។ ភ្លាមៗនៅក្នុងកិច្ចប្រជុំនោះ កម្ពុជាបានធ្វើការឆ្លើយតបជាថ្មី ដោយលើកឡើងថា កម្ពុជាហាមដាច់ខាតនូវវត្តមានមូលដ្ឋានយោធាបរទេសនៅលើទឹកដីខ្លួន។
“សហរដ្ឋអាមេរិកក៏មានការព្រួយបារម្ភផងដែរអំពីផែនការរបស់កម្ពុជា នៅក្នុងការធ្វើជាម្ចាស់ផ្ទះ សម្រាប់កងទ័ពជើងទឹកបរទេស និងបុគ្គលិករបស់គេ នៅឯមូលដ្ឋានកងទ័ពជើងទឹករាម នៅឈូងសមុទ្រថៃ”។ នេះគឺជាការអះអាងរបស់លោក រ៉ូបឺត អូប្រាយអិន ជាទីប្រឹក្សាសន្តិសុខជាតិអាមេរិក នៅក្នុងកិច្ចប្រជុំកំពូលអាស៊ីបូព៌ាលើកទី១៥ ដែលបានធ្វើឡើងតាមប្រព័ន្ធវីដេអូ នាថ្ងៃទី១៤ ខែវិច្ឆិកា។ លោកបន្ថែមថា វត្តមានកងទ័ពជើងទឹកបរទេសនៅកម្ពុជានឹងធ្វើឲ្យប៉ះពាល់ដល់ដំណើរការ នៃការដោះស្រាយវិវាទដោយសន្តិវិធី ការលើកកម្ពស់សុវត្ថិភាពនាវាចរណ៍ និងសេរីភាពនៃការធ្វើនាវាចរណ៍ និងការហោះហើរនៅក្នុងតំបន់។
លោក អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីសេដ្ឋកិច្ច និងហិរញ្ញវត្ថុ ដែលបានចូលរួមក្នុងកិច្ចប្រជុំនោះ បានប្រតិកម្មតប និងបដិសេធចំពោះការចោទប្រកាន់របស់មន្ត្រីអាមេរិករូបនេះ។ នេះបើតាមសេចក្តីប្រកាសព័ត៌មាននៅថ្ងៃទី១៥ ខែវិច្ឆិកានេះ។
លោក អូន ព័ន្ធមុន្នីរ័ត្ន លើកឡើងថា លោកចាំបាច់ត្រូវតែឆ្លើយតបពីព្រោះការចោទប្រកាន់ម្ដងហើយម្ដងទៀត និងការផ្សព្វផ្សាយរឿង ដែលគ្មានមូលដ្ឋានបែបនេះ អាចធ្វើឲ្យអន្តរាយដល់ការជឿទុកចិត្តគ្នា និងបង្កអរិភាព រវាងប្រទេសកម្ពុជា និងប្រទេសក្នុងតំបន់។ លោកបន្ថែមថាកម្ពុជា គ្មាន ហើយថ្ងៃមុខក៏នឹងពុំមានដែរនៅមូលដ្ឋានយោធាបរទេសណាមួយ នៅលើទឹកដីរបស់ខ្លួន។
ការលើកឡើងរបស់មន្ត្រីអាមេរិកជាថ្មីនេះ គឺនៅបន្ទាប់ពីមានការវាយកម្ទេចអគារ ដែលជាជំនួយរបស់សហរដ្ឋអាមេរិក នៅមូលដ្ឋានទ័ពជើងទឹករាមក្នុងខេត្តព្រះសីហនុ។ លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជាធ្លាប់បានថ្លែងថា ការវាយកម្ទេចអគារនេះ ធ្វើឡើងក្នុងគោលបំណង ដើម្បីអភិវឌ្ឍមូលដ្ឋានទ័ពជើងទឹករាម ឲ្យសមស្របទៅតាមតម្រូវការជាក់ស្តែងរបស់ទីបញ្ជាការសន្តិសុខ លំហសមុទ្រកម្ពុជា។
លោក អូន ព័ន្ធមុន្នីរ័ត្ន រដ្ឋមន្ត្រីសេដ្ឋកិច្ច និងហិរញ្ញវត្ថុ ដែលជំនួសលោកនាយករដ្ឋមន្ត្រី ហ៊ុន សែន ចូលរួមក្នុងកិច្ចប្រជុំអាស៊ីបូព៌ាលើកទី១៥ បានពន្យល់ទៅកាន់មន្ត្រីអាមេរិកទៀតថា ក្នុងនាមជាប្រទេសមួយ ដែលមានអធិបតេយ្យ និងឯករាជ្យ បូរណភាពទឹកដីពេញលេញ ក្រោមការគ្រប់គ្រងរបស់រដ្ឋាភិបាលស្របច្បាប់ កម្ពុជាមានសិទ្ធិពេញលេញ ក្នុងការកែលំអរ មូលដ្ឋានកងទ័ពជើងទឹក កំពង់ផែ ឬហេដ្ឋារចនាសម្ព័ន្ធនាវាចរណ៍របស់ខ្លួន ដើម្បីបំពេញតម្រូវការក្នុងពេលបច្ចុប្បន្ន ស្របតាមរដ្ឋធម្មនុញ្ញរបស់កម្ពុជា។
លោកអះអាងបន្តថាដោយហេតុផលនេះហើយ ទើបមជ្ឈមណ្ឌលសមុទ្ររបស់កម្ពុជានៅឯមូលដ្ឋានទ័ពជើងទឹករាមត្រូវបានផ្លាស់ប្ដូរទៅទីតាំងថ្មី ប៉ុន្តែក៏នៅតែស្ថិតក្នុងតំបន់គម្រោងជាមួយគ្នាផ្ទុយស្រឡះពីការចោទប្រកាន់ ដែលថាមជ្ឈមណ្ឌលនេះត្រូវបិទចោល។ បើតាមលោក អូន ព័ន្ធមុនីរ័ត្ន កម្ពុជាស្វាគមន៍ចំពោះការផ្ដល់ជំនួយពីប្រទេសនានា រួមទាំងអាមេរិកផង ដរាបណាជំនួយនេះ មិនរារាំងកម្ពុជាក្នុងការអនុវត្តសិទ្ធិអធិបតេយ្យរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ