កម្ពុជា នយោបាយ

គណបក្ស​នយោបាយ​ចំនួនបី គ្រោង​បង្កើត​សម្ព័ន្ធភាព​អ្នក​ប្រជាធិបតេយ្យ​ខ្មែរ ដើម្បី​ចូលរួមការ​បោះ​ឆ្នោត

គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្សខ្មែរតែមួយ
គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្សខ្មែរតែមួយ © សហការី

គណបក្ស​នយោបាយ​ចំនួន​បី​ ​គឺ​គណបក្ស​សំបុកឃ្មុំ​សង្គមប្រជាធិបតេយ្យ​របស់​លោក​ម៉ម​ ​សូ​ណង់​ដូ ​គណបក្ស​ខ្មែរ​រួបរួម​ជាតិ​របស់​លោក​ ​ញឹក​ ​ប៊ុន​ឆៃ​ ​និង​គណបក្ស​ខ្មែរ​តែមួយ​របស់​លោក​ ​កែម​ ​រិទ្ធិ​សិត​ ​បាន​សម្រេច​ចង​ស​ម្ព័ន្ធ​ភាព​ជាមួយគ្នា​ ​ដើម្បី​ចូលរួម​ប្រកួតប្រជែង​នៅ​ក្នុង​ការបោះឆ្នោត​ឃុំ​សង្កាត់​នៅ​ឆ្នាំ​២០២២ ​និង​ការបោះឆ្នោត​ជាតិ​នៅ​ឆ្នាំ​២០២៣ខាងមុខ​។​ ​ស​ម្ព័ន្ធ​ភាព​នៃ​គណបក្ស​នយោបាយ​ទាំង​៣​នេះ​ ​មានឈ្មោះ​ថា​ ​«​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​ (​ស​.​ប​.​ខ​)​។

ផ្សាយពាណិជ្ជកម្ម

​បើ​តាម​គម្រោង​ ​«​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​(​ស​.​ប​.​ខ​) ​THE ​ALLIANCE​ OF ​KHMER​ ​DEMOCRATS (​A​.K.​D​)​»​នេះ​ ​នឹង​មាន​លោក​ ​ម៉ម​ ​សូ​ណង់​ដូ ​ប្រធាន​គណបក្ស​សំបុកឃ្មុំ​សង្គមប្រជាធិបតេយ្យ​ធ្វើជា​ប្រធាន​ ​និង​មាន​លោក​ ​ញឹក​ ​ប៊ុន​ឆៃ​ ​ប្រធាន​គណបក្ស​ខ្មែរ​រួបរួម​ជាតិ​ ​ជា​អនុប្រធាន​ ​និង​លោក​ គុ​ជ​ ​លី​ ​អនុប្រធាន​គណបក្ស​ខ្មែរ​តែមួយ​ ​ធ្វើជា​អគ្គលេខាធិការ​។​ ​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​នេះ​ ​បាន​ឆ្លងកាត់​ការពិភាក្សា​និង​ឯកភាព​គ្នា​រួចរាល់​ហើយ​លើ​លក្ខ​ន្តិកៈ​និង​គោល​នយោបាយ​នៃ​ស​ម្ព័ន្ធ​ភាព​រួចហើយ​ ​គឺ​នៅសល់​តែ​ការប្រកាស​ជា​ផ្លូវការ​តែប៉ុណ្ណោះ​។​ ​នេះ​បើ​តាម​ការ​បញ្ជាក់​ពី​តំណាង​គណបក្ស​នយោបាយ​ទាំង​៣​។​

 

ដោយឡែក​ ​បើ​តាម​ការ​បញ្ជាក់​ពី​លោក​ ​ម៉ម​ ​សូ​ណង់​ដូ ​ប្រធាន​គណបក្ស​សំបុកឃ្មុំ​សង្គមប្រជាធិបតេយ្យ​ ​ការ​បង្កើត​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​នេះ​ ​គឺ​នៅ​ក្នុង​គោលបំណង​បណ្តុះ​គំនិត​ជាតិនិយម​គំរូ​ថ្មី​មួយ​ ​ដើម្បី​យុវជន​ខ្មែរ​បន្តវេន​ ​ដោយ​គ្មាន​វប្បធម៌​លាប​ពណ៌​ ​និង​គ្មាន​វប្បធម៌​ក្តិច​ត្រួយ​។​ ​ហើយ​គណបក្ស​នយោបាយ​ទាំង​បី​ ​មាន​គោលដៅ​ដូចគ្នា​ ​គឺ​រឹតចំណង​សាមគ្គីភាព​ ​ដើម្បី​ការ​ធ្វើ​កិច្ច​សហប្រតិបត្តិការ​សម្រាប់​ការបោះឆ្នោត​ក្រុមប្រឹក្សា​ឃុំ​-​សង្កាត់​ ​នៅ​ឆ្នាំ​២​០​២​២​ ​និង​ការបោះឆ្នោត​ជាតិ​ជ្រើសតាំង​តំណាងរាស្ត្រ​អាណត្តិ​ទី​៧​ ​នៅ​ឆ្នាំ​២​០​២​៣​។​ ​យ៉ាងណាក្តី​ ​ការ​ចង​ស​ម្ព័ន្ធ​ភាព​នេះ​ ​គឺ​គណបក្ស​នយោបាយ​ទាំង​បី​ ​មិន​ច្របាច់​បញ្ចូល​គ្នា​នោះ​ទេ​ ​ដោយ​គណបក្ស​នយោបាយ​នីមួយៗ​ ​រក្សាទុក​នៅ​ដដែល​។​ ​ការ​ធ្វើ​បែប​នេះ​ ​គឺ​ដើម្បី​បើកចំហ​រ​ឲ្យ​គណបក្ស​នយោបាយ​ផ្សេងទៀត​ ​អាច​ចូលរួម​នៅ​ក្នុង​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​នេះ​បាន​។​ ​នេះ​បើ​តាម​ការ​បញ្ជាក់​បន្ថែម​ពី​លោក​ ​ម៉ម​ ​សូ​ណង់​ដូ​។​

 

គួរ​ជំរាប​ជូន​ថា​ ​បើ​តាម​គម្រោង​ ​ស​ម្ព័ន្ធ​ភាព​អ្នក​ប្រជាធិបតេយ្យ​ខ្មែរ​នេះ​ ​គ្រោង​នឹង​ប្រកាស​ជា​ផ្លូវការ​នៅដើម​ខែវិច្ឆិកា​នេះ​ ​ក៏ប៉ុន្តែ​ដោយសារតែ​បញ្ហា​ជំងឺ​កូ​វី​ដ​១​៩​ ​គម្រោង​ប្រកាស​បង្កើត​ស​ម្ព័ន្ធ​ភាព​៣​គណបក្ស​នយោបាយ​នេះ​ ​ត្រូវ​ព​ន្យា​ពេល​រហូតដល់​ដើមខែ​ធ្នូ​ ​ឆ្នាំ​២០២០ ​ខាងមុខ​៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI