ក្រុមហ៊ុន KrisEnergy ស្នើសុំពន្យារពេលបូមប្រេងនៅកម្ពុជាដោយសារតែកូវីដ១៩
ចុះផ្សាយនៅថ្ងៃ៖
ក្រុមហ៊ុន KrisEnergy កាលពីថ្ងៃទី១១វិច្ឆិកា បានស្នើសុំរដ្ឋាភិបាលកម្ពុជាពន្យារពេលបូមប្រេងជាលើកដំបូងនៅកម្ពុជា ដែលតាមផែនការគ្រោងបូមនៅថ្ងៃទី៣១ធ្នូឆ្នាំ២០២០នេះ។ មូលហេតុដែលក្រុមហ៊ុនរបស់សិង្ហបុរីមួយនេះ ពន្យារពេលម្តងហើយម្តងទៀត ក្នុងការទាញយកតំណក់ប្រេងជាលើកដំបូងរបស់កម្ពុជានៅពេលនេះគឺក្រុមហ៊ុនសំអាងថាមកពីបញ្ហាកូវីដ១៩នៅមិនទាន់ចប់។
បើយោងតាមកិច្ចសន្យា ការទាញយកតំណក់ជាលើកដំបូងគួរតែផលិតបានតាំងតែ ខែមិថុនា ឆ្នាំ២០២០ នេះ មកម្លេះ តែដោយសារវិបត្តិកូវីដ១៩ រដ្ឋាភិបាលកម្ពុជាបានពន្យារឲ្យក្រុមហ៊ុនរហូតដល់ថ្ងៃទី ៣១តុលា។ បន្ទាប់មកទៀត ដោយសារភាពយឺតយ៉ាវនៅតែបន្ត រដ្ឋាភិបាលបានដាក់កំហិតថាបើបូមប្រេងមិនបាននៅថ្ងៃទី៣១ខែធ្នូ ២០២០ នេះទេ រដ្ឋអាចនឹងផ្អាកអាជ្ញាបណ្ណរុករកប្រេងរបស់ក្រុមហ៊ុននេះ ឬផាកជាពិន័យផ្សេងៗទៀត។
តែនៅក្រោមហេតុផលកូវីដ១៩នៅមិនទាន់ចប់ ក្រុមហ៊ុន KrisEnergy បានសុំពន្យារពេលបន្តទៀតរហូតដល់ខែមេសា ឆ្នាំ២០២១។ ប៉ុន្តែការអភិវឌ្ឍនៅតែបន្ត ដែលមានការដំឡើងស្ថានីយ៍ និងក្បាលអណ្តូងបូមប្រេងរួចរាល់នៅទីតាំងប្លុកអេ ខណៈការប៉ាន់ស្មាន អណ្ដូងប្រេងនេះនឹងអាចបូមប្រេងបានដល់ ៧,៥០០បារ៉ែលក្នុងមួយថ្ងៃ។
សូមបញ្ជាក់ថា ក្រុមហ៊ុន Kris Energy របស់សិង្ហបុរីនេះបានចុះកិច្ចព្រមព្រៀងជាមួយកម្ពុជា កាលពីឆ្នាំ ២០១៧ សម្រាប់ការអភិវឌ្ឍន៍ អណ្តូងប្រេងកាតនៅក្នុងប្លុង A នៃដែនសមុទ្រកម្ពុជា។ គឺបន្ទាប់ពីក្រុមហ៊ុនយក្សរបស់អាមេរិកឈ្មោះ Chevron បានដកខ្លួនចេញ។ ក្រុមហ៊ុន Kris Energy មានភាគហ៊ុន៩៥% ខណៈដែលរដ្ឋាភិបាលមានទុន៥%។
កាលពីក្រុមហ៊ុនChevronរបស់អាមេរិក កាន់កាប់អាជ្ញាប័ណ្ណរុករកប្រេង គេបានរកឃើញប្រេង និងឧស្ម័នហ្គាសនៅប្លុក A មាន៤អណ្តូងដែលស្ថិតនៅចម្ងាយ ១៦០ គីឡូម៉ែត្រពី កំពង់ផែខេត្តព្រះសីហនុ។
តែបើតាមមន្ត្រីក្រសួងរ៉ែ និងថាមពល កម្ពុជាមានអណ្តូងប្រេងដែលអាចធ្វើការសិក្សាស្រាវជ្រាវចំនួន២៥ប្លុក ក្នុងនោះនៅលើដីគោកចំនួន១៩ប្លុក និងនៅក្នុងទឹកមានចំនួន៦ប្លុក និង៤តំបន់ទៀតជាតំបន់ត្រួតគ្នាជាមួយប្រទេសថៃ។ ក្នុងចំណោមប្លុក ដែលកំណត់ឲ្យធ្វើការស្រាវជ្រាវទាំងអស់ មានតែប្លុកA មួយទេ ដែលមានកិច្ចព្រមព្រៀង និងកំពុងប្រតិបត្តិការស្វែងរុករកប្រេងកាត ដោយក្រុមហ៊ុនក្រុមហ៊ុន Kris Energy របស់សិង្ហបុរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ