លោកសម រង្ស៊ីចោទតុលាការកម្ពុជាថា រៀបចំកាត់ក្តីមន្រ្តី និងសកម្មជនអតីតបក្សប្រឆាំងដោយមិនគិតបញ្ហាឆ្លងកូវីដ១៩
ចុះផ្សាយនៅថ្ងៃ៖
ប្រធានស្តីទីអតីតគណបក្សសង្រ្គោះជាតិ លោកសម រង្ស៊ី នៅថ្ងៃពុធនេះបានចេញមកចោទប្រកាន់តុលាការសាលាដំបូងរាជធានីភ្នំពេញថា គ្រោងរៀបចំកាត់ក្តីលើមន្រ្តី និងសកម្មជនអតីតបក្សប្រឆាំងដោយមិនគិតពីបញ្ហាឆ្លងជំងឺកូវីដ១៩។ ការគ្រោងបើកសវនាការនេះ គឺខុសគ្នានឹងសវនាការសំណុំរឿងលោកកឹម សុខា ដែលត្រូវបានផ្អាកព្រោះតែបញ្ហាជំងឺឆ្លងមួយនេះ។ ការចោទប្រកាន់របស់លោកសម រង្ស៊ី នេះធ្វើឡើង បន្ទាប់ពីតុលាការក្រុងភ្នំពេញគ្រោងនឹងបើកសវនាការលើមន្រ្តី និងសកម្មជនអតីតបក្សប្រឆាំងនៅថ្ងៃទី២៥ និង ២៦ ខែវិច្ឆិកាខាងមុខនេះ។
តាមរយៈទំព័រហ្វេសប៊ុក លោកសម រង្ស៊ី ប្រធានស្តីទីអតីតគណបក្សសង្រ្គោះជាតិបានវាយប្រហារទៅលើតុលាការកម្ពុជាៗដែលលោកបានហៅជារើយៗ និងជាថ្មីម្តងទៀតនៅពេលនេះថា ជាអាយ៉ងរបស់លោកនាយករដ្ឋមន្រ្តីហ៊ុន សែន។ លោកសម រង្ស៊ី បានសម្តែងនូវការមិនយល់ពីចំណាត់ការរបស់តុលាការដែលគ្រោងបើកសវនាការលើមន្រ្តី និងសកម្មជនអតីតគណបក្សសង្រ្គោះជាតិនៅពេលខាងមុខនេះ។ ជាការបើកសវនាការដែលលោកសម រង្ស៊ី កត់សម្គាល់ថា ខុសពីសវនាការរបស់លោកកឹម សុខា ដែលត្រូវផ្អាកដោយសារតែខ្លាចឆ្លងរាលដាលនៃជំងឺកូវីដ១៩។
ជាមួយនឹងការលើកឡើងយ៉ាងដូច្នេះ លោកសម រង្ស៊ី ក៏បានចោទប្រកាន់លោកនាយករដ្ឋមន្រ្តីហ៊ុន សែន ថា បានបញ្ជាឱ្យតុលាការឈប់គិតពីបញ្ហាជំងឺកូវីដ-១៩ ទៀតហើយ ពីព្រោះអតីតគណបក្សសង្គ្រោះជាតិធ្វើឱ្យរូបលោកនាយរដ្ឋមន្រ្តីដេកមិនលក់។ អ្នកនាំពាក្យរបស់តុលាការសាលាដំបូងរាជធានីភ្នំពេញមិនអាចទាក់ទងសុំការបកស្រាយបាននោះទេចំពោះការចោទប្រកាន់របស់លោកសម រង្ស៊ីនេះ។
សូមបញ្ជាក់ថា នៅថ្ងៃទី២៦ ខែវិច្ឆិកាខាងមុខនេះ សាលាដំបូងរាជធានីភ្នំពេញនឹងបើកសវនាការសួរឆ្លើយលើមន្រ្តី និងសកម្មជនអតីតគណបក្សសង្រ្គោះជាតិជាង១០០នាក់ពាក់ព័ន្ធនឹងសំណុំរឿង«រួមគំនិតក្បត់» និង «ញុះញង់ឲ្យប្រព្រឹត្តបទល្មើសជាអាទិ៍»។ អ្នកទាំងជាង១០០នាក់នេះ គឺមានខ្លះកំពុងស្ថិតនៅក្រៅប្រទេសដូចជានៅអាមេរិក កាណាដា កូរ៉េខាងត្បូង ជប៉ុន និងប្រទេសថៃជាដើម ខណៈអ្នកផ្សេងទៀតកំពុងស្ថិតនៅក្នុងប្រទេសកម្ពុជា។ មុនសវនាការនេះមួយថ្ងៃ ពោល គឺនៅថ្ងៃ២៥ ខែវិច្ឆិកា តុលាការក៏នឹងបើកសវនាការលើមន្រ្តីជាន់ខ្ពស់អតីតបក្សប្រឆាំង៩រូបដោយចោទប្រកាន់លើសំណុំរឿង «ឧបឃាត»ឬ «ប៉ុនប៉ងធ្វើរដ្ឋប្រហារ»។
មេធាវីការពារក្តីឱ្យមន្រ្តី និងសកម្មជនអតីតគណបក្សសង្រ្គោះជាតិ លោកសំ សុគង់ ក៏បានសម្តែងនូវការបារម្ភពីបញ្ហាឆ្លងរាលដាលនៃជំងឺកូវីដ១៩នេះដែរនៅពេលមានការបើកសវនាការទ្រង់ទ្រាយមនុស្សច្រើនបែបនេះ។ ដូច្នេះហើយ លោកបានអះអាងថា នឹងស្នើតុលាការឱ្យលើកពេលសវនាការនេះ គឺក្នុងន័យការពារការឆ្លងរាលដាលនៃជំងឺកូវីដ១៩ផង និងសម្រាប់ទុកពេលការត្រៀមខ្លួនទាំងមេធាវីផង និងការរៀបចំខ្លួនរបស់មន្រ្តី និងសកម្មជនអតីតគណបក្សប្រឆាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ