អានតួអត្ថបទ
កម្ពុជា-សង្គម

កូវីដ១៩ទាញទម្លាក់កំណើនប្រាក់ចំណូលរបស់វិស័យធានារ៉ាប់រងនៅកម្ពុជា

រូបភាពតំណាង
រូបភាពតំណាង © Internet
ដោយ៖ អ៊ឹង ប៊ុនថន
១៥ នាទី

​បច្ចុប្បន្នភាព​ទី​ផ្សារ​ធានា​នា​រ៉ាប់រង​នៅ​កម្ពុជា​ក្នុង​ត្រីមាស​ទី​៣​ ​ឆ្នាំ​២​០​២​០​ ​នៅ​បន្ត​កើន​ឡើងជា​វិជ្ជមាន​ ​ប៉ុន្តែ​កំណើន​នេះ​មានការ​ថយ​ចុះ​ច្រើន​បើ​ធៀប​នឹង​រយៈពេល​ដូចគ្នា​កាលពីឆ្នាំមុន​ ​នោះ​ដោយសារតែ​នៅ​ឆ្នាំ​២​០​២​០​នេះ​មាន​បញ្ហា​កូ​វី​ដ​១​៩​។​ ​នេះ​បើ​តាម​សេចក្តីប្រកាស​របស់​សមាគម​ធានា​រ៉ាប់រង​កម្ពុជា​។​ ​ត្បិត​ទី​ផ្សារ​ធានា​រ៉ាប់រង​ទូទៅ​ ​និង​ទី​ផ្សារ​ធានា​រ៉ាប់រង​អាយុជីវិត​ ​នៅ​រក្សា​បាន​កំណើន​ក៏​ពិតមែន​ ​ប៉ុន្តែ​ទី​ផ្សារ​ធានា​រ៉ាប់រង​ខ្នាត​តូច​បាន​ធ្លាក់ចុះ​រហូតដល់​ជិត​២​២​%​។

ផ្សាយពាណិជ្ជកម្ម

គិតត្រឹមត្រីមាសទី៣ ឆ្នាំ២០២០នេះ បុព្វលាភរ៉ាប់រងសរុបរបស់ទីផ្សារធានារ៉ាប់រងសម្រេចបាន ១៨៦,៣ លានដុល្លារ កើនឡើង៨,២% ធៀបនឹងរយៈពេល​ដូចគ្នាឆ្នាំ២០១៩។ កំណើននេះ​ត្រូវបានរុញច្រានដោយ​​ទីផ្សារធានារ៉ាប់រងទូទៅ​ដែលមានកំណើន១៨,២% ខណៈទីផ្សារធានារ៉ាប់រងអាយុជីវិត មានកំ​ណើន ២,៨%។ ប៉ុន្តែជាមួយគ្នានោះ ធានារ៉ាប់រងខ្នាតតូចបានថយចុះរហូតដល់ជិត២២%។

បើតាមសេចក្តី​ប្រកាស​របស់​​សមាគមធានារ៉ាប់រង​កម្ពុជា ទីផ្សារធានារ៉ាប់រងទូទៅ ​នៅតែរក្សា​កំណើន​ខ្ពស់​គួរ​ឲ្យ​កត់​សំគាល់ ដោយ​សម្រេច​បាន​បុព្វលាភ​ដុល ចំនួន៨៧,៩លាន​ដុល្លារ​ក្នុង​ត្រីមាស​ទី​៣​ឆ្នាំ​២០២០​ គឺកើន​ឡើង​ខ្ពស់ជាងឆ្នាំ​២០១៩​ដែលសម្រេច​បាន៧៤,៤លាន​ដុល្លារ។ កំណើន​ធានារ៉ាប់រង​ដែល​​ខ្ពស់​ជាងគេ គឺវិស័យ​វិស្វកម្ម​មាន ៧៤,២% តាម​ពីក្រោយ​ដោយ​ធានារ៉ាប់រងលើ​នាវា ​យន្តហោះ ការដឹក​ជញ្ជូន​ទំនិញ(MAT)ដែល​មានកំណើន៣៥,៣%។ ជាមួយគ្នានោះ ធានារ៉ាប់​រង​សុខភាព​កើន​២១,៥% ធានារ៉ាប់​រង​ទ្រព្យ​សម្បត្តិ(អគ្គិភ័យ)កើន ១៥,៩% ធានារ៉ាប់រង​យាន្តយន្ត​កើន ​៧% និង​ធានារ៉ាប់រង​ផ្សេងៗ​កើន​១៥,១%។ ប៉ុន្តែធានារ៉ាប់រង​គ្រោះ​ថ្នាក់​បុគ្គលមានការ​ថយចុះ​៧,៥%។

ជារួមទីផ្សារធានារ៉ាប់រងអាយុជីវិត គិតត្រឹម​ត្រីមាសទី៣​​ឆ្នាំ២០២០នេះ មានកំណើនតិចតួចត្រឹមតែ​២,៨%​ដែល​ផ្ទុយ​ពី​លទ្ធផល​រយៈ​ពេល​ដូចគ្នាកាលពីពេលកន្លងទៅដែល​មាន​កំណើន​រហូត​ដល់​៤៩​%។​នេះ​បង្ហាញពីផលប៉ះពាល់ជាអវិជ្ជមានបណ្តាល​មកពីជំងឺរាតត្បាត​កូវីដ១៩​នៅលើ​ពិភពលោក។ កូវីដ​១៩​​នេះ​បាន​ធ្វើឲ្យ​ផលប៉ះពាល់​ធ្ងន់​ជាងគេគឺ​ធានារ៉ាប់រង​ខ្នាត​តូច ដែលមានការ​ថយចុះ​២១,៧% ពោលសម្រេច​បានតែ៤,១លានដុល្លារប៉ុណ្ណោះ។ ធានារ៉ាប់រង​ខ្នាត​តូចនេះ​ គឺសំដៅ​ធានារ៉ាប់រង​យាន្តយន្ត​ ធានារ៉ាប់​រង​សុខភាព និងធានារ៉ាប់រងអាយុជីវិតខ្នាតតូច។

គិតត្រឹមត្រីមាសទី៣ ឆ្នាំ​២០២០នេះ ទំហំទឹក​ប្រាក់​សរុប​ដែល​វិស័យ​ធានារ៉ាប់រង​ បានទូទាត់ជូន​អតិថិជនគឺមាន២១,៧លាន​ដុល្លារ ក្នុង​សំណង​ដែល​ទូទាត់​ដោយ​ក្រុម​ហ៊ុន​ធានារ៉ាប់រងទូទៅ​គឺខ្ពស់​ជាងគេ​មាន១៦,១លានដុល្លារ ខណៈធានារ៉ាប់រង​អាយុជីវិតមាន៤,៧លានដុល្លារ និង​ធានារ៉ាប់​រង​ខ្នាត​តូចមាន​​៧៥ម៉ឺន​ដុល្លារ។ នេះនៅមិនទាន់គិតបញ្ចូល​សំណងទៅលើផលប៉ះពាល់​ដោយសារទឹកជំនន់នៅឡើយ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ