គ.ជ.ប គ្រោងរៀបចំការបោះឆ្នោតសាកល្បងឆ្នាំ២០២១តាមប្រព័ន្ធអនឡាញ ក្រោមគម្រោងជំនួយពីជប៉ុន

គណៈកម្មាធិកាជាតិរៀបចំការបោះឆ្នោត (គ.ជ.ប) នឹងរៀបចំការបោះឆ្នោតសាកល្បងនៅឆ្នាំ២០២១ខាងមុខ តាមប្រព័ន្ធបច្ចេកវិទ្យាព័ត៌មាន។ ការបោះឆ្នោតនេះ នឹងរួមបញ្ចូលមានដូចជា ការចុះឈ្មោះគណបក្សនយោបាយ និងបេក្ខជន និងការបូកសរុបលទ្ធផលតាមប្រព័ន្ធអនឡាញ។

ការបូកសរុបលទ្ធផលតាមប្រព័ន្ធអនឡាញនេះរួមមាន ការបញ្ជូន និងទទួលលទ្ធផលបឋម ការបែងចែកអាសនៈគណបក្ស ព្រមទាំងការស្រង់ឈ្មោះបេក្ខភាពជាប់ឆ្នោត ក៏សុទ្ធសឹងតែប្រព្រឹត្តទៅតាមប្រព័ន្ធកុំព្យូទ័រទាំងអស់។

លោក ស៊ិក ប៊ុនហុក ប្រធានគ.ជ.ប បានលើកឡើងថា បើលទ្ធផលនៃការបោះឆ្នោតសាកល្បងឆ្នាំ២០២១នេះ ទទួលបានលទ្ធផលជោគជ័យ នោះគជបនឹងរៀបចំបោះឆ្នោតឆ្នាំ២០២២ និងការបោះឆ្នោតឆ្នាំ២០២៣ខាងមុខ តាមរយៈប្រព័ន្ធបច្ចេកវិទ្យានេះដែរ។ នេះបើតាមសេច​ក្តីប្រកាសព័ត៌មានរបស់គជប នៅថ្ងៃព្រហស្បតិ៍ ទី២៦វិច្ឆិកានេះ។

យ៉ាងណាមិញការរៀបចំបោះឆ្នោតតាមប្រព័ន្ធបច្ចេកវិទ្យា ទាមទារឲ្យមានការសហការនិងជំនួយទាំងផ្នែកសម្ភារៈ ទាំងផ្នែកបច្ចេកទេស។

លោកស្រី ហារូកូ កាម៉ី ប្រធានថ្មីនៃអង្គការJICAប្រចាំកម្ពុជា បានលើកឡើងថា អង្គការJICAបានទទួលសំណើជំនួយនេះតាំងពីខែសីហា ក៏ប៉ុន្តែដំណើរការនៃការផ្តល់ជំនួយត្រូវសិក្សាលម្អិតបន្ថែម និងរង់ចាំការសម្រេចពីរដ្ឋាភិបាលជប៉ុន ក្នុងការអនុវត្តនៃការរៀបចំការបោះឆ្នោតសាកល្បង តាមប្រព័ន្ធបច្ចេកវិទ្យាឆ្នាំ២០២១។

ទាក់ទងទៅនឹងគម្រោងរៀបចំការបោះឆ្នោតតាមអនឡាញនេះដែរ លោក កន សារ៉ាវង្ស មន្រ្តីអង្គការខុមហ្វ្រែល សម្តែងការស្វាគមន៍។ ស្វាគមន៍ដោយលោកយល់ថា គួរតែមានការរៀបចំធ្វើតាមអនឡាញ ចាប់តាំងពីការចុះឈ្មោះបោះឆ្នោត រហូតដល់ការបោះឆ្នោត ដោយមានការសិក្សាឲ្យបានច្បាស់លាស់ និងមានការចូលរួមទទួលធាតុចូលពីអ្នកពាក់ព័ន្ធ។

សូមបញ្ជាក់ផងដែរថា កាលពីម្សិលមិញនេះ គ.ជ.ប បានចេញនូវបញ្ជីឈ្មោះបោះឆ្នោតឆ្នាំ២០២០ មានចំនួនជិត៩លាននាក់ ហើយក្នុងនោះមានអ្នកត្រូវលុបឈ្មោះចេញពីការបោះឆ្នោតចំនួនជាង១៥ម៉ឺននាក់ ដោយហេតុថាពួកគេខ្លះបានទទួលមរណភាព ខ្លះផ្លាស់ទីលំនៅ ខ្លះចុះឈ្មោះលើសពីមួយកន្លែង និងខ្លះទៀតត្រូវបានដកហូតសិទ្ធិបោះឆ្នោតបណ្តោះអាសន្ន៕