អានតួអត្ថបទ
កូវីដ១៩

វិទ្យុបារាំងអន្តរជាតិផ្អាកការផ្សាយបណ្តោះអាសន្នក្រោយរកឃើញ​កូវីដ១៩​នៅអគារកាណាឌីយ៉ា

ស្ទូឌីយោវិទ្យុបារាំងអន្តរជាតិ នៅទីក្រុង​ប៉ារិស ប្រទេស​បារាំង
ស្ទូឌីយោវិទ្យុបារាំងអន្តរជាតិ នៅទីក្រុង​ប៉ារិស ប្រទេស​បារាំង RFI/Khmer
ដោយ៖ អ៊ឹម រចនា
៩ នាទី

វិទ្យុបារាំងអន្តរជាតិ​ខេមរភាសា ដែល​មាន​ការិយាល័យ​នៅ​ក្នុង​អគារ​កាណាឌីយ៉ា ត្រូវ​ផ្អាក​ការផ្សាយ​មួយរយៈ ចាប់ពីថ្ងៃ​ព្រហស្បតិ៍​នេះ​ ក្រោយ​ពី​អគារកាណាឌីយ៉ា​ត្រូវ​បាន​អាជ្ញាធរ​សម្រេច​បិទទ្វារ​ជា​បណ្តោះអាសន្ន បន្ទាប់​ពី​រកឃើញ​ករណីវិជ្ជមាន​កូវីដ១៩។ នៅក្នុងអំឡុងពេល​រង់ចាំ​ការបើក​ការិយាល័យ​នៅ​អគារ​កាណាឌីយ៉ានេះ វិទ្យុបារាំង​​នឹង​ផ្សាយ​ផ្ទាល់​ចេញ​ពី​ការិយាល័យ​ក្នុង​ទីក្រុង​ប៉ារិស នូវ​នាទី​ព័ត៌មានខ្លីៗ រយៈពេល​៣ ដង​ក្នុង​មួយថ្ងៃ គឺ​នៅម៉ោង ៥ ម៉ោង ៦ និង​ម៉ោង ៧ល្ងាច (ម៉ោងក្នុងប្រទេសកម្ពុជា)។

ផ្សាយពាណិជ្ជកម្ម

អគារពាណិជ្ជកម្មកាណាឌីយ៉ា ត្រូវបានក្រសួងសុខាភិបាលកម្ពុជាសម្រេចឱ្យបិទទ្វារជាបណ្តោះអាសន្ន នៅព្រឹកថ្ងៃព្រហស្បតិ៍នេះ បន្ទាប់ពីបុគ្គលិកជនជាតិខ្មែរម្នាក់បម្រើការងារនៅធនាគារចិន (Bank of China) ដែលមានទីតាំងនៅក្នុងអគាររកឃើញមានផ្ទុកជំងឺកូវីដ១៩។ បន្ទាប់ពីបិទអគារ​នេះ​រួច អាជ្ញាធរសុខាភិបាលកម្ពុជាបានតម្រូវឱ្យបុគ្គលិកធនាគារចិន​នៃ​អគារ​នេះទាំងអស់ ធ្វើតេស្តរកមេរោគកូវីដ១៩ ចំណែក​អ្នកពាក់ព័ន្ធដោយផ្ទាល់ និងដោយប្រយោលផ្សេងទៀតក៏ត្រូវបានសួរនាំ និង ត្រួតពិនិត្យតាមវិធានសុខាភិបាលផងដែរ។

រហូតមកដល់ពេលនេះ ក្រុមគ្រូពេទ្យ​ជំនាញរបស់កម្ពុជាកំពុងបន្តយកសំណាកអ្នកពាក់ព័ន្ធជាមួយបុរសជាតិខ្មែររូបនេះនៅក្នុងអគារកាណាឌីយ៉ា ដើម្បីយកទៅធ្វើតេស្តរកជំងឺកូវីដ១៩។

គួរ​បញ្ជាក់ដែរ​ថា ក្រៅពីអ្នកដែលពាក់ព័ន្ធនៅក្នុងអាគារកាណាឌីយ៉ា អតិថិជនចំនួនប្រមាណ៣៨នាក់ផ្សេងទៀតក៏បានពាក់ព័ន្ធនឹងអ្នកផ្ទុកជំងឺកូវីដ១៩នេះដែរ។ នេះបើតាមសេចក្តីជូនដំណឹងរបស់ធនាគារចិនសាខាភ្នំពេញ (BOC Phnom Penh Branch) ដែលចុះផ្សាយដោយសារព័ត៌មានចិនផ្សាយជាភាសាខ្មែរស៊ីស៊ីថាមន៍នៅរសៀលថ្ងៃនេះ។ ប៉ុន្តែធនាគារចិនសាខាភ្នំពេញបានគូសបញ្ជាក់ថា បុគ្គលិក​ជនជាតិខ្មែររូបនេះ បានពាក់ម៉ាសត្រឹមត្រូវពេលប្រាស្រ័យទាក់ទងគ្នាជាមួយនឹងអតិថិជនទាំង៣៨នាក់នេះ។ យ៉ាងណាក៏ដោយ បើតាមសារព័ត៌មានចិនដដែល ធនាគារចិននឹងទាក់ទងទៅកាន់អតិថិជនទាំងនោះ ដើម្បីជូនដំណឹងដល់ពួកគេអំពីបញ្ហានេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ