អានតួអត្ថបទ
កម្ពុជា-សហភាពអឺរ៉ុប

លោក សម រង្ស៊ី៖ជនផ្តាច់ការ និងជនខិលខូចនៅកម្ពុជានឹងទទួលទណ្ឌកម្ម ក្រោមច្បាប់ថ្មីរបស់អឺរ៉ុប

សហភាពអឺរ៉ុបប្រជុំគ្នាលើការអនុម័តច្បាប់ថ្មី ដូចលំនាំនឹងច្បាប់ Global Magnitsky Act របស់សហរដ្ឋអាមេរិក
សហភាពអឺរ៉ុបប្រជុំគ្នាលើការអនុម័តច្បាប់ថ្មី ដូចលំនាំនឹងច្បាប់ Global Magnitsky Act របស់សហរដ្ឋអាមេរិក © Internet
ដោយ៖ អ៊ឹង ប៊ុនថន
១២ នាទី

ប្រធាន​ស្តី​ទី​អតីត​បក្ស​ប្រឆាំង​បាន​ចាត់​ទុក​ថា​ជា​ដំណឹង​ល្អ​សម្រាប់​ពលរដ្ឋ​ខ្មែរ​ ខណៈ​ដែល​សហភាព​អឺរ៉ុប​បាន​សម្រេច​អនុម័ត​ច្បាប់​ថ្មី​មួយ​ដើម្បី​ដាក់​ទណ្ឌកម្ម​ទៅ​លើ​បុគ្គល​ និង​ក្រុមហ៊ុន​នានា ​ដែល​ជាប់​ពាក់​ព័ន្ធ​នឹង​ការ​រំលោភ​សិទ្ធិ​មនុស្ស​ធ្ងន់​ធ្ងរ។ បើ​តាម​លោក​ សម រង្ស៊ី ​ទាំង​ជន​ផ្តាច់ការ​ និង​ជន​ខិលខូច​នៅ​កម្ពុជា​នឹង​ទទួល​ទណ្ឌកម្ម​ ក្រោម​ច្បាប់​ថ្មី​នេះ​។ ប៉ុន្តែ​អ្នកនាំពាក្យ​រដ្ឋាភិបាល​កម្ពុជា​បានចាត់​ទុក​ច្បាប់ថ្មី​របស់​អឺរ៉ុប​ថា​សំដៅ​ទៅ​លើ​ប្រទេស​ចិន​ច្រើន​ជាង​កម្ពុជា។

ផ្សាយពាណិជ្ជកម្ម

ដោយភ្ជាប់​នឹងឱកាសទិវាសិទ្ធិមនុស្សអន្តរជាតិ ថ្ងៃ ១០ ធ្នូ ២០២០ លោក សម រង្ស៊ី បាន​អះអាងថា ការ​ដែល​សហភាព​អឺរ៉ុប​​អនុម័ត​ច្បាប់​ថ្មី​មួយនៅសប្តាហ៍នេះ គឺជាដំណឹងល្អ សម្រាប់ប្រ​ទេស​​កម្ពុជា ដែលលោក​មានជំនឿកាន់តែខ្លាំងថាប្រជារាស្ត្រខ្មែរ នឹងទទួលបានសេរីភាព យុត្តិធម៌ និងលទ្ធិប្រជាធិបតេយ្យ ក្នុងរយៈពេលដ៏ខ្លីខាងមុខ។

ការលើកឡើងបែបនេះ​របស់​ប្រធានស្តីទីអតីតបក្សប្រឆាំង គឺបន្ទាប់ពីសហភាព​អឺរ៉ុបចំនួន២៧ ប្រទេស ​​បាន​អនុម័ត​ច្បាប់​ជាលើកទី១​​របស់​ខ្លួន ប្រហាក់​ប្រហែល​គ្នា​នឹង​ច្បាប់ (Global Magnitsky Act ) របស់​សហរដ្ឋអាមេរិក​ដែរ ដើម្បី​ដាក់​ទណ្ឌកម្ម​ទៅ​លើ​បុគ្គល​ និង​ក្រុមហ៊ុន​នានា ដែលជាប់​ពាក់​ព័ន្ធ​នឹង​ការ​រំលោភ​សិទ្ធិ​មនុស្ស​ធ្ងន់​ធ្ងរ។

ច្បាប់ថ្មីនេះ បើកផ្លូវឲ្យប្រទេសសេរី អាចដាក់ទណ្ឌកម្ម លើជនសាហាវ ខិលខូច និងពុករលួយ ទោះជាជនទាំងនោះរស់នៅនិងបានប្រព្រឹត្តនៅលើទឹកដីប្រទេសណាក៏ដោយ។ បទឧក្រិដ្ឋនោះ សំដៅដល់ការរំលោភសិទ្ធិមនុស្សយ៉ាងធ្ងន់ធ្ងរ ដូចជា ការលួចសម្លាប់មនុស្ស ការឃុំឃាំងតាមទំនើងចិត្ត ការរំលោភ​សិទ្ធិ​កាន់​កាប់​ដីធ្លីរបស់ប្រជាពលរដ្ឋជាដើម។

ចំពោះទណ្ឌកម្មវិញ គឺហាមឃាត់មិនឲ្យជនឧក្រិដ្ឋទាំងនោះ មកជាន់ទឹកដីប្រទេសសេរី ការបង្កកទ្រព្យសម្បត្តិរបស់ពួកគេ និងការហាមឃាត់មិនឲ្យស្ថាប័នទាំងអស់ នៃលោកសេរី ដូចជាធនាគារ ឬក្រុមហ៊ុនពានិជ្ជកម្ម មានទំនាក់ទំនងជាមួយជនឧក្រិដ្ឋ តាមការចាត់ទុករបស់ប្រទេសលោកសេរី។

សម្រាប់ ​លោក ផៃ ស៊ីផាន ប្រធាន​ក្រុម​អ្នកនាំពាក្យ​រដ្ឋាភិបាល​កម្ពុជា ច្បាប់​ថ្មី​របស់​អឺរ៉ុប​នៅពេលនេះ​គឺសំដៅ​ហ៊ុំព័ទ្ធ​ប្រទេសចិនមុនគេ ក្រោមភូមិសាស្ត្រនយោបាយ ហើយថា​ប្រទេសផ្សេងទៀតដូចជាកម្ពុជា​គឺ​ត្រូវ​រង​ចាំមើលសិន​ចំពោះ​ឥទ្ធិពលរបស់​ច្បាប់​ថ្មីនេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ