លោក អ៊ូ ច័ន្ទរ័ត្ន៖គណបក្សនយោបាយថ្មីនឹងបង្ហាញឈ្មោះផ្លូវការក្រោយថ្ងៃ១៧មករា

គ្មានការប្រែប្រួល​ក្នុងគោលជំហរ​បង្កើតគណបក្សនយោបាយថ្មីនោះឡើយ។ នេះជាការអះអាង​របស់​លោក អ៊ូ ច័ន្ទរ័ត្ន អតីតមន្ត្រីជាន់ខ្ពស់គណបក្សសង្គ្រោះជាតិ។ តែការ​បង្ហាញឈ្មោះ​ផ្លូវការ​នៃគណបក្សថ្មី​នេះ​គឺត្រូវបានពន្យាពេល។ ពន្យាពេលដោយសារតែ គម្រោង​​មាតុភូមិ​និវត្តន៍​របស់​ថ្នាក់​ដឹកនាំ​ជាន់​ខ្ពស់​នៃ​គណបក្សប្រឆាំង​ដឹកនាំ​ដោយ​លោកស្រី​ មួរ សុខហួរ​ ត្រូវបានពន្យាពេល​ដល់ថ្ងៃទី១៧មករា។

តែបើតាម លោក អ៊ូ ច័ន្ទរ័ត្ន យ៉ាងយូ នៅត្រឹមដំណាច់ ខែមករា ឆ្នាំ ២០២១ នេះ គណបក្សថ្មីរបស់​លោក​អាចនឹងត្រូវបង្កើតឡើង ខណៈពេលនេះលោកអះអាងថាមាន​រចនាសម្ព័ន្ធ និងលិខិតបែបបទ​ត្រៀម​រួចអស់​ហើយ​ដើម្បី​ដាក់ទៅ​ក្រសួងមហាផ្ទៃ។ តែពេលនេះលោកនៅរងចាំមើលលទ្ធផលឬដំណោះស្រាយនយោបាយ នៅក្រោយមាតុភូមិនិវត្តន៍របស់​លោកស្រី មួរ សុខហួរ។ លោកស្រី មូរ សុខហួរ ដែល​បានពន្យាពេល​មកដល់កម្ពុជារហូតដល់ថ្ងៃទី១៧ មករា ខាងមុខ ដោយអះអាងថាមកពីគ្មានយន្ត​ហោះ​ធ្វើ​ដំណើរ។

ហេតុផលនេះត្រូវបានលោក អ៊ូ ច័ន្ទរ័ត្ន យល់ស្រប។ អ្នកនយោបាយរូបនេះ​ជឿថា លោកស្រី មូរ សុខហួរ នឹងមិនផ្លាស់​ប្តូរជំហទេ ដោយយល់ថា​ប្រសិន​បើ​លោកស្រី​មកដល់កម្ពុជា​ នោះរដ្ឋាភិបាល​នឹង​ត្រូវ​ដាក់​លោកស្រី​ឲ្យ​ធ្វើ​ចត្តាឡីស័ក​១៤​ថ្ងៃដូច​អ្នក​ដំណើរទូទៅដែរ។ ដូច្នេះមិនអាចកើតឡើងឡើយ​សកម្ម​ភាព​​ទៅគាំទ្រឬហែរហមនោះ​។

បើតាម លោក អ៊ូ ច័ន្ទរ័ត្ន ប្រសិនបើលោកស្រី មូរ សុខហួរ មកដល់កម្ពុជា នោះនឹងមាន​វាសនា​ដូច​លោក កឹម សុខា គឺសេរីភាពមួយចំនួនត្រូវបាន​ដកហូត ហើយ​លោកស្រី​នឹង​ត្រូវ​ហាមឃាត់​មិនឲ្យ​ត្រឡប់​ទៅ​ក្រៅ​ប្រទេសវិញឡើយ រហូតដល់​ការបោះឆ្នោត​ថ្មី​ត្រូវបានបញ្ចប់។

ប្រសិនបើ នៅតែគ្មានដំណោះស្រាយនយោបាយឲ្យគណបក្សសង្គ្រោះជាតិ​រស់ឡើងវិញទេ លោក អ៊ូ ច័ន្ទរ័ត្ន អះអាងថាគណបក្សនយោបាយថ្មីរបស់​លោក​ ត្រូវតែបង្កើតឡើងមិនឲ្យហួសពីដំណាច់ខែមករា ឆ្នាំ ២០២១ នេះឡើយ។

គួរឲ្យដឹងថា មានអ្នក​នយោបាយ​របស់អតីតគណបក្សសង្គ្រោះជាតិ១៤នាក់ ដែលបានស្នើសុំសិទ្ធិធ្វើនយោបាយឡើងវិញ ក្នុងចំណោម​១១៨រូប ដែលត្រូវបានដកសិទ្ធិធ្វើ​នយោបាយ​៥ឆ្នាំ។ ក្នុងនោះ​មានមួយចំនួន​ទៅ​បង្កើតគណបក្សថ្មី​ដូចជា លោក រៀល ខេមរិន្ទ បង្កើតថ្មីឈ្មោះថា «​ខ្មែរ​អភិរក្ស​និយម» លោក ជីវ កត្តា និង​កង គឹមហាក់ បង្កើតបក្សថ្មី​ឈ្មោះថា «ខ្មែរ​ស្រឡាញ់ជាតិ» ខណៈ លោក គង់ គាំ ទៅចូលរួមជាគណបក្សថ្មីរបស់កូនគាត់ គឺគណបក្ស​ឆន្ទៈ​ខ្មែរ៕