កម្ពុជា-កូវីដ១៩

អ្នកជំនាញសុខភាព៖ ការពិចារណាបិទខេត្តជាបណ្តោះអាសន្នមិនមែនជាជម្រើសល្អ នៅក្នុងបរិបទកូវីដ១៩នៅតាមខេត្តជាយដែននោះទេ

ពលករខ្មែរកំពុងឈរតម្រង់ជួរ ដើម្បីចូលមកកាន់ទឹកដីកម្ពុជាវិញ នៅច្រកព្រំដែនកម្ពុជា-ថៃ អូរស្មាច់ ខេត្តឧត្តរមានជ័យ
ពលករខ្មែរកំពុងឈរតម្រង់ជួរ ដើម្បីចូលមកកាន់ទឹកដីកម្ពុជាវិញ នៅច្រកព្រំដែនកម្ពុជា-ថៃ អូរស្មាច់ ខេត្តឧត្តរមានជ័យ © FB
ដោយ៖ ជួប នរក្សា
១៤ នាទី

​ករណី​ពលករ​ខ្មែរ​ត្រលប់​មកពី​ប្រទេស​ថៃ​មាន​វិជ្ជមាន​កូ​វី​ដ​១​៩​ ​បាន​កើន​ឡើង​ជាបន្តបន្ទាប់​រយៈពេល​ប៉ុន្មាន​ថ្ងៃ​មកនេះ​។​ ​នៅ​ក្នុង​បរិ​បទ​នៃ​ការ​ឆ្លង​កូ​វី​ដ​១​៩​លើ​ពលករ​ខ្មែរ​នេះ​ ​អ្នកជំនាញ​ផ្នែក​សុខភាព​ ​បាន​ថ្លែងប្រាប់​វិទ្យុ​បារាំង​អន្តរជាតិ​នៅ​ថ្ងៃសុក្រ​នេះ​ថា​ ​ការពិចារណា​លើ​ការ​បិទ​ខ្ទប់​ខេត្ត​មួយ​ចំនួន​នៅ​តាម​តំបន់​ព្រំដែន​ជាប់​ប្រទេស​ថៃ​មិនមែន​ជា​ដំណោះស្រាយ​ដើម្បី​បង្ការ​ជំងឺ​កូ​វី​ដ​១​៩​នោះ​ទេ​ ​ក៏ប៉ុន្តែ​អ្វី​ដែល​ចាំបាច់​នៅ​ពេលនេះ​គឺ​ពង្រឹង​ការ​អនុវត្ត​វិធាន​សុវត្ថិភាព​សុខភាព​ឲ្យបាន​ម៉ឺងម៉ាត់​ ​និង​តឹងរ៉ឹង​បំផុត​។

ផ្សាយពាណិជ្ជកម្ម

នៅក្នុងបរិបទនៃការឆ្លងជំងឺកូវីដ១៩ទៅលើពលករខ្មែរ ដែលត្រលប់មកពីប្រទេសថៃនិងកំពុងតែធ្វើចត្តាឡីស័កនៅតាមបណ្តាខេត្តជាប់ព្រំដែនថៃ-កម្ពុជា អ្នកជំនាញផ្នែកសុខភាព លោកវេជ្ជបណ្ឌិត នុត សម្បត្តិ ប្រធានវិទ្យាស្ថានជីវសាស្ត្រ វេជ្ជសាស្ត្រ និងកសិកម្មនៃរាជបណ្ឌិត្យសភាកម្ពុជា មើលឃើញថាដំណោះស្រាយនៅក្នុងទប់ស្កាត់ការរាលដាលបន្តនូវជំងឺកូវីដ១៩នៅកម្ពុជា មិនមែនជាការបិទខ្ទប់ខេត្តណាមួយនៅតាមតំបន់ព្រំដែននោះទេ។ ការបិទខ្ទប់ខេត្ត នឹងអាចប៉ះទង្គិចដល់បញ្ហាសតិអារម្មណ៍ និងជាពិសេសគឺបញ្ហាសេដ្ឋកិច្ច។ នេះបើតាមលោកវេជ្ជបណ្ឌិត នុត សម្បត្តិ។

ជំនួសឲ្យការបិទបណ្តោះអាសន្នទៅលើខេត្តណាមួយនេះ អ្នកជំនាញផ្នែកសុខភាពរូបនេះ លើកឡើងថា ក្រសួងសុខាភិបាល និងអាជ្ញាធរនៅតាមបណ្តាខេត្តទាំងនោះ ត្រូវពង្រឹងនូវការអនុវត្តវិធានការបង្ការការឆ្លងជំងឺកូវីដ១៩ជាបន្តទៀត ដើម្បីធ្វើយ៉ាងណាធានាបាននូវសុវត្ថិភាពដល់ប្រជាពលរដ្ឋ។

តែជាមួយគ្នានេះ បើតាមលោកវេជ្ជបណ្ឌិត អ្វីដែលការព្រួយបារម្ភគឺការចូលរួមសហការពីពលករខ្មែរដែលត្រលប់មកពីប្រទេសថៃវិញនៅក្នុងបរិបទកូវីដ១៩នេះ។ ពលករខ្មែរដែលវិលចូលកម្ពុជាវិញនោះត្រួវបង្ហាញភាពស្មោះត្រង់ និងចូលរួមធ្វើចត្តាឡីស័កឲ្យបានត្រឹមត្រូវ ទើបអាចទប់ស្កាត់ការចម្លងបន្តចូលសហគមន៍បាន។

នៅថ្ងៃនេះដែរ ក្រសួងការងារក៏បានអំពាវនាវឲ្យពលករខ្មែរដែលកំពុងធ្វើការនៅប្រទេសថៃ ឲ្យបន្តស្នាក់នៅ និងធ្វើការជាបន្តទៀត ខណៈដែលអាជ្ញាធរថៃនឹងមិនមានវិធានការប្រឆាំងនឹងពលករបរទេសណាមួយឡើយ។ ការត្រលប់ចូលមកកាន់កម្ពុជាវិញ ជាការប្រឈមខ្ពស់នឹងលទ្ធភាពឆ្លងជំងឺកូវីដ១៩នៅក្នុងស្ថានការណ៍នេះ។ នេះបើយោងតាមក្រសួងការងារកម្ពុជា។

គួរជម្រាបជូនថា គិតត្រឹមថ្ងៃទី១៥ខែមករានេះ មានពលករខ្មែរដែលត្រលប់មកពីប្រទេសថៃបានរកឃើញវិជ្ជមានជំងឺកូវីដ១៩សរុបចំនួន៥៦នាក់ ក្នុងនោះស្រី៤៤នាក់និងបុរស១២នាក់ ហើយថ្ងៃនេះផ្ទាល់ក្រសួងបានរកឃើញអ្នកវិជ្ជមានថ្មីដែលជាពលករខ្មែរដែលនោះ រហូតដល់១៥នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI