កម្ពុជា-ចរាចរណ៍

ប៉ូលីសក្រុងភ្នំពេញ ផ្តល់លេខទូរស័ព្ទ ឲ្យពលរដ្ឋរាយការណ៍ភ្លាមៗពីករណីកកស្ទះចរាចរណ៍

ប៉ូលីសក្រុងភ្នំពេញ ផ្តល់លេខទូរស័ព្ទ ឲ្យពលរដ្ឋរាយការណ៍ភ្លាមៗពីករណីកកស្ទះចរាចរណ៍
ប៉ូលីសក្រុងភ្នំពេញ ផ្តល់លេខទូរស័ព្ទ ឲ្យពលរដ្ឋរាយការណ៍ភ្លាមៗពីករណីកកស្ទះចរាចរណ៍ © rfi

ស្នង​ការដ្ឋាន​នគរបាល​រាជធានី​ភ្នំពេញ នៅ​ក្នុង​សប្តាហ៍​នេះ បាន​ផ្តល់​លេខ​ទូរស័ព្ទ​ចំនួន ៣​ខ្សែ ដើម្បី​ឲ្យ​ប្រជាពលរដ្ឋ ទូរស័ព្ទ​មក​រាយការណ៍ ប្រសិន​បើ​ជួប​ករណី​កក​ស្ទះ​ចរាចរណ៍ គ្រោះថ្នាក់​ចរាចរណ៍ ឬ ការ​ចត​គ្មាន​សណ្តាប់​ធ្នាប់​ជា​ដើម​។ ក្រោយ​ការ​ផ្តល់​ និង​ទាក់ទង​ទៅ​កាន់​លេខ​ទូរស័ព្ទ​ទាំង​នេះ ក្រុម​ការងារ​ប្រតិកម្ម​រហ័ស របស់​ស្នងការ​ដ្ឋាន​នគរបាល​រាជធានី​ភ្នំពេញ ពិត​ជា​ចុះ​ទៅ​អន្តរាគមន៍​ភ្លាម​ៗ​មែន​។ ប៉ុន្តែ​អ្នក​ជំនាញ​ផ្នែក​ចរាចរណ៍​ផ្លូវគោក លើក​ឡើង​ថា វិធានការ​ផ្តល់​លេខ​ទូរស័ព្ទ និង​រាយការណ៍​បន្ទាន់​នេះ អាច​មាន​ប្រសិទ្ធភាព ក្នុង​រយៈពេល​ខ្លី​ប៉ុណ្ណោះ ព្រោះ​បញ្ហា​ចរាចរណ៍​ក្នុង​រាជធានី​ភ្នំពេញ ត្រូវ​ទាមទារ​ឲ្យ​មាន​ការ​ដោះស្រាយ​លើ​កត្តា​ច្រើន​ជាង​នេះ​។  

ផ្សាយពាណិជ្ជកម្ម

០៧៨ ៨៧៧ ០០៩/ ០១៧ ៨៣១ ៩៤១ គឺ​ជា​លេខ​ទូរស័ព្ទ ផ្នែក​អន្តរាគមន៍​ចរាចរណ៍ ខណៈ ០៦៩ ៥១៦ ៩៩៩ ​គឺ​ជា​លេខ​ក្រុម​ការងារ​ព័ត៌មាន និង​ប្រតិកម្ម​រហ័ស ដែល​ពលរដ្ឋ​អាច​ទាក់​ទង​ទៅ​បាន​ភ្លាមៗ ប្រសិន​បើ​ជួប​ករណី​កក​ស្ទះ ឬ គ្រោះថ្នាក់​ចរាចរណ៍ ឬ ការ​ចត​គ្មាន​សណ្តាប់ធ្នាប់​ក្នុង​រាជធានីភ្នំពេញ​ជា​ដើម​។ នេះ​គឺ​ជា​ការ​បញ្ជក់​លើ​ទំព័រហ្វេសប៊ុក លោក​ឧត្តមសេនីយ៍ឯក ស ថេត អគ្គស្នង​ការ​រង​នគរបាល​ជាតិ និង​ជា​ស្នង​ការ​នគរបាល​រាជធានី​ភ្នំពេញ នៅ​ក្នុង​សប្តាហ៍​នេះ​។

 

​ការ​ដាក់​ឲ្យ​ដំណើរការលេខទូរស័ព្ទនេះ បាន​ទទួល​ការ​សាទរ​ពី​សំណាក់​ប្រជាពលរដ្ឋជាច្រើន ដោយ​សម្ដែង​ការ​ជឿជាក់​ថា វិធានការ​នេះជាដំណោះស្រាយ​ល្អ ព្រោះចរាចរណ៍ក្នុងរាជធានីភ្នំពេញសព្វថ្ងៃ តែងតែប្រឈមនឹងការកកស្ទះជា​រៀង​រាល់​ថ្ងៃ​។ ប៉ុន្តែលោក​ គង់ ​រតនៈ ​ប្រធាន​​វិទ្យា​ស្ថាន​ជាតិ​សុវត្ថិភាព​ចរាចរណ៍​ផ្លូវ​គោក យល់ឃើញថា វិធានការ​បែបនេះ អាចមានប្រសិទ្ធភាពក្នុងការកាត់បន្ថយការកកស្ទះចរាចរណ៍ ក្នុង​រយៈពេលខ្លីប៉ុណ្ណោះ។

 

តាមលោក​គង់ រតនៈ ចរាចរណ៍​ក្នុងរាជធានីភ្នំពេញ មិន​ទាន់​មានភាពប្រសើរ​ឡើង​នោះទេ ពីមួយឆ្នាំទៅមួយឆ្នាំ ទោះបីជា​មានការ​វិវត្តច្រើនលើ​ផ្នែកសុវត្ថិភាពក៏ដោយ។ ភាព​ចង្អៀត​ណែន​នៃ​ចរាចរណ៍​នៅ​ទីក្រុង​ភ្នំពេញ បើ​តាម​លោក គង់ រតនៈ កើត​ឡើង​ដោយ​សារ​តែ​រាជធានី មាន​កំណើន​យានយន្ត តែទំហំផ្លូវ គ្មាន​សមាមាត្រ​ជាមួយចំនួនរថយន្ត។ មិន​ត្រឹម​តែ​ប៉ុណ្ណោះ ការកកស្ទះចរាចរណ៍ ដែល​កើតឡើង​ដោយសារតែការ​ចត​យានយន្តឥតសណ្តាប់ធ្នាប់ ព្រោះ​តែក្នុងក្រុងពុំមានចំណតគ្រប់គ្រាន់។​

 

លោក​គង់ រតនៈ ចង់ឲ្យ​អាជ្ញាធរ​លើកទឹកចិត្ត​ឲ្យ​មានក្រុមហ៊ុនឯកជនសាងសង់ចំណតសាធារណៈឲ្យ​ច្រើន ជាជាងការ​ដោះស្រាយ​លើ​ការចតតាមដងផ្លូវដោយ​ឥតសណ្តាប់ធ្នាប់ ក្នុងរយៈពេលបន្ទាន់ៗ។ ជាមួយគ្នា អ្នក​ឃ្លាំមើល​ផ្នែកចរាចរណ៍ផ្លូវគោក ក៏ចង់ឲ្យ​មានការបង្កើនការអប់រំ និងការអនុវត្តច្បាប់​ចរាចរណ៍ឲ្យ​បានតឹងរ៉ឹងដល់ពលរដ្ឋ ដើម្បីលើកកម្ពស់​ប្រសិទ្ធភាពនៃការប្រើប្រាស់ផ្លូវ ឲ្យ​មានស្តង់ដារខ្ពស់ កាត់បន្ថយ​ភាពរញ៉េរញ៉ៃផ្នែកចរាចរណ៍ក្នុងទីក្រុង៕

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI