កម្ពុជា-នយោបាយ

លោក អ៊ូ ច័ន្ទរ័ត្ន៖ ការបង្កើតគណបក្សនយោបាយថ្មី នឹងមិនមានការពន្យាពេលទៀតទេ

លោក អ៊ូ ច័ន្ទរ័ត្ន៖ ការបង្កើតបក្សថ្មី កំពុងដំណើរការ ក្រោយមាតុភូមិនិវត្តន៍របស់លោកស្រី មូរ សុខហួរ មិនបានសម្រេច
លោក អ៊ូ ច័ន្ទរ័ត្ន៖ ការបង្កើតបក្សថ្មី កំពុងដំណើរការ ក្រោយមាតុភូមិនិវត្តន៍របស់លោកស្រី មូរ សុខហួរ មិនបានសម្រេច © rfi
ដោយ៖ វ៉ា សំណព្វ
១៨ នាទី

ការ​បង្កើត​គណបក្ស​ថ្មី​របស់​លោក អ៊ូ ច័ន្ទរ័ត្ន អតីត​តំណាងរាស្ត្រ​គណបក្ស​សង្គ្រោះជាតិ នឹង​មិន​ពន្យា​ពេល​ទៀត​ឡើយ​។ តាម​គម្រោង គណបក្ស​នយោបាយ​ថ្មី​នេះ នឹង​លេច​ចេញ​ជា​រូប​រាង​នៅ​ត្រឹម​ចុង​ខែ​មករា ឆ្នាំ២០២១​នេះ​។ គម្រោង​នៃ​ការ​បង្កើត​គណបក្ស​ថ្មី​របស់​លោក អ៊ូ ច័ន្ទរ័ត្ន គឺ​ក្រោយ​ពី​ការ​រង់​ចាំ​មើល​លទ្ធផល​នៃ​មាតុភូមិនិវត្តន៍​របស់​លោក​ស្រី មូរ សុខហួរ មិន​បាន​សម្រេច​។ 

ផ្សាយពាណិជ្ជកម្ម

«ការ​បង្កើត​គណបក្ស​នយោបាយ​ថ្មី នឹង​មិន​មាន​ការ​ពន្យា​ពេល​ទៀត​នោះ​ទេ​»។ នេះ​គឺ​ជា​ការ​លើក​ឡើង​របស់​លោក អ៊ូ ច័ន្ទរ័ត្ន អតីត​តំណាងរាស្ត្រ​គណបក្ស​សង្គ្រោះជាតិ​នៅ​ថ្ងៃ អាទិត្យ ទី ១៧ មករា​នេះ​។ បើ​តាម​អតីត​មន្ត្រី​ជាន់​ខ្ពស់​គណបក្ស​ប្រឆាំង​រូប​នេះ គណបក្ស​នយោបាយ​ថ្មី​របស់​លោក នឹង​ចេញ​រូប​រាង​ពិត​ប្រាកដ​យ៉ាង​យូរ នៅ​ត្រឹម​ដំណាច់​ខែ​មករា ឆ្នាំ​២០២១​នេះ​។ ការ​បង្កើត​គណបក្ស​នយោបាយ​ថ្មី​របស់​លោក គឺ​ដើម្បី​ត្រៀម​ចូល​រួម​នៅ​ក្នុង​ការ​បោះឆ្នោត​ក្រុម​ប្រឹក្សា​ឃុំ​សង្កាត់​នៅ​ឆ្នាំ ២០២២ និង​ការ​បោះឆ្នោត​ជាតិ​នៅឆ្នាំ ២០២៣ ខាង​មុខ​។

 

យ៉ាងណាក្តី គិត​ត្រឹម​រសៀល​ថ្ងៃ​ទី ១៧ មករា​នេះ អតីត​មន្ត្រី​ជាន់​ខ្ពស់​គណបក្ស​ប្រឆាំង​រូប​នេះ នៅ​តែ​មិន​ទាន់​បង្ហើប​ពី​ឈ្មោះ​គណបក្ស​ថ្មី កាល​បរិច្ឆេទ​នៃ​ការ​សុំ​ចុះ​បញ្ជី និង​សមាសភាព​អ្នក​ចូលរួម​បង្កើត​គណបក្ស​ថ្មី​នេះ​នៅ​ឡើយ​ទេ​។ ប៉ុន្តែ​លោក​បាន​ទទួល​ស្គាល់​ថា លោក​បាន​និង​កំពុង​ទាក់ទង​ជាមួយ​អតីត​មន្ត្រី​ជាន់​ខ្ពស់​នៃ​អតីត​គណបក្ស​សង្គ្រោះជាតិ​មួយ​ចំនួន ក្នុង​នោះ​ក៏​រួម​មាន លោក សុន ឆ័យ អតីត​តំណាង​រាស្ត្រ​មណ្ឌល​ភ្នំពេញ មក​ចូលរួម​ផង​ដែរ​។ ប៉ុន្តែ​យ៉ាង​ណា​ក៏​ដោយ កាល​ពី​ខែ​កញ្ញា ឆ្នាំ​២០២០​កន្លង​ទៅ មាន​ការ​ផ្សព្វផ្សាយ​នៅ​លើ​បណ្តាញ​សង្គម​ហ្វេសប៊ុក​ថា គណបក្ស​ថ្មី​របស់​លោក​អ៊ូ ច័ន្ទរ័ត្ន ​នេះ​នឹង​មាន​ឈ្មោះ​ថា គណបក្ស «​កំណែទម្រង់​» ឬ «Reform  Party» ដោយ​មាន​ការ​ចូលរួម​ពី​មន្ត្រី​ជាន់​ខ្ពស់​នៃ​អតីត​គណបក្ស​សង្គ្រោះ​ជាតិ​មួយ​ចំនួន ដូច​ជា ​លោក​ សុន ឆ័យ និង​លោក មាជ សុវណ្ណារ៉ា​ ជា​ដើម​។ ប៉ុន្តែលោក អ៊ូ ច័ន្ទរ័ត្ន បាន​ចាត់​ទុក​ព័ត៌មាន​នេះ​ថា ជា​ព័ត៌មាន​មិន​ពិត​។

 

សូម​បញ្ជាក់​ថា គម្រោង​នៃ​ការ​បង្កើត​គណបក្ស​ថ្មី​របស់​លោក អ៊ូ ច័ន្ទរ័ត្ន នេះ គឺ​ក្រោយ​ពី​លោក​បាន​រង់​ចាំ​ស្ទង់​មើល​លទ្ធផល​នៃ​មាតុភូមិនិវត្តន៍​របស់​លោក​ស្រី មូរ សុខហួរ កាល​ពី​ថ្ងៃ​ទី ១៥ មករា តែ​មិន​បាន​សម្រេច​។ បន្ថែម​លើ​នេះ ការ​បង្កើត​គណបក្ស​ថ្មី គឺ​បន្ទាប់​ពី​លោក​មិន​មាន​សង្ឃឹម​ថា អតីត​គណបក្ស​សង្គ្រោះជាតិ​នឹង​រស់​ឡើង​វិញ​នោះ​ឡើយ ហើយ​ថា ក៏​នឹង​គ្មាន​ដំណោះស្រាយ​នយោបាយ​ណា​មួយ​រវាង​គណបក្ស​កាន់​អំណាច និង​អតីត​គណបក្ស​សង្គ្រោះជាតិ​នោះ​ដែរ​។ រីឯ​សម្ពាធ​អន្តរជាតិ​វិញ ក៏​ហាក់​គ្មាន​ឥទ្ធិពល​អ្វី​ធំ​ដុំ​នោះ​ដែរ​។ យ៉ាង​ណា​ក្តី លោក អ៊ូ ច័ន្ទរ័ត្ន សង្ឃឹម​ថា គណបក្ស​នយោបាយ​ថ្មី​របស់​លោក នឹង​អាច​ប្រមូល​ផ្តុំ​ការ​គាំទ្រ​ពី​សម្លេង​ប្រឆាំង​នៅ​កម្ពុជា​ឡើង​វិញ​បាន​។

 

គួរ​កត់​សំគាល់​ថា បើ​រាប់​ទាំង​គណបក្ស​នយោបាយ​ថ្មី​របស់​លោក អ៊ូ ច័ន្ទរ័ត្ន នេះ គឺ​មាន​គណបក្ស​នយោបាយ​ថ្មី​ចំនួន​៤​ហើយ​ដែល​ត្រូវ​បាន​បង្កើត​ឡើង ដោយ​អតីត​មន្ត្រី​ជាន់​ខ្ពស់​នៃ​អតីត​គណបក្ស​សង្គ្រោះជាតិ ចាប់​តាំង​ពី​ការ​រំលាយ​គណបក្ស​ប្រឆាំង​ដ៏​ធំ​មួយ​នេះ កាល​ពី​ខែ​វិច្ឆិកា ឆ្នាំ​២០១៧ មក​។ ក្នុងនោះ​រួម​មាន គណបក្ស​ខ្មែរ​ស្រលាញ់​ជាតិ​របស់​លោក ជីវ កត្តា និង​លោក កង គឹមហាក់ គណបក្ស​ឆន្ទៈ​ខ្មែរ របស់​លោក គង់ ម៉ូនីកា និង​លោក គង់ គាំ និង​គណបក្ស​ខ្មែរ​អភិរក្ស​និយម​របស់​លោក រៀល ខេមរិន្ទ្រ ជាដើម​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI