កម្ពុជា-សង្គម

១៧ឆ្នាំទៅហើយ ការទទូចរកយុត្តិធម៌ជូន លោក ជា វិជ្ជា នៅតែបន្ត

ខួប១៧ឆ្នាំនៃការបាញ់សម្លាប់លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា
ខួប១៧ឆ្នាំនៃការបាញ់សម្លាប់លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា © RFI/Nhim Sophal
ដោយ៖ ញឹម សុផល
១៤ នាទី

​នៅ​ថ្ងៃ​ទី​២​២​ ​ខែ​មករា​ ​ឆ្នាំ​២​០​២​១​នេះ​ ​គឺជា​ខួប​១​៧​ឆ្នាំ​នៃ​ការ​បាញ់សម្លាប់​លោក​ ​ជា​ ​វិជ្ជា​ ​អតីតប្រធាន​សហជីព​សេរី​កម្មករ​នៃ​ព្រះរាជាណាចក្រកម្ពុជា​។​ ​នៅ​ក្នុង​ឱកាស​នេះ​ ​ថ្នាក់​ដឹកនាំ​សហជីព​នេះ​ ​រួម​នឹង​កម្មករ​ ​និយោជិត​ប្រមាណ​៥​០​នាក់​ ​នៅតែ​បន្ត​ប្រមូលផ្តុំ​គ្នា​ដាក់​កំរងផ្កា​ ​អុច​ធូប​ ​រំលឹក​ដល់​វិញ្ញាណក្ខន្ធ​ ​លោក​ ​ជា​ ​វិជ្ជា​ ​នៅ​ឯ​សួនច្បារ​វិមានឯករាជ្យ​ ​ទី​ដែល​រូបសំណាក​លោក​ ​ជា​ ​វិជ្ជា​ ​ធ្វើអំពី​ថ្ម​ត្រូវ​បាន​ដាក់​តាំងនៅ​ទីនោះ​។​ ​លោក​ ​អាត់​ ​ធន់​ ​ប្រធាន​សហភាព​ការងារ​កម្ពុជា​ ​ដែល​បាន​ទៅ​ចូលរួម​គោរពវិញ្ញាណក្ខន្ធ​លោក​ ​ជា​ ​វិជ្ជា​ ​ដោយ​ផ្ទាល់​បាន​ថ្លែង​ថា​ ​លោក​ ​និង​អ្នក​សហជីព​ឯទៀត​ ​នៅតែ​ទាមទារ​ឲ្យ​អាជ្ញាធរ​វែកមុខ​ឃាតករ​ពិត​ឲ្យ​ឃើញ​ ​ដើម្បី​បញ្ចប់​និទ្ទណ្ឌភាព​នៅ​កម្ពុជា​ ​និង​បញ្ចប់​ការ​ធ្វើទុក្ខបុកម្នេញ​ទៅលើ​អ្នកការពារ​សិទ្ធិ​កម្មករ​។​ 

ផ្សាយពាណិជ្ជកម្ម

សូមស្តាប់ការលើកឡើងរបស់លោក អាត់ ធន់៖

សូមរំលឹកថា កាលពីថ្ងៃទី២២ ខែមករា ឆ្នាំ២០០៤ លោក ជា វិជ្ជា ដែលជាប្រធានសហជីពល្បីល្បាញខាងការពារសិទ្ធិកម្មករនៅក្នុងវិស័យកាត់ដេរ និងផលិតស្បែកជើង ដែលមាននិន្នាការទៅរកគណបក្សប្រឆាំង ត្រូវបានឃាតករបាញ់សម្លាប់ នៅខាងមុខតូបលក់កាសែតមួយស្ថិតនៅក្បែរវត្តលង្ការ។ ក្រោយឃាតកម្មដ៏ក៏ក្រើកមួយនេះ អាជ្ញាធរក្រុងភ្នំពេញបានបើកការស៊ើបអង្កេតយ៉ាងក្តៅគគុក ហើយឈានទៅចាប់ខ្លួនបុរស២នាក់ ឈ្មោះ ប៊ន សំណាង និងសុខ សំអឿន។ ក៏ប៉ុន្តែក្រុមអង្គការសង្គមស៊ីវិល សហគមន៍អន្តរជាតិ មេដឹកនាំសហជីពនានា រួមទាំងក្រុមគ្រួសារលោក ជា វិជ្ជា ផងនោះ បានហៅការចាប់ខ្លួនអ្នកទាំងពីរថាជាការចាប់ខ្លួនឃាតករសិប្បនិម្មិត និងទាមទារឲ្យមានការដោះលែងពួកគេ។ ទីបំផុត ប៊ន សំណាង និងសុខ សំអឿន ត្រូវបានដោះលែងឲ្យមានសេរីភាពកាលពីខែកញ្ញាឆ្នាំ២០១៣។ ទោះយ៉ាងណា ការស្វែងរកឃាតករពិត នៅតែជាសំណូមពរដ៏ទទូចពីសំណាក់ក្រុមគ្រួសារលោក ជា វិជ្ជា និងសង្គមស៊ីវិលដដែលមកទល់ពេលនេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI