តួអង្គ James Bond លោក Daniel Craig អំពាវនាវឲ្យសហគមន៍អន្តរជាតិចូលរួមលុបបំបាត់គ្រាប់មីននៅកម្ពុជា

Daniel Craig
Daniel Craig © Facebook
១៤ នាទី

នៅថ្ងៃទី ២២ខែមករាម្សិលមិញ តារាសម្តែងរឿង James Bond លោក Daniel Craig បានចូលរួម​តាមរយៈប្រព័ន្ធវីដេអូ  ក្នុងពិធី​​សម្ពោធ​ទីលាន​សុវត្ថិភាពដំបូងគេនៅកម្ពុជា ក្នុងការប្រែក្លាយ​ចម្ការមីន មួយកន្លែង​ នៅខេត្ត​បាត់ដំបង ជាទីធ្លាសម្រាប់លេងកម្សាន្ត។ នៅក្នុង​កិច្ចពិភាក្សាសម្ពោធទីលានសុវត្ថិភាព រៀបចំដោយ​អង្គការ​សហប្រជាជាតិសម្រាប់ការអភិវឌ្ឍន៍ UNDP លោក Daniel Craig តារាសម្តែងជនជាតិអង់គ្លេស បានអំពាវនាវឲ្យសហគមន៍អន្តរជាតិ ចូលរួម​ជាមួយរដ្ឋាភិបាលកម្ពុជា ក្នុងការលុប​បំបាត់គ្រាប់មីន និងសំណល់ជាតិផ្ទុះពីសង្គ្រាម​ ដែលបាន​ឆក់យកជីវិតប្រជាជនរាប់​ពាន់នាក់​ក្នុងមួយឆ្នាំៗ នៅកម្ពុជា។ សូមបញ្ជាក់ថា តួអង្គ James Bond លោក Daniel Craig ដែលធ្លាប់​មក​ថតកុននៅប្រទេសកម្ពុជា ​ជាមួយអ្នក​នាង Angelina Jolie ម្តងដែរ​ គឺជាអ្នកស្វែងរកការគាំទ្រសកលរបស់អង្គការសហប្រជាជាតិ សម្រាប់ការលុបបំបាត់គ្រាប់មីន និងសំណល់ជាតិផ្ទុះពីសង្គ្រាម។

ផ្សាយពាណិជ្ជកម្ម

លោក Daniel Craig ៖ «នៅទូទាំងពិភពលោក​ ទីធ្លាកុមារ​លេង ត្រូវគេដឹងថាជាទីធ្លាសុវត្ថិភាព ជាទីធ្លាដែលកុមារអាចលេងដោយសេរី និងរីករាយ។ ប៉ុន្តែនៅប្រទេសមួយចំនួន ទីធ្លានេះ ពុំមានសុវត្ថិភាពទេ។​ នៅកម្ពុជា ផល​ប៉ះពាល់ពីសង្គ្រាម នៅតែបន្តមាន។​ គ្រាប់មីន និងសំណល់​ជាតិផ្ទុះពីសង្គ្រាម​រាប់លានគ្រាប់ នៅរាយប៉ាយពេញផ្ទៃប្រទេស ហើយ​ពួកវាបន្តធ្វើឲ្យ​មនុស្សរងរបួស និងស្លាប់ជាបន្តបន្ទាប់​ក្នុងនោះក៏មានកុមារផងដែរ។ វត្តមានគ្រាប់មីន និងសំណល់ជាតិផ្ទុះពីសង្គ្រាមទាំងនេះ នៅតែបង្កជាការភ័យ​ខ្លាច ការព្រួយបារម្ភ និងអសន្តិសុខ។ យុទ្ធនាការទីលានសុវត្ថិភាព មានបំណងប្រែក្លាយដីដែលមានមីន ទៅជាទីលាន​សុវត្ថិភាព ។ យុទ្ធនាការ​នេះ មានបំណង​ទាក់ទាញការយក​ចិត្តទុកដាក់ និងកៀរគរជំនួយសម្រាប់ជនរងគ្រោះដោយសារមីន និងសំណល់ជាតិផ្ទុះពីសង្គ្រាម។ ខ្ញុំសូម​ប្រកាសបើកយុទ្ធនាការ​ទីលានសុវត្ថិភាពថ្មីនៅកម្ពុជាដោយ​ក្តីរីករាយ។ ហើយ​ខ្ញុំនឹងទន្ទឹងរង់ចាំទៅដល់ទីលានសុវត្ថិភាពថ្មីនេះដោយផ្ទាល់នៅថ្ងៃណាមួយ។ ខ្ញុំសូម​គាំទ្រ​យ៉ាងពេញទំហឹងចំពោះយុទ្ធនាការទីលានសុវត្ថិភាពរបស់អង្គការសហប្រជាជាតិ។​ ហើយខ្ញុំសង្ឃឹម​ថាអ្នក​នឹងគាំទ្រ​យុទ្ធនាការ​នេះ យ៉ាងពេញទំហឹងដូចខ្ញុំផងដែរ! »

 

គួរជម្រាបជូនថា បើ​តាមរបាយការណ៍របស់​មជ្ឈមណ្ឌលកំចាត់មីនកម្ពុជា (CMAC) ក្នុងឆ្នាំ ២០២០កន្លងទៅ CMAC​ សំរេចបានការរំដោះផ្ទៃដីចម្ការមីន និងចម្ការគ្រាប់សរុបចំនួនជាង ៩ពាន់២០០ហិចតា ស្មើនឹងប្រមាណ១១៥ភាគរយ​ នៃផែនការពង្រាយកម្លាំងប្រតិបត្តិការជាក់ស្ដែង ខណៈការរុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទ ធ្វើបានសរុបចំនួនជិត ៤ម៉ឺន​គ្រាប់។ ហើយ​នៅក្នុងឆ្នាំ ២០២១នេះ CMAC មានផែនការរំដោះផ្ទៃដីចម្ការមីន និងចម្ការគ្រាប់ចំនួនប្រមាណជាង ១ម៉ឺន​១ពាន់ហិកតា និង​មានផែនការ រុករក និងកម្ទេចចោលគ្រាប់មិនទាន់ផ្ទុះគ្រប់ប្រភេទចំនួនប្រមាណ ៤ម៉ឺនគ្រាប់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI