កម្ពុជា-សង្គម

អ្នកផលិតទឹកមាត់ត្រចៀកកាំក្នុងស្រុកស្នើឱ្យរដ្ឋពន្លឿនការនាំចេញសម្បុកត្រចៀកកាំទៅចិន

ទីតាំងចិញ្ចឹមសត្វត្រចៀកកាំ ដើម្បីយកសម្បុកទឹកមាត់ត្រចៀកកាំ
ទីតាំងចិញ្ចឹមសត្វត្រចៀកកាំ ដើម្បីយកសម្បុកទឹកមាត់ត្រចៀកកាំ © សហការី
ដោយ៖ ហេង សុខនី
១៤ នាទី

អ្នក​ផលិត​សម្បុក​ទឹក​មាត់​ត្រចៀក​កាំ ​ស្នើ​ឱ្យ​រដ្ឋា​ភិបាល​កម្ពុជា​ជំរុញ​ការ​នាំ​ចេញ​សម្បុក​ទឹក​មាត់​ត្រចៀក​កាំ​ទៅ​ចិន​ ដើម្បី​ជួយ​  ពង្រីក​ទីផ្សារ​សម្បុក​ទឹក​មាត់​ត្រចៀក​កាំ ​ និង ​ផ្តល់​ការងារ​ដល់​កម្មករ​ខ្មែរ​ប្រមាណ​ជាង​រាប់ពាន់​នាក់​ ចៀសផុត​ពី​ការ​ចំណាក​ស្រុក​ដោយ​ប្រថុយប្រថាន​បាន​។ ការ​ជំរុញ​របស់​ក្រុម​អាជីវករ​ដូច្នេះ​ គឺ​ធ្វើឡើង​ក្រោយ​កម្ពុជា​និង​ចិន​ មាន​កិច្ច​ព្រមព្រៀង​ពាណិជ្ជកម្ម​សេរី​នឹង​គ្នា​កាល​ពី​ពេល​ថ្មីៗ​នេះ​។

ផ្សាយពាណិជ្ជកម្ម

លោកអ៊ាន ភារម្យ អ្នកគ្រប់គ្រងទូរទៅក្រុមហ៊ុន Best Life Product បានប្រាប់វិទ្យុបារាំងអន្តរជាតិRFIថា ចិនគឺជាទីផ្សារធំសម្រាប់កម្ពុជាក្នុងការនាំចេញសម្បុកទឹកមាត់ត្រចៀកកាំ។ កន្លងមកទីផ្សារផលិតផលនេះ មានតែក្នុងស្រុក និងមានការនាំចេញបានតិចតួច ទៅប្រទេសជិតខាងមានថៃ និងវៀតណាម។ ក្រោយកិច្ចព្រមព្រៀង​ពាណិជ្ជកម្ម​សេរី​ទ្វេ ភាគី​កម្ពុជា​ចិន​(FTA)​អ្នកគ្រប់គ្រងរូបនេះ សង្ឃឹមថា អាចនឹងមានការនាំចេញសម្បុកទឹកមាត់ត្រចៀកកាំនេះ ទៅប្រទេសចិនក្នុងទំហំធំ ព្រោះមានតែចិនទេ ដែលយល់ពីគុណតម្លៃ និងអត្ថប្រយោជន៍នៃសំបុកទឹកមាត់ត្រចៀកកាំ ហើយបើនិយាយពីការនាំចេញទៅអឺរ៉ុបវិញ គឺមិនសូវមានការចាប់អារម្មណ៍នោះទេ។

បច្ចុប្បន្នទីផ្សារក្នុងស្រុក សម្បុកទឹកមាត់ត្រចៀកកាំនេះ គឺមិនសូវមានវិសាលភាពធំទូលាយទេ ព្រោះផលិតផលនេះជាផលិតផលកម្រិតខ្ពស់ មានតម្លៃថ្លៃ និងសក្តិសមចំពោះតែអ្នកដែលមានជីវភាពធូរធារប៉ុណ្ណោះ។ ចំពោះការផលិតវិញ គឺមិនមានទិន្នន័យ និងចំនួនតួលេខជាក់លាក់នោះទេ ព្រោះអាស្រ័យតែលើការបញ្ជារទិញ ពីអ្នកដែលមានតម្រូវការប៉ុណ្ណោះ បើមិនមានការបញ្ជារទិញក៏គ្មានទីផ្សារដែរ។ នេះបើតាមការបញ្ជាក់ពី លោកអ៊ាន ភារម្យ។

ជាមួយគ្នានេះលោកអ៊ាន ភារម្យស្នើដោយទទូចទៅរដ្ឋាភិបាល ឱ្យពន្លឿនការនាំចេញឱ្យបានឆាប់ ដើម្បីជួយលើកស្ទួយជីវភាពប្រជាពលរដ្ឋអ្នកចិញ្ចឹមសត្វត្រចៀកកាំផង និងជួយផ្តល់ការងារឱ្យកម្មករជាច្រើនពាន់នាក់ផង។ ការផលិតសំបុកទឹកមាត់ត្រចៀកកាំនេះ មិនត្រូវការកំលាំងម៉ាស៊ីនច្រើនទេ គឺត្រូវការកំលាំងមនុស្ស និងអាចជួយអភិរក្សចំនួនសត្វត្រចៀកកាំបានច្រើនទៀតផង។

សូមរម្លឹកថា ការស្នើឱ្យជំរុញការនាំចេញ ដើម្បីពង្រីកទីផ្សារសម្បុកទឹកមាត់ត្រចៀកកាំនេះ មិនមែនជាលើកទីមួយទេ គឺធ្លាប់មានការស្នើពីប្រធាន​សហព័ន្ធ​សម្បុក​ត្រចៀកកាំ​កម្ពុជា រួចម្តងហើយនៅឆ្នាំ២០២០ ដោយមានការឆ្លើយតបពីក្រសួង​កសិកម្ម​​ថា ផែនការ​នាំចេញ​ផលិតផល​សម្បុកទឹកមាត់​ត្រចៀកកាំ ​ទៅកាន់​ទីផ្សារ​ប្រទេស​ចិន​ជា​ផ្លូវការនេះ​ អាចនឹងធ្វើឡើងនៅ​ចុង​ឆ្នាំ​២០២០។ រហូតដល់ពេលនេះ នៅមិនទាន់មានការបញ្ជាក់ជាថ្មីនៅឡើយទេ ខណៈ​ឯកសារ​ដែល​អាជ្ញាធរ​ចិន​ផ្ញើមក​ឱ្យ​កម្ពុជា​បំពេញ គឺ​មាន​ភាពស្មុគស្មាញ និង​ទាមទារ​ឱ្យ​មាន​ការសិក្សា​បន្ថែមទៀត​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI