កម្ពុជា

រដ្ឋបាលខេត្តព្រះសីហនុ ព្រមានមិនលើកលែងដល់អ្នកប៉ះពាល់ដីសម្បត្តិរដ្ឋនៅកុ្រងកោះរ៉ុង

រដ្ឋបាលខេត្តព្រះសីហនុ ព្រមានមិនលើកលែងដល់អ្នកប៉ះពាល់ដីសម្បត្តិរដ្ឋនៅកុ្រងកោះរ៉ុង
រដ្ឋបាលខេត្តព្រះសីហនុ ព្រមានមិនលើកលែងដល់អ្នកប៉ះពាល់ដីសម្បត្តិរដ្ឋនៅកុ្រងកោះរ៉ុង © Facebook

រដ្ឋបាល​ខេត្ត​ព្រះសីហនុ បាន​បញ្ជាក់​ជំហ​យ៉ាង​ម៉ឺង​ម៉ាត់​ថា នឹង​ចាត់​វិធានការ​ផ្លូវ​ច្បាប់​យ៉ាង​តឹង​រ៉ឹង​ដោយ​មិន​លើក​លែង​ចំពោះ​ជន​ណា ដែល​បាន​ប៉ះពាល់​កម្មសិទ្ធិ​នៃ​ទ្រព្យ​សម្បត្តិ​របស់​រដ្ឋ លើ​ដី​នៅ​សង្កាត់​កោះរ៉ុង និង​កោះ​រ៉ុង​សន្លឹម ក្នុង​ក្រុង​កោះ​រ៉ុង ខេត្ត​ព្រះសីហនុ​។ នេះ​បើ​តាម​សេចក្តី​ជូន​ដំណឹង​របស់​រដ្ឋបាល​ខេត្ត​ព្រះសីហនុ ចុះ​ថ្ងៃ​ទី ២៩​ខែ​មករា ដោយ​បញ្ជាក់​ថា ដី​ស្រប​ច្បាប់​ដែល​រដ្ឋ​ បាន​ធ្វើ​ប្រទានកម្ម​ជា​កម្មសិទ្ធិ​ដល់​ពលរដ្ឋ​រស់​នៅ​អចិន្ត្រៃយ៍​លើ​កោះ​រ៉ុង មាន​តែ ៦៣៧​ក្បាល​ដី​ប៉ុណ្ណោះ ហើយ ៥៨៤​ក្បាល​ដី​ទៀត ត្រូវ​ចាត់​ថា​មិន​ស្រប​ច្បាប់​។  

ផ្សាយពាណិជ្ជកម្ម

រដ្ឋបាល​ខេត្តព្រះសីហនុ បាន​បញ្ជាក់​ថា នៅសង្កាត់​កោះរ៉ុង និងសង្កាត់​កោះរ៉ុងសន្លឹម ក្នុងក្រុងកោះរ៉ុង មានក្បាលដី​ស្របច្បាប់​ត្រឹមតែ ៦៣៧ក្បាលដី ឬ ស្មើនឹងទំហំ ៥២៨,៣៧ហិកតាប៉ុណ្ណោះ។ ក្បាល​ដីនេះ ត្រូវចាត់ទុក​ថា ស្រប​ច្បាប់ ដោយសារ​រដ្ឋាភិបាលកម្ពុជា បានចេញអនុក្រឹត្យ ចុះថ្ងៃទី ៤ខែមេសា ឆ្នាំ ២០១៨ សម្រេចកាត់ដីទំហំ ៥២៨,៣៧ហិកតា នេះ ចេញពីដីឯកជនរបស់រដ្ឋកំណត់​ដោយ​អនុក្រឹត្យ​ឆ្នាំ ២០០៨ ដើម្បីប្រទានកម្ម​ជាកម្មសិទ្ធិ​ដល់​ពលរដ្ឋរស់នៅអចិន្ត្រៃយ៍នៅលើកោះរ៉ុង ចំនួន ២៩៨គ្រួសារ។

 

ដោយឡែកទីតាំងដី ចំនួន ៥៨៤ក្បាលដី គឺត្រូវបានចាត់​ទុកថាមិនស្របច្បាប់ ដោយសារ​គណៈកម្មការរដ្ឋបាល​ បានសម្រេចមិនផ្តល់​វិញ្ញាបនបត្រសម្គាល់ម្ចាស់អចលនវត្ថុ ដល់ពលរដ្ឋ​ទាំងនោះទេ ដោយ​សំអាងលើ​ហេតុផលចំនួន៤។ ហេតុផល​ទាំង ៤ គឺដោយសារ​ពលរដ្ឋ​ចំនួន ៣៦០ក្បាលដី មិន​មានអាសយដ្ឋានអចិន្ត្រៃយ៍លើកោះ។ ចំណែក ៧២ក្បាលដី គឺទីតាំងដីគ្មានទិន្ន័យ ខណៈ ១០៧ក្បាលដីទៀត ជាទីតាំងមានទំនាស់ និង​ ៤៥ក្បាលដី ជាទីតាំង​ដីពាក់ព័ន្ធនឹងគម្រោង​ព្រលានយន្តហោះ។

 

អភិបាល​ក្រុងកោះរ៉ុង បានប្រាប់វិទ្យុបារាំង នៅថ្ងៃអាទិត្យនេះថា ការចេញសេចក្តីជូនដំណឹងរបស់រដ្ឋបាលខេត្ត​ព្រះសីហនុពេលនេះ គឺដើម្បីជាការ​ដាស់តឿន​ដល់​ម្ចាស់ក្បាលដីចំនួន ៥៨៤ក្បាលដីមិនស្របច្បាប់នោះ ខណៈគេសង្កេតឃើញថា ពួកគាត់កំពុងមានសកម្មភាព​ទិញ លក់ដូរ ដែលផ្ទុយពីច្បាប់។ រដ្ឋបាល​ខេត្ត​ព្រះសីហនុ អះអាងថាមិនទទួលស្គាល់​លើការផ្ទេរសិទ្ធិ ការទិញ លក់ ជួល បញ្ចាំ ហ៉ីប៉ូតែក ប្រទានកម្មអច្ច័យ​ទាន សន្តតិកម្ម និងសិទ្ធិទាំងឡាយ ដែលពាក់ព័ន្ធនឹងក្បាលដីទាំង ៥៨៤នេះទេ។

 

ការ​មិនទទួល​ស្គាល់នេះ នឹងធ្វើឡើង​បើ​ទោះបីជាម្ចាស់ក្បាលដីទាំង ៥៨៤នេះ មាន​ឯកសារពាក់ព័ន្ធដូចជា លេងសម្គាល់ក្បាលដី លិខិត​ផ្ទេរសិទ្ធិ​កាន់កាប់ប្រើប្រាស់ដីធ្លី ពាក្យ​ស្នើសុំ​កាន់កាប់ប្រើប្រាស់ដីធ្លី កិច្ចសន្យា​ទិញ លក់ដោយ​មាន​ប្រថាប់ត្រាអាជ្ញាធរសង្កាត់ ឬ ប្រថាប់ត្រាមេធាវី ឬ កិច្ចសន្យា​ផ្ទេរសិទ្ធិ​ដីធ្លីជាលក្ខណៈឯកជន និងគំនូស​បង្ហាញទីតាំងដីក៏ដោយ។

 

បើតាម​រដ្ឋបាលខេត្ត​ព្រះសីហនុ ជនដែល​ដែល​ប៉ះពាល់​កម្មសិទ្ធិ​នៃទ្រព្យ​សម្បត្តិ​សាធារណៈ ឬ ជនណាដែលនៅក្រោយ​ខ្នងនៃអំពើញុះញង់ បំផុស​ចលនាបង្កឲ្យមាន​ភាពចលាចល នឹងត្រូវផ្តន្ទាទោស តាម​ច្បាប់​ភូមិបាល ដែលមានការពិន័យ​ជាប្រាក់ពី ៥លានរៀល ដល់ ៥០លានរៀល និង​អាចជាប់ពន្ធនាគារពី ១ឆ្នាំ ដល់ ៥ឆ្នាំទៀតផង​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI