កម្ពុជា-កូវីដ១៩

ខេត្ត​ចំនួន​៩​នៅ​តាម​បន្ទាត់​ព្រំដែន​កម្ពុជា ទទួល​បាន​វ៉ាក់សាំង​បង្ការ​ជំងឺ​កូវីដ​១៩

វ៉ាក់សាំង​បង្ការ​កូវីដ​១៩ ​ឈ្មោះ ស៊ីណូហ្វាម ដែល​ជា​ជំនួយ​របស់​ប្រទេស​ចិន ត្រូវ​បាន​បញ្ជូន​មក​ដល់​កម្ពុជា​ចំនួន​៦០​ម៉ឺន​ដូស​ក្នុង​ដំណាក់​កាល​ដំបូង កាល​ពី​ថ្ងៃ​ទី​០៧​កុម្ភៈ​២០២១​។
វ៉ាក់សាំង​បង្ការ​កូវីដ​១៩ ​ឈ្មោះ ស៊ីណូហ្វាម ដែល​ជា​ជំនួយ​របស់​ប្រទេស​ចិន ត្រូវ​បាន​បញ្ជូន​មក​ដល់​កម្ពុជា​ចំនួន​៦០​ម៉ឺន​ដូស​ក្នុង​ដំណាក់​កាល​ដំបូង កាល​ពី​ថ្ងៃ​ទី​០៧​កុម្ភៈ​២០២១​។ REUTERS - CINDY LIU
ដោយ៖ អ៊ឹម រចនា
១៨ នាទី

យ៉ាង​ហោច​ណាស់​មាន​ខេត្ត​ចំនួន​៩​នៅ​តាម​បន្ទាត់​ព្រំដែន​កម្ពុជា បាន​ទទួល​វ៉ាក់សាំង​បង្ការ​កូវីដ​១៩ ដែល​បញ្ជូន​ចេញ​ពី​រាជធានី​ភ្នំពេញ​។ នេះ​គឺ​ជា​ការ​គូស​បញ្ជាក់​របស់​ក្រសួង​សុខាភិបាល តាម​រយៈ​សេចក្ដី​ប្រកាស​ព័ត៌មាន​ចុះ​ថ្ងៃ​ទី​២១​កុម្ភៈ​នេះ​។ បើ​តាម​ក្រសួង​សុខាភិបាល កម្មវិធី​ចាក់​វ៉ាក់សាំង​នៅ​តាម​បណ្ដា​ខេត្ត​ទាំង​នេះ ចាប់​ផ្ដើម​ចាប់​ពី​ថ្ងៃ​ចន្ទ​ទី​២២​កុម្ភៈ។ ចំណែក​ការ​ចាក់​វ៉ាក់សាំង​នៅ​រាជធានី​ភ្នំពេញ នៅ​តែ​បន្ត​ធ្វើ​ដដែល​។

ផ្សាយពាណិជ្ជកម្ម

បន្ទាប់​ពី​រាជធានី​ភ្នំពេញ បេះដូង​នៃ​ព្រះរាជាណាចក្រ​កម្ពុជា ឥឡូវ​នេះ វ៉ាក់សាំង​បង្ការ​ជំងឺ​កូវីដ១៩ ឈ្មោះ ស៊ីណូហ្វាម ដែល​ជា​ជំនួយ​របស់​ប្រទេស​ចិន បាន​បញ្ជូន​ទៅ​ដល់​ខេត្ត​ចំនួន​៩​ផ្សេង​ទៀត​។ ជា​ខេត្ត​ដែល​ភាគ​ច្រើន​លើស​លប់​​មាន​ទីតាំង​នៅ​តាម​បន្ទាត់​ព្រំដែន​កម្ពុជា​ជាមួយ​ប្រទេស​ក្បែរ​ខាង ដូច​ជា ថៃ វៀតណាម និង ឡាវ​ជា​ដើម​។ ខេត្ត​ទាំង​៩​នោះ រួម​មាន៖ ខេត្ត​បាត់ដំបង បន្ទាយ​មាន​ជ័យ ឧត្តរមានជ័យ ប៉ៃលិន កោះកុង ព្រះសីហនុ ស្វាយរៀង ខេត្ត​ពោធិសាត់ និង​ខេត្ត​កែប​។

បើ​តាម​ក្រសួង​សុខាភិបាល កម្មវិធី​ចាក់​វ៉ាក់សាំង​នៅ​តាម​បណ្ដា​ខេត្ត​ទាំង​នេះ ចាប់​ផ្ដើម​ពី​ថ្ងៃ​ចន្ទ​ទី​២២​កុម្ភៈ រៀងរាល់​ថ្ងៃ​ធ្វើ​ការ ចាប់​ពី​ម៉ោង​៨​ព្រឹក​ដល់​ម៉ោង​៥​ល្ងាច​។ ក្នុង​នោះ នៅ​ខេត្ត​បាត់ដំបង ការ​ចាក់​វ៉ាក់សាំង​មាន​នៅ​មន្ទីរ​ពេទ្យ​ខេត្ត​បាត់ដំបង មន្ទីរ​ពេទ្យ​បង្អែក​មោងឬស្សី មន្ទីរ​ពេទ្យ​បង្អែក​សង្កែរ មន្ទីរ​ពេទ្យ​បង្អែក​សំពៅលូន និង​មន្ទីរ​ពេទ្យ​បង្អែក​ថ្ម​គោល​។ ចំណែក​នៅ​ខេត្ត​ឧត្តរមានជ័យ ធ្វើ​នៅ​មន្ទីរ​ពេទ្យ​ខេត្ត និង​មន្ទីរ​ពេទ្យ​បង្អែក​អន្លង់វែង​។ ការ​ចាក់​វ៉ាក់សាំង​នៅ​ខេត្ត​ប៉ៃលិន ធ្វើ​នៅមន្ទីរ​ពេទ្យ​ខេត្ត​ប៉ៃលិន។ រី​ឯ​នៅកោះ​កុង ធ្វើ​នៅ​មន្ទីរ​ពេទ្យ​កោះកុង និង​មន្ទីរ​ពេទ្យ​បង្អែក​ស្រែ​អំបិល​។

សម្រាប់​ខេត្ត​ព្រះសីហនុ ការ​ចាក់​វ៉ាក់សាំង​មាន​ធ្វើ​តែ​នៅ​មួយ​កន្លែង​ប៉ុណ្ណោះ គឺ​នៅ​មន្ទីរ​ពេទ្យ​ខេត្ត​តែ​ម្ដង​។ ចំណែក​នៅ​ខេត្ត​ស្វាយ​រៀង​វិញ គេ​អាច​ទៅ​ចាក់​វ៉ាក់សាំង​កូវីដ​១៩​នៅ​មន្ទីរ​ពេទ្យ​ចំនួន​៥ ដូច​ជា មន្ទីរ​ពេទ្យ​ខេត្ត​ស្វាយរៀង មន្ទីរ​ពេទ្យ​បង្អែក​រមាស​ហែក មន្ទីរ​ពេទ្យ​បង្អែក​ជីភូ មន្ទីរ​ពេទ្យ​បង្អែក​ស្វាយ​ទាប និង​មន្ទីរ​ពេទ្យ​បង្អែក​សាមគ្គី​រំដួល​។ ចំពោះ​ខេត្ត​ពោធិសាត់ ការ​ចាក់​វ៉ាក់សាំង​មាន​នៅ​មន្ទីរ​ពេទ្យ​ខេត្ត មន្ទីរ​ពេទ្យ​បង្អែក​បាកាន មន្ទីរ​ពេទ្យ​បង្អែក​ក្រគរ និង​មន្ទីរ​ពេទ្យ​បង្អែក​ក្រវ៉ាញ​។ ខេត្ត​ចុង​ក្រោយ​ដែល​ទទួល​បាន​វ៉ាក់សាំង​កូវីដ​១៩​ដែរ គឺ​ខេត្ត​កែប ដោយបើក​ការ​ចាក់​វ៉ាក់សាំងនៅ​មន្ទីរ​ពេទ្យ​កែប​។

សេចក្ដី​ជូន​ដំណឹង​របស់​ក្រសួង​សុខាភិបាល​បញ្ជាក់​ថា ការ​ចាក់​វ៉ាក់សាំង​នៅ​តាម​បណ្ដា​ខេត្ត​ទាំង​នេះ ផ្ដល់​អាទិភាព​ដល់​ក្រុម​គ្រូ​ពេទ្យ បុគ្គលិក​មន្ដ្រី​សុខាភិបាល​ទាំង​អស់ និង​កង​កម្លាំង​នគរបាល​ជាតិ ដោយ​ឈរ​លើ​គោលការណ៍​ស្ម័គ្រ​ចិត្ត​ និង​សម្រាប់​អ្នក​មាន​អាយុ​ចាប់​ពី​​១៨​ដល់​៥៩​ឆ្នាំ​។ សម្រាប់​ប្រជាពលរដ្ឋ​សាធារណជន​ដែល​មិន​ស្ថិត​នៅ​ក្នុង​ក្រុម​អាទិភាព​ទេ តែ​ស្ម័គ្រ​ចិត្ត​ចាក់​វ៉ាក់សាំង​ដែរ ក្រសួង​សុខាភិបាល​ស្នើ​ឱ្យ​រង់​ចាំ​បន្តិច​សិន ព្រោះ​វ៉ាក់សាំង​មាន​កំណត់​។ មួយ​វិញ​ទៀត ក្រសួង​ត្រូវ​ធានា​ថា អ្នក​ដែល​បាន​ទទួល​វ៉ាក់សាំង​ដូស​ទី​១​រួច អាច​​ទទួល​វ៉ាក់សាំង​ដូស​ទី​២​ទៀត ស្រប​ទៅ​តាម​បច្ចេកទេស​នៃ​វ៉ាក់សាំង​បង្ការ​ជំងឺ​កូវីដ​១៩​៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI