កម្ពុជា-ទេសចរណ៍

​ក្រោយ​បញ្ចប់​ការ​ជួសជុល ប្រាសាទ​កណ្ដាល​ស្រះស្រង់​បើក​ទទួល​ភ្ញៀវ​ទេសចរ​នៅ​ថ្ងៃ​ទី​២២​កុម្ភៈ

ប្រាសាទ​កណ្ដាល​ស្រះស្រង់ ដែល​ទើប​ជួស​ជុល​ចប់ និង​ត្រៀម​ទទួល​ស្វាគមន៍ភ្ញៀវ​ទេសចរ​នៅ​ថ្ងៃ​ទី​២២​កុម្ភៈ២០២១។
ប្រាសាទ​កណ្ដាល​ស្រះស្រង់ ដែល​ទើប​ជួស​ជុល​ចប់ និង​ត្រៀម​ទទួល​ស្វាគមន៍ភ្ញៀវ​ទេសចរ​នៅ​ថ្ងៃ​ទី​២២​កុម្ភៈ២០២១។ © អាជ្ញាធរជាតិ​អប្សរា
ដោយ៖ អ៊ឹម រចនា
១៤ នាទី

អាជ្ញាធរ​ជាតិ​អប្សរា នឹង​បើក​ឲ្យសាធារណជន​ចូល​ទស្សនា​ប្រាសាទ​កណ្ដាល​ស្រះស្រង់ ចាប់​ពី​ថ្ងៃ​ទី​២២​កុម្ភៈ​ឆ្នាំ​២០២១​ត​ទៅ​។ ការ​បើក​ឲ្យ​ចូល​ទស្សនា​នេះ ធ្វើ​ឡើង​បន្ទាប់​ពី​ប្រាសាទ​នេះ​ត្រូវ​ជួស​ជុល​ចប់​រួច​រាល់​ជា​ស្ថាពរ ដោយ​ចំណាយ​ពេល​ប្រមាណ​៩​ខែ​ ពោល​គឺចាប់​ពីខែ​មីនា ដល់​ខែ​ធ្នូ​ឆ្នាំ​២០២០​កន្លង​ទៅ​។

ផ្សាយពាណិជ្ជកម្ម

រលំ​បាក់​បែក​រាប់​រយ​ឆ្នាំ​​ដោយ​កត្តា​ធម្មជាតិ ឥឡូវ​នេះ ប្រាសាទ​កណ្ដាល​ស្រះស្រង់​បាន​ងើប​ឈរ​ឡើង​វិញ​ជា​ថ្មី និង​ចាប់​បើក​ឲ្យ​ភ្ញៀវ​ទេសចរ​ចូល​ទស្សនា​ពី​ថ្ងៃ​ទី​២២​ខែកុម្ភៈ​ត​ទៅ​។ លោក ឡុង កុសល អ្នក​នាំ​ពាក្យ​អាជ្ញាធរ​ជាតិ​អប្សរា បាន​គូស​បញ្ជាក់​ប្រាប់​វិទ្យុ​បារាំង​អន្ដរជាតិ RFI ថា អាជ្ញាធរ​ជាតិ​អប្សរា បាន​សាងសង់​កូន​ស្ពាន​ដែក​បណ្ដោះ​អាសន្ន​មួយ​សម្រាប់​សម្រួល​កា​រធ្វើ​ដំណើរ​របស់​អ្នក​ទេសចរ​ទៅ​ទស្សនា​ប្រាសាទ​កណ្ដាល​ស្រះស្រង់​។ ប៉ុន្តែ​កូន​ស្ពាន​ដែក​នេះ នឹង​ត្រូវ​រុះរើ​ចេញ​វិញ​ក្នុង​រយៈ​ពេល​មួយ​សប្ដាហ៍​។ សម្រាប់​រយៈ​ពេល​តទៅ​មុខ​ទៀត លោក ឡុង កុសល ឲ្យ​ដឹង​ថា អាជ្ញាធរ​ជាតិអប្សរា​នឹង​គិតគូរ​ស្វែង​រក​មធ្យោបាយ​​ធ្វើ​ដំណើរ​បែប​ផ្សេង ដើម្បី​អាច​ឲ្យ​ប្រជាពលរដ្ឋ​ទៅ​​ទស្សនា​ស្វែង​យល់​អំពី​ប្រាសាទ​កណ្ដាល​ស្រះស្រង់​នេះ​បាន​។

មាន​ទីតាំង​ស្ថិត​នៅ​ខាងកើត​នៃ​ប្រាសាទ​បន្ទាយ​ក្ដី ប្រាសាទ​កណ្ដាល​ស្រះស្រង់ត្រូវ​បាន​អ្នក​ជំនាញ​នៃ​អាជ្ញាធរ​ជាតិ​អប្សរា ចាប់​ផ្ដើម​បើក​ការដ្ឋាន​ជួស​ជុល​ឡើង​វិញ​​នា​​ខែ​មីនា​ឆ្នាំ​២០២០។ ការ​ជួសជុល​ប្រាសាទ​នេះ​មិន​មែន​ជា​ការ​ងារ​ងាយ​ស្រួល​ប៉ុន្មាន​ទេ ដោយ​ហេតុ​ថា ប្រាសាទ​នេះ​មាន​ទីតាំង​ស្ថិត​នៅ​ចំ​កណ្ដាល​ស្រះស្រង់​តែ​ម្ដង​។ ក្នុង​នោះ អ្នក​ជំនាញ​ត្រូវ​ធ្វើ​ទំនប់​ហ៊ុំ​ព័ទ្ធ​តំបន់​ប្រាសាទ ហើយ​បូម​ទឹក​ទាំង​នោះ​ចេញ ទើប​អាច​ចាប់​ផ្ដើមធ្វើ​កំណាយ​និង​ជួស​ជុល​ប្រាសាទ​បាន​។

ក្នុង​ដំណើរកាល​ជួស​ជុល​ប្រាសាទ​កណ្ដាល​ស្រះស្រង់​នេះ គេ​នៅ​ចាំ​បាន​ថា កាល​ពី​ខែ​មេសាឆ្នាំ​២០២០ ក្រុម​កំណាយបុរាណ​វិទ្យា បាន​រកឃើញ​ចម្លាក់អណ្ដើកធ្វើ​ពី​ថ្មភក់​មួយ​គូ រូប​ចម្លាក់​ក្បាល​នាគ​មួយ និងត្រី​សូល៍ ព្រម​ទាំង​​គ្រាប់​​ខ្វាត​ពណ៌​ស​ជា​ច្រើន​គ្រាប់​។ វត្ថុបុរាណ​ ដោយ​ចំពោះ​ចម្លាក់​អណ្ដើក​ធ្វើ​ពី​ថ្ម​ភក់ដែល​ធ្វើ​កំណាយ​រក​ឃើញនោះ​ ត្រូវ​បាន​អាជ្ញាធរ​ជាតិ​អប្សរា​យក​​​ទៅ​រក្សា​ទុក​ដើម្បី​សិក្សា​បន្ត​ ដោយ​ដាក់​ត្រឡប់​ទៅកន្លែង​ដើម​វិញ​នូវ​វត្ថុ​ចម្លង​ដែល​មានទម្រង់​ដូច​គ្នា​ទាំង​ស្រុង​។

សូម​ជម្រាប​ជូន​ថា ប្រាសាទ​កណ្ដាល​ស្រះស្រង់ ដែល​កសាង​ឡើង​នៅ​សតវត្សរ៍​ទី​១២ ក្នុង​រាជ្យ​ព្រះ​បាទ​ជ័យវរ្ម័ន​ទី​៧ បាន​ចំណាយ​ពេល​ជួស​ជុល​អស់​ប្រមាណ​​៩​ខែ​ ពោល​គឺចាប់​ពីខែ​មីនា ដល់​ខែ​ធ្នូ​ឆ្នាំ​២០២០​កន្លង​ទៅ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI