ទូតវៀតណាមអួតថា មន្ទីរពេទ្យជោរៃ មាន«សមត្ថភាព»ទើបត្រូវបានជ្រើសរើសត្រៀមព្យាបាលអ្នកកើតកូវីដ១៩

ការសម្រេចរបស់ថ្នាក់ដឹកនាំកំពូលកម្ពុជានេះ បានធ្វើឱ្យមន្ទីរពេទ្យជោរៃ របស់វៀតណាមក្លាយជាមន្ទីរពេទ្យឯកជនដំបូងគេ ដែលនឹងត្រូវបើកព្យាបាលអ្នកជំងឺកូវីដ១៩នៅក្នុងប្រទេសកម្ពុជា។ ស្ថានទូតវៀតណាមប្រចាំនៅកម្ពុជា បានលើកឡើងថា មន្ទីរពេទ្យជោរៃពិតជាមានកិត្តិយសខ្លាំងចំពោះការជ្រើសរើសរបស់ប្រមុខរដ្ឋាភិបាលកម្ពុជានេះ ។ ស្ថានទូតវៀតណាមថែមទាំងចាត់ទុកថា ការសម្រេចរបស់លោកនាយករដ្ឋមន្រ្តី ហ៊ុន  សែន គឺបានបង្ហាញឲ្យឃើញនូវប្រ​ជាប្រិយភាព សមត្ថភាព និងគុណភាពកម្រិតអន្តរជាតិនៃមន្ទីរពេទ្យជោរ៉ៃនេះ។

លោកនាយករដ្ឋមន្រ្តី ហ៊ុន សែន កាលពីថ្ងៃទី២១ ខែកុម្ភៈ បានបញ្ជាឱ្យក្រសួងសុខាភិបាលរៀបចំមន្ទីរពេទ្យជោរៃ ដែលជាមន្ទីរពេទ្យឯកជនរបស់ប្រទេសវៀតណាមសម្រាប់ត្រៀមទទួលព្យាបាលអ្នកជំងឺកូវីដ១៩ថ្មីនៅពេលមានការកើនឡើងជាគំហុកនោះ។ បន្ថែមលើនេះ និងជាអាទិភាព លោកហ៊ុន សែន ក៏បានបញ្ជាឱ្យលោក ទៀ បាញ់ រដ្ឋមន្រ្តីក្រសួងការពារជាតិរៀបចំមន្ទីរពេទ្យទាហាន ឬ ព្រះកេតុមាលា សម្រាប់ត្រៀមព្យាបាលអ្នកជំងឺកូវីដ១៩ថ្មីនេះដូចគ្នាផងដែរ។

បទបញ្ជារបស់លោកនាយករដ្ឋមន្រ្ តីហ៊ុន សែន នេះ ធ្វើឡើងស្របពេលដែលកម្ពុជាបានផ្ទុះករណីឆ្លងជំងឺកូវីដ១៩ក្នុងសហគមន៍ជាថ្មីម្តងទៀត ដែលប្រមុខរដ្ឋាភិបាលកម្ពុជាហៅថាជា ព្រឹត្តិការណ៍២០កុម្ភៈ។ ព្រឹត្តិការណ៍២០កុម្ភៈនេះ បានផ្ទុះឡើងតាមរយៈការឆ្លងរដឹកតគ្នាលើជនជាតិចិន ហើយបន្តទៅជនជាតិវៀតណាម និងមកលើជនជាតិកម្ពុជា។ ជាការកត់សម្គាល់ ព្រឹត្តិការណ៍២០ កុម្ភៈនេះ  និងការសម្រេចជ្រើសរើសមន្ទីរពេទ្យវៀតណាម គឺសម្រាប់ត្រៀមជួយព្យាបាលអ្នកឆ្លងជំងឺកូវីដ១៩នេះ កើតឡើងស្របពេលដែលអាជ្ញាធរសុខាភិបាលកម្ពុជាកំពុងអនុវត្តការចាក់វ៉ាក់សាំងបង្ការជំងឺកូវីដ១៩ ដែលជាជំនួយរបស់ចិនដល់មន្រ្តីរាជការស៊ីវិល និងយោធារបស់កម្ពុជា។

ក្រៅពីមន្ទីរពេទ្យត្រៀមទាំងពីររបស់កម្ពុជា និងវៀតណាមនេះ បច្ចុប្បន្ននេះ នៅរាជធានីភ្នំពេញអ្នកដែលឆ្លងជំងឺកូវីដ១៩ទាំងជនជាតិខ្មែរ និងបរទេសត្រូវបានបញ្ជូនទៅព្យាបាលនៅមន្ទីរពេទ្យរបស់រដ្ឋមួយចំនួន។ ក្នុងនោះ មានជាអាទិ៍ មន្ទីរពេទ្យមិត្តភាពខ្មែរ-សូវៀត មណ្ឌលសុខភាព​ចាក់រ​អង្រែ​ក្រោម និង​​មជ្ឈមណ្ឌល​​​​​​​​​​​​​​​​​​​​​​​​​​​​កម្ចាត់​មេរោគ​របេង និង​ហង់សិន៕