កម្ពុជា-កូវីដ១៩

កម្ពុជា៖ រកឃើញកូវីដ១៩បំប្លែងថ្មី៦ករណី ៣ករណីនាំចូល និង៣ទៀតព្រឹត្តិការណ៍សហគមន៍២០កុម្ភៈ

ប្រជាជនកម្ពុជាគ្រប់ៗរូបត្រូវការពារខ្លួនពីវីរុសកូវីដ១៩ (រូបភាពតំណាង)
ប្រជាជនកម្ពុជាគ្រប់ៗរូបត្រូវការពារខ្លួនពីវីរុសកូវីដ១៩ (រូបភាពតំណាង) REUTERS - STRINGER
ដោយ៖ ហេង សុខនី
១៤ នាទី

ក្រសួង​សុខាភិបាល​នៅ​ព្រឹក​ថ្ងៃ​ទី​២៣​ ខែ​កុម្ភៈ​នេះ ​បាន​រកឃើញ​វីរុស​កូវីដ១៩​បំប្លែងថ្មី​ ៣​ករណី ​ក្នុង​ចំណោម​អ្នក​ឆ្លងជំងឺ​កូវីដ១៩​ចំនួន​២៥​នាក់ ​ដែល​ពាក់ព័ន្ធ​ព្រឹត្តិការណ៍​សហគមន៍​២០​កុម្ភៈ​។ ​នេះ​ជា​ករណី​ទី២​ហើយ​ ដែល​កម្ពុជា​រកឃើញ​វីរុស​កូវីដ១៩​បំប្លែង​ថ្មី ​បន្ទាប់​ពី​លើកទី១​រក​ឃើញ​ លើ​ជនជាតិ​ឥណ្ឌា​២​នាក់​ និង​ជនជាតិ​ចិន​ម្នាក់​ ធ្វើ​ដំណើរ​តាម​ជើង​ហោះហើរ​ចូល​មក​កម្ពុជា​ កាល​ពី​ថ្ងៃ​ទី​១៥​ ខែ​កុម្ភៈ​។

ផ្សាយពាណិជ្ជកម្ម

ក្នុងចំណោម មនុស្ស៦នាក់ ដែលរកឃើញថាមានវីរុសកូវីដ១៩បំប្លែងថ្មី ៣នាក់ជាជនជាតិខ្មែរ និង៣នាក់ទៀតជាជនជាតិបរទេស។ បច្ចុប្បន្នអ្នកជំងឺកូវីដ១៩បំប្លែងថ្មី ទាំង៦នាក់កំពុងសម្រាកព្យាបាល នៅមជ្ឈមណ្ឌលកម្ចាត់រោគរបេង និងហង់សិន និងនៅមន្ទីរពេទ្យក្នុងរាជធានីភ្នំពេញ។

បើតាមក្រសួងសុខាភិបាល ការរកឃើញវីរុសកូវីដ១៩បំប្លែងថ្មី(ប្រភេទSARS-CoV-2 UK Variant) សរុបចំនួន ៦ករណីនេះ នាំឱ្យមានការព្រួយបារម្ភ ហើយក្រសួងជំនាញបានបន្តអំពាវនាវម្តងហើយម្តងទៀត ឱ្យប្រជាពលរដ្ឋប្រុងប្រយ័ត្ន ព្រោះវីរុសបំប្លែងនេះឆ្លងលឿន និងសាហាវជាងមុន។ បន្ថែមលើនេះ លោកស្រីឱ វណ្ណឌីន អ្នកនាំពាក្យក្រសួងសុខាភិបាល បានថ្លែងបញ្ជាក់ថា ករណីវីរុសកូវីដ១៩បំប្លែងថ្មី ឆ្លងលឿន និងមានលទ្ធភាពអាចបន្តឆ្លងនៅក្នុងសហគមន៍ ប្រសិនបើប្រជាពលរដ្ឋ មិនបានយកចិត្តទុកដាក់អនុវត្តវិធានការសុខាភិបាលឱ្យបានត្រឹមត្រូវទេនោះ។

សូមបញ្ជាក់ជូនថា ៦ករណីនៃវីរុសកូវីដ១៩បំប្លែងថ្មី ត្រូវបានរកឃើញស្របពេលកម្ពុជាកំពុងប្រឈមនឹងព្រឹត្តិការណ៍សហគមន៍២០កុម្ភៈ។ រាប់ចាប់តាំងពីថ្ងៃផ្ទុះឡើងព្រឹត្តិការណ៍នេះរហូតដល់ថ្ងៃទី២៣ កុម្ភៈនេះ កម្ពុជាបានរកឃើញករណីឆ្លងជាបន្តបន្ទាប់ចំនួន១០១នាក់ហើយ ត្រឹមតែរយៈពេល៤ថ្ងៃប៉ុណ្ណោះ។ ការរកឃើញករណីឆ្លងថ្មីនៅថ្ងៃនេះ ក្រសួងបានរកឃើញមានចំនួន ២៣នាក់ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ និង ០២នាក់ជាករណីនាំចូល។ ក្នុងចំណោមនោះ មាន៣ករណីជាវីរុសកូវីដ១៩បំប្លែងថ្មី ដែលបានរកឃើញលើជាជនជាតិខ្មែរ ២នាក់ជាអ្នកដែលធ្វើការនៅក្លិបកម្សាន្ត N8 និងម្នាក់ទៀតជាអ្នករស់នៅក្នុងរាជធានីភ្នំពេញ។

ជាការបញ្ជាក់បន្ថែមនៅក្នុងសេចក្តីជូនដំណឹងរបស់ក្រសួងសុខាភិបាលដដែល ក្នុងចំណោមអ្នកឆ្លងចំនួន២៣នាក់នេះ មានស្រ្តីខ្មែរម្នាក់ ដែលកន្លងមកមិនព្រមទៅសម្រាកព្យាបាលនៅពេទ្យ និងជនជាតិចិនម្នាក់ទៀត មិនអាចទាក់ទងបាន តែពេលនេះបានបញ្ចូន និងដាក់ឱ្យព្យាបាលនៅក្នុងមន្ទីរពេទ្យរួចរាល់ហើយ។

គិតត្រឹមថ្ងៃទី២៣ ខែកុម្ភៈនេះ កម្ពុជារកឃើញអ្នកមានវិជ្ជមានជំងឺកូវីដ-១៩ ចំនួន៥៩៣នាក់ ក្នុងនោះ​អ្នកជាសះស្បើយចំនួន៤៧៥នាក់ និងអ្នកកំពុងសម្រាកព្យាបាលចំនួន១១៦នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI