គេចវេះធ្វើចត្តាឡីស័ក៖លោកហ៊ុន សែន ឯកភាពឱ្យបណ្តេញចេញជនបរទេស និងអនុវត្តច្បាប់ចំពោះជនជាតិខ្មែរ

ចារដោយផ្ទាល់ដៃ លោកហ៊ុន សែន បានយល់ព្រមឱ្យអនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩ដែលមានលោកឌី វិជ្ជា អគ្គស្នងរងនគរបាលជាតិជាប្រធានអនុវត្តបណ្តេញចេញ និងហាមចូលប្រទេសកម្ពុជាលើជនបរទេសណាដែលមិនសហការផ្តល់ការសម្ភាសន៍ ផ្តាច់ទំនាក់ទំនង និងរត់គេចមិនព្រមធ្វើចត្តាឡីស័ក។ ចំពោះជនជាតិខ្មែរ អនុគណៈកម្មការនេះនឹងចាត់វិធានការទៅតាមច្បាប់ដែលកំណត់តែម្តង។ ដោយឡែក ចំពោះទីតាំងណាដែលមិនសហការចំពោះកិច្ចប្រតិបត្តិការស្រាវជ្រាវ និងតាមដានបុគ្គលផ្ទុកជំងឺកូវីដ១៩បណ្តាលឱ្យប្រតិ​បត្តិការមានភាពយឺតយ៉ាវ ​និងខ្វះចន្លោះវិញ លោកហ៊ុន សែន ក៏ឯកភាពឱ្យដកហូតអាជ្ញាប័ណ្ណ និងបិទអាជីវកម្មក្នុងទីតាំងផងដែរ។

ជុំវិញបញ្ហានេះ លោកឌី វិជ្ជា មិនទាន់អាចទាក់ទងសួរព័ត៌មានបន្ថែមបាននៅឡើយទេនៅព្រឹកថ្ងៃអង្គារនេះ។ ចំណែក លោកឆាយ គឹមឃឿន ដែលជាអ្នក​នាំ​ពាក្យ​អគ្គ​ស្នង​ការ​នគរ​បាល​ជាតិ​វិញប្រើពាក្យថា«ប្រហែល»ជាមានជាមុខសញ្ញាជនបរទេសត្រូវបណ្តេញចេញ និងជនជាតិខ្មែរត្រូវអនុវត្តច្បាប់ហើយ ទើបលោកឌី វិជ្ជាបានស្នើឡើងបែបនេះ។ ប៉ុន្តែ លោកក៏អះអាងថា ការស្នើរបស់លោកឌី វិជ្ជានេះ គឺជាការសុំគោលការណ៍បង្ការជាមុនដែលអាចនឹងអនុវត្តបានភា្លមៗនៅពេលដែលមានករណីមិនសហការណាមួយកើតឡើង។

ជាការកត់សម្គាល់ ក្រោយការឯកភាពរបស់លោកនាយករដ្ឋមន្រ្តីហ៊ុន​ សែនប៉ុន្មានម៉ោងនេះ ក្រសួងសុខាភិបាលកម្ពុជាក៏បានប្រកាសឱ្យដឹងពីជនជាតិចិនម្នាក់ដែលរកឃើញមានឆ្លងជំងឺកូវីដ១៩ បានផ្តាច់ទំនងទំនង ដោយអាជ្ញាធរសុខាភិបាលមិនអាចទាក់ទងរូបគេ ដើម្បីយកមកព្យាបាលនៅមន្ទីរពេទ្យបាន។ ប៉ុន្តែ ក្រោយមកបន្តិច ក៏បានរកឃើញ ហើយយកទៅព្យាបាល។ ចំណែក ស្រ្តីជាជនជាតិចិន៤នាក់ផ្សេងទៀតដែលបានរត់ចេញពីការធ្វើចត្តាឡីស័ក ហើយបាននាំជំងឺកូវីដ១៩ទៅចម្លងចូលក្នុងសហគមន៍បង្កើតចេញជាព្រឹត្តិការណ៍២០កុម្ភៈ ក៏ទំនងអាចជាមុខសញ្ញារបស់អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩។

ក្រៅពីនេះ សន្តិសុខជនជាតិខ្មែរ២នាក់ដែលបានជួយរំដោះស្រ្តីជនជាតិចិនចេញពីការធ្វើចត្តាឡីស័កក៏ប្រហែលជាមិនអាចគេចផុតពីការអនុវត្តច្បាប់តាមអនុក្រឹត្យថ្មីផងដែរ។ អនុក្រឹត្យ​ថ្មី​បានកំណត់ថា អ្នក​ដែល​ជួយ​សម្រួល​ដល់​អ្នក​គេច​ចេញពី​កន្លែង​ធ្វើ​ចត្តាឡីស័​ក គឺត្រូវ​ពិន័យ​ជាទឹក​ប្រាក់​ចាប់ពី ១០ ០០០ ០០០ រៀល ដល់ ៥០ ០០០ ០០០ រៀល ដោយ​មិនទាន់​គិត​បញ្ចូល​ពី​ទោស​ព្រហ្មទណ្ឌ​ផ្សេងទៀត​នោះ​ឡើយ៕