កម្ពុជា-កូវីដ១៩

ព័ត៌មានក្លែងក្លាយ៖ រដ្ឋាភិបាលបណ្តេញនាយកកាសែតចិន Angkor Today ចេញពីកម្ពុជា

សារព័ត៌មានអង្គរធូដេ ដែលត្រូវបានក្រសួងព័ត៌មានសម្រេចលុបអាជ្ញាបណ្ណ
សារព័ត៌មានអង្គរធូដេ ដែលត្រូវបានក្រសួងព័ត៌មានសម្រេចលុបអាជ្ញាបណ្ណ © Internet

ក្រសួង​មហាផ្ទៃ​កម្ពុជា​នៅថ្ងៃ​ទី​២៥​ខែ​កុម្ភៈ​នេះ បាន​សម្រេច​បណ្តេញ​ នាយក​សារព័ត៌មាន​ Angkor Today​ ដែល​ជា​ជនជាតិចិន ​ចេញពី​ប្រទេស​កម្ពុជា​ហើយ​។ ​ចំណាត់ការ​របស់​អាជ្ញាធរ​កម្ពុជា​ដូច្នេះ​ ធ្វើឡើង​ ក្រោយ​ការចាប់ខ្លួន​នាយក​សារព័តមាន​អនឡាញ​រូបនេះ ​កាលពី​ថ្ងៃពុធ​ម្សិលមិញ​ ពី​បទ​ផ្សព្វផ្សាយ​ព័ត៌មាន​មិនពិត​ ពាក់ព័ន្ធ​ទៅនឹង​ការសរសេរ​ថា​«កម្ពុជា​លួចលក់​វ៉ាក់សាំង​ដែលជា​ជំនួយ​របស់​ចិន​»

ផ្សាយពាណិជ្ជកម្ម

មិនដល់២៤ម៉ោងក្រោយការចាប់ខ្លួន លោក Shen Kaidong នាយកកាសែតភាសាចិនឈ្មោះ Angkor Today ត្រូវបានរដ្ឋមន្ត្រីក្រសួងមហាផ្ទៃកម្ពុជាលោក ស ខេង ចុះហត្ថលេខាលើសេចក្តីប្រកាសមួយបណ្តេញចេញពីប្រទេសកម្ពុជា ដោយទុកពេលយ៉ាងយូរ៧ថ្ងៃ។ ការសម្រេចនេះ គឺធ្វើឡើងក្រោយអ្នកទទួលខុសត្រូវកាសែតមួយនេះ ចុះផ្សាយជាភាសាចិនថា «កម្ពុជាបានយកវ៉ាក់សាំងកូវីដ១៩ ដែលជាជំនួយរបស់ចិនមកលក់ក្នុងតម្លៃថ្លៃ»

លោក Shen អាយុ៥២ឆ្នាំ ដែលចូលមកកម្ពុជាកាលពីជាង១០ឆ្នាំមុន ត្រូវបានកម្លាំងសមត្ថកិច្ចចាប់ឃាត់ខ្លួននៅខេត្តសៀមរាប កាលពីល្ងាចថ្ងៃទី២៤ ខែកុម្ភៈម្សិលមិញ ក្រោមបទចោទពីការផ្សាយព័ត៌មានបំភ្លៃការពិត មានចេតនាទុច្ចរិត ធ្វើឲ្យអន្តរាយដល់សុខភាពសាធារណៈ បង្កភាពចលាចលនៅក្នុងសង្គម ដែលអាចធ្វើឲ្យប៉ះពាល់ដល់សន្តិសុខជាតិ។ នៅថ្ងៃនេះដែរ ក្រសួងព័ត៌មាន ក៏បានសម្រេចលុបអាជ្ញាបណ្ណ កាសែតអនឡាញ Angkor Today នេះ ដែលពីមុនកាសែតនេះឈ្មោះថា Angkor Times ហើយមានម្ចាស់អាជ្ញាបណ្ណជាជនជាតិខ្មែរ គឺឈ្មោះ អ៊ុង គង្គា។

ស្របពេលជាមួយគ្នានេះ ស្ថានទូតចិនប្រចាំនៅកម្ពុជា ក៏បានចេញមកបំភ្លឺដែរថា ស្ថានទូតក៏បានទទួលសេចក្តីរាយការណ៍ពីពលរដ្ឋចិន ដែលកំពុងរស់នៅកម្ពុជា ពីការផ្សព្វផ្សាយជាភាសាចិនលក់វ៉ាក់សាំង ដែលជាជំនួយរបស់ចិនតាមរយៈសារបោកប្រាស់នានាលើបណ្តាញសង្គម និងទូរស័ព្ទដៃ ដែលថាមានការចាក់វ៉ាក់សាំងការពារកូវីដ១៩ គ្រាន់តែចំណាយត្រឹម១២០ដុល្លារ ឬ៤៥០ដុល្លារប៉ុណ្ណោះ។

ស្ថានទូតចិនបញ្ជាក់ថា មិនមានវ៉ាក់សាំងជំនួយចិនហូរចូលទីផ្សារឡើយ ហើយវ៉ាក់សាំងត្រូវបានគ្រប់គ្រងបានយ៉ាងល្អ ការគ្រប់គ្រង និងការដឹកជញ្ជូនវ៉ាក់សាំង ត្រូវបានធ្វើឡើងតាមនីតិវិធីតឹងតែង និងម៉ត់ចត់បំផុត។

ជាការកត់សម្គាល់ ការផ្សាយព័ត៌មានមិនពិត គឺជារឿងដ៏រសើបនៅក្នុងអំឡុងពេលដែលកម្ពុជា កំពុងប្រឈមនឹងការផ្ទុះឡើងនៃការឆ្លងកូវីដសហគមន៍លើកទី៣ ដ៏គួរឲ្យព្រួយបារម្ភ។ ជាមួយគ្នានេះ លោក Shen Kaidong គឺជាអ្នកកាសែតបរទេសទី១ហើយ ដែលត្រូវបានបណ្តេញចេញពីកម្ពុជាពីបទផ្សាយព័ត៌មិនពិត នៅពេលដែលប្រទេសនេះ កំពុងដំណើរការចាក់វ៉ាក់សាំង ដែលជាជំនួយចិនដំបូង ជុំទី១ចំនួន៦០ម៉ឺនដូស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI