កម្ពុជា-សង្គមស៊ីវិល

Human Right Watch ស្នើឲ្យដកចេញមាត្រាដែលដាក់ទោស២០ឆ្នាំ ចំពោះអ្នកល្មើសនឹងច្បាប់ទប់ស្កាត់កូវីដ

Phil Robertson នាយករងប្រចាំតំបន់អាស៊ីនៃអង្គការឃ្លាំមើលសិទិ្ធមនុស្ស Human Right Watch
Phil Robertson នាយករងប្រចាំតំបន់អាស៊ីនៃអង្គការឃ្លាំមើលសិទិ្ធមនុស្ស Human Right Watch AFP via Getty Images - ROMEO GACAD

អង្គការ​ឃ្លាំមើល​សិទិ្ធមនុស្ស ​Human Right Watch​ បាន​បរិហារ​ថា ​រដ្ឋាភិបាល​កម្ពុជា​គួរ​តែ​ដក​សេចក្តី​ព្រាង​ច្បាប់​មាន​លក្ខណៈ​តឹងរឹង​ដែលអនុញ្ញាត​ឱ្យ​ដាក់​ពន្ធនាគារ​រយៈពេល​២០​ ឆ្នាំ ​និង​ការ​ដាក់ទណ្ឌកម្ម​ មិន​សមាមាត្រ​ផ្សេងទៀត​ចំពោះ​ការ​រំលោភ​លើ​វិធានការ​ដែលទាក់ទង​នឹង​កូវីដ-១៩​។ ការ​ស្នើ​នេះ​ធ្វើ​ឡើង​ភ្លាម​ៗ បន្ទាប់ពី​រដ្ឋ​សភា​កម្ពុជាបាន​អនុម័តសេចក្តី​ព្រាង​ច្បាប់​​ស្តីពី​វិធានការ​ទប់ស្កាត់​ការឆ្លង​រាលដាល​នៃ​ជំងឺ​កូវីដ-១៩ ​និង​ជំងឺ​ឆ្លង​កាច​សាហាវ​ និង​ប្រកប​ដោយ​គ្រោះថ្នាក់​ធ្ងន់ធ្ងរ​ផ្សេងទៀត​ កាលពី​ម្សិលមិញ​។

ផ្សាយពាណិជ្ជកម្ម

«រដ្ឋាភិបាលកម្ពុជាបានអនុម័តនូវច្បាប់គ្រាអាសន្នដែលរំលោភបំពានរួចទៅហើយ ហើយឥឡូវនេះបានបង្កើតច្បាប់ទាក់ទងនឹងកូវីដ-១៩ ដែលមិនច្បាស់និងទូលំទូលាយ ហើយនឹងធ្វើឱ្យប៉ះពាល់ដល់សិទ្ធិរបស់សកម្មជននិងអ្នកប្រឆាំង»។ នេះជាការលើកឡើង​របស់ លោក Phil Robertson នាយករងប្រចាំ​តំបន់​អាស៊ីនៃអង្គការឃ្លាំមើលសិទិ្ធមនុស្សHuman Right Watch។

ក្នុងសេចក្ដី​ព្រាង​ច្បាប់​ដែល​មាន ​៦ ជំពូក​ស្មើនឹង ១៨ ​មាត្រា​ បាន​ចែងពី​ការ​ដាក់​ទណ្ឌកម្ម​រដ្ឋបាល ​និងព្រហ្ម​ទណ្ឌ​លើ​ បុគ្គល​ដែល​មិន​អនុវត្ត​តាម​វិធានការ​សុខាភិបាល​ ដោយ​ប្រឈម​នឹង​ទោសជាប់​ពន្ធនាគារ​​អតិប្បរមា ១០ ឆ្នាំ ឬរហូតដល់ ​២០ ឆ្នាំ​ បើ​សិន​ជា​ការ​ចម្លង​នេះ​ធ្វើឡើង​ដោយ​ចេតនា​ ឬមាន​ការរៀបចំ​ជា​ក្រុម​ ឬ​អង្គការ​ចាត់​តាំង។ នេះ​បើ​តាម​មាត្រា៩នៃច្បាប់ថ្មីនេះ។

ចំណែកមាត្រា ៨ ​នៃ​សេចក្ដី​ព្រាង​ច្បាប់​នេះ បាន​ចែង​អំពី​ការ​ដាក់​ពន្ធនាគារ​ដល់​ទៅ ​៥ ឆ្នាំ​ និង​រង​ពិន័យ​ជា​ប្រាក់​ដល់​ទៅ​ ២០​ លាន​រៀល សម្រាប់​បុគ្គល​ដែល​មាន​ជំងឺ​ហើយ​រត់គេច​ពី​មន្ទីរ​សម្រាក​ព្យាបាល ​និង​អាច​ជាប់​ពន្ធនាគារ​ដល់ទៅ ១០ ឆ្នាំ​ បើ​សិន​ជា​ចម្លង​មេរោគ​ដល់​អ្នក​ដទៃ​អំឡុង​ពេល​រត់​គេច។

បើតាម​អង្គការឃ្លាំមើលសិទិ្ធមនុស្ស សេចក្តីព្រាងច្បាប់នេះមានលក្ខណៈតឹងរឹងនិងមិនច្បាស់លាស់​ដែលបើក​ច្រកឲ្យ​អាជ្ញាធរអាចរំលោភបំពានបានយ៉ាងងាយនិងគ្មានយន្តការត្រួតពិនិត្យដោយ​ឯករាជ្យឬនីតិវិធីការពារណាមួយឡើយ។

យ៉ាងណាក៏ដោយ មន្ត្រីក្រសួង​យុត្តិធម៌កម្ពុជា បាន​ពន្យល់ថា ច្បាប់​នេះ​ត្រូវ​បាន​ធ្វើ​ឡើង​​ទៅ​តាម​តម្រូវ​ការ​ចាំបាច់ដើម្បី​គ្រប់​គ្រង​ស្ថានការណ៍ ​នៅគ្រា​ដែល​ជំងឺកូវីដ-១៩​ កំពុង​ឆ្លង​រាលដាល​ទៅ​ដល់​សហគមន៍ ហើយ​ថា​ អនុក្រឹត្យ​ដែល​មានកន្លង​មក​គឺ​គ្រាន់​តែ​ផាក​ពិន័យមិនអាច​ធ្វើ​ឲ្យ​អ្នក​ល្មើស​អាចរាង​ចាល​បានឡើយ៕​

​លោក​ ហ៊ុន សែន បាន​បន្ថែម​ថា អនុក្រឹត្យ​ដែល​លោក​បាន​ចុះហត្ថលេខា​កន្លង​មក មិន​អាចកំណត់ការ​ដាក់​ទោស​ទណ្ឌ​ជាប់​ពន្ធនាគារ​សម្រាប់​អ្នកបំពាន​និង​អ្នកផ្សំ​គំនិត​បាន​ឡើយ។

​«អ៊ីចឹង ម្ខាង យើង​ប្រើ​វិធាន​ការ​អប់រំ ម្ខាង ​យើង​ប្រើ​វិធានការ​រដ្ឋបាល​និង​ម្ខាង​ទៀត យើង​ក៏ត្រូវ​ប្រើ​ច្បាប់​ដើម្បី​នឹង​ធ្វើការ​គ្រប់គ្រង​ទៅ​លើ​ជំងឺនេះ​ផង​ដែរ»។​

​អនុក្រឹត្យ​ចុះថ្ងៃទី ១៨ ​ខែកុម្ភៈ​របស់​លោក​នាយក​រដ្ឋមន្ត្រី ហ៊ុន សែន នេះ​ ​ត្រូវ​បាន​យោងយក​ទៅ​ផាកពិន័យ​បុរស​ម្នាក់រស់​នៅសង្កាត់​លេខ ៤ ក្រុង​ព្រះសីហនុ ជា​ទឹកប្រាក់ ២ លាន​រៀលនៅ​ថ្ងៃសុក្រនេះ​។ នេះបើ​យោង​តាម​រដ្ឋបាល​ខេត្ត​ព្រះសីហនុ។​

​ទំព័រ​ហ្វេសប៊ុក​ផ្លូវការ​របស់​ស្ថាប័ន​ខាងលើ​បាន​បង្ហាញ​ថា បុរស​រូប​នោះ ​«ជា​អ្នក​ពាក់ព័ន្ធ​ដោយប្រយោល​ជាមួយ​អ្នក​ជំងឺ​កូវីដ-១៩ ហើយ​ត្រូវ​បាន​ក្រុម​ការងារ​ឆ្លើយតប​បន្ទាន់​មន្ទីរ​សុខាភិបាលខេត្ត​ព្រះសីហនុ​ បាន​ដាក់​ឱ្យ​ធ្វើ​ចត្តាឡីស័ក​នៅផ្ទះ​ ដើម្បី​ធ្វើការ​តាមដាន​សុខភាព តែ​រូបគាត់​មិនបាន​អនុវត្តន៍​តាម​ការ​ណែនាំ​ ដោយ​បាន​ចេញធ្វើដំណើរ​ជាច្រើន​កន្លែង​ក្នុង​ក្រុង​ព្រះសីហនុ កាលពី​ថ្ងៃទី៤ ​ខែមីនា​ឆ្នាំ២០២១»។​

​កម្ពុជាកំពុង​ប្រឈម​នឹង​ការ​ឆ្លង​កូវីដ១៩ ​ក្នុង​សហគមន៍​ជា​លើក​ទី ៣ និង​ក្នុង​ទ្រង់ទ្រាយ​ធំ​បំផុតមិនធ្លាប់​មាន តែ​ក្នុង​រយៈពេល​មិន​ដល់​ពីរ​សប្ដាហ៍​ផង​ ករណី​កូវីដ​សរុប​ដែល​ត្រូវ​បាន​កត់ត្រាបាន​កើនឡើង​ច្រើន​ជាង​ ១០០%​ ទៅ​ដល់​ ៩៣២ ករណី​ ក្នុង​នោះ​មាន​ ៤២៥​ ករណី​ជាប់​ពាក់ព័ន្ធនឹង​ចង្កោម​ឆ្លង​ក្នុង​សហគមន៍ ​២០ កុម្ភៈ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI