កម្ពុជា-សង្គម

ខួប៨មីនា៖ អតីតបក្សសង្គ្រោះជាតិអំពាវនាវឲ្យដោះលែងស្ត្រីជាសកម្មជននយោបាយ និងសង្គម

ព្រំ ចិន្តា ប្រពន្ធសកម្មជនអតីតគណបក្សសង្រ្គោះជាតិត្រូវបានអាជ្ញាធររារាំងមិនឲ្យធ្វើការតវ៉ានៅមុខសាលាដំបូងរាជធានីភ្នំពេញ
ព្រំ ចិន្តា ប្រពន្ធសកម្មជនអតីតគណបក្សសង្រ្គោះជាតិត្រូវបានអាជ្ញាធររារាំងមិនឲ្យធ្វើការតវ៉ានៅមុខសាលាដំបូងរាជធានីភ្នំពេញ AP - Heng Sinith

អតីត​គណបក្ស​សង្គ្រោះជាតិ​បាន​ចេញ​សេចក្តី​ថ្លែង​ការណ៍​មួយ​នៅ​ថ្ងៃ​ទី​៧​ខែ​មីនា​នេះ​ ដោយ​អំពាវនាវ​ឲ្យ​អាជ្ញាធរ​រដ្ឋាភិបាល​ដោះលែង​ក្រុម​ស្ត្រី​ជាភរិយា​សកម្មជន​នយោបាយ​របស់​ខ្លួន​ និង​ស្ត្រីជា​សកម្មជន​សង្គម​ផ្សេងទៀត​ឲ្យ​មានសេរីភាពឡើង​វិញ​ ដោយ​ឥត​លក្ខខណ្ឌ។ ការ​អំពាវនាវ​នេះ​ធ្វើ​ឡើង​មុន​១​ថ្ងៃ​ នៃ​ទិវា​សិទ្ធិ​នារី​អន្តរជាតិ​នឹង​ចូល​មកដល់​នៅថ្ងៃ​៨​មីនា​ស្អែក​នេះ។

ផ្សាយពាណិជ្ជកម្ម

តាមរយៈសេចក្តី​ថ្លែងការណ៍ពីក្រៅប្រទេស អតីតគណបក្សសង្រ្គោះជាតិ បានគូសបញ្ជាក់ថា មាន​ស្ត្រី​ជាភរិយា​សកម្មជន​នយោបាយ​របស់​ខ្លួន និង​ស្ត្រីជាសកម្មជនសង្គម ​យ៉ាងតិច​១៤​នាក់​ត្រូវបាន​អាជ្ញាធរ​ចាប់​ឃុំ​ខ្លួនជា​បន្តបន្ទាប់។ ការ​ចាប់​ឃុំ​ខ្លួន«​ស្ត្រីថ្ងៃសុក្រ»នេះ គឺនៅគ្រាដែលពួកគេ​នាំគ្នាទៅ​តវ៉ា និង​ឃ្លាំមើល​ដំណើរ​ការ​បើកសវនាការលើ​រឿង​ក្តី​របស់​ស្វាមីពួកគេ ដែល​ត្រូវបាន​ចាប់​ខ្លួន​និង​ចោទ​ប្រកាន់​ពាក់​ព័ន្ធ​នឹង​ផែនការ​វិល​ត្រឡប់​ចូល​ស្រុក​របស់​លោក សម រង្ស៊ី កាលពីថ្ងៃទី៩​វិច្ឆិកា​២០១៩។

ក្រោយ​ការ​ចាប់​ខ្លួន​ស្ត្រីទាំងនោះត្រូវ​ឃុំ​ខ្លួនជាបណ្តោះអាសន្ន និង​ចោទ​ប្រកាន់ពី«បទ​ញុះញង់​និង​បង្ក​ភាព​វឹកវរ​ដល់​សន្តិសុខសង្គម»។ តែសម្រាប់​អតីតបក្សប្រឆាំងនេះ ការធ្វើ​សកម្មភាព​របស់​ស្ត្រីទាំងនោះគឺជារឿង​ស្របច្បាប់​ ផ្នែក​នយោបាយ និង​បរិស្ថាន​ ដើម្បី​ជួយ​សង្គម ហើយ​សិទ្ធិ​នេះ​ត្រូវ​បានធានា​ដោយ​រដ្ឋ​ធម្មនុញ្ញ។

ក្រៅពីការ​ចាប់​ឃុំ​ខ្លួន ក៏នៅមានស្ត្រីជាច្រើននាក់ទៀត​កំពុង​រងការ​គំរាមកំហែង​ បំភិតបំភ័យ និង​បង្រ្កាប នៅពេល​ពួកគេ​ចេញតវ៉ា​ដោយ​សន្តិវិធី​នៅរៀង​រាល់​ថ្ងៃ​សុក្រ ​ដើម្បីឲ្យ​ដោះលែង​ស្វាមីពួកគេ​ជា​សកម្ម​ជន​នយោបាយ។ នេះបើតាម​សេចក្តី​ថ្លែងការណ៍ដដែលនេះ។

លោកស្រី ចក់ សុភាព នាយិកាមជ្ឃមណ្ឌល​សិទ្ធិមនុស្ស​កម្ពុជា កត់​សំគាល់ថា នៅឆ្នាំ២០២០​កន្លង​មកនេះ ស្ត្រីជួរមុខ​ដែល​ចេញតស៊ូ​ទាមទារសិទ្ធិសេរីភាព ការពារ​បរិស្ថាន ជាពិសេស​ស្ត្រីជា​ភរិយា​សកម្ម​ជន​នយោបាយ​បានប្រឈម​នឹង​មុខ​នឹងបទចោទ​ព្រហ្មទណ្ឌ និងរង​ការ​បង្ក្រាបយ៉ាង​ចាស់ដៃ​ ដោយប្រើ​​កម្លាំង​លើស​លុប​ក្នុង​ការរុញច្រានស្ត្រី។

​នៅក្នុងចំណោម​ស្ត្រី​ជាសកម្មជន​សង្គម​ដែល​ត្រូវបាន​ចាប់​ខ្លួន​នៅឆ្នាំ​២០២០ កញ្ញា ឈឿន ដារ៉ាវី​ បានធ្វើ​ឲ្យ​មានការ​អារម្មណ៍​ខ្លាំងគេជាង បន្ទាប់ពី​នាងបានកោរសក់​លះបង់​សម្រស់​របស់ខ្លួន និង​ធ្វើកូដកម្ម​បង្អត់​អាហារ​​ ដើម្បី​តវ៉ាជំទាស់​ទៅនឹង​ការចាប់ខ្លួនដាក់ពន្ធនាគារ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI