កម្ពុជា-កូវីដ១៩

កម្ពុជាចំណាយ១៥លានដុល្លារទិញវ៉ាក់សាំងចិន Sinovac១,៥លានដូស និងគ្រោងទិញបន្ថែម៤លានដូសទៀត

វ៉ាក់សាំងស៊ីណូវ៉ាក់ដែលទើបនឹងមកដល់កម្ពុជានៅព្រឹកមិញនេះ
វ៉ាក់សាំងស៊ីណូវ៉ាក់ដែលទើបនឹងមកដល់កម្ពុជានៅព្រឹកមិញនេះ © Internet

វ៉ាក់សាំង​បង្ការ​ជំងឺ​កូវីដ១៩​របស់ចិន​ Sinovac​ចំនួន១លាន៥សែនដូស​បានបញ្ជូន​មកដល់​ប្រទេសកម្ពុជា​ហើយនៅព្រឹកថ្ងៃសុក្រ ​ទី២៦ ​ខែមីនានេះ។​ វ៉ាក់សាំងថ្មី​១លាន៥សែនដូស​នេះ ​គឺរដ្ឋាភិបាល​កម្ពុជា​បានចំណាយទឹកប្រាក់​ទិញចំនួន​១៥លានដុល្លារអាមេរិក​ ដោយ១ដូស​ថ្លៃ១០ដុល្លារអាមេរិក​។​ រដ្ឋាភិបាលកម្ពុជា​បានកំណត់​ចាក់វ៉ាក់សាំងនេះ​ដល់មន្រ្តីរាជការ​ និងពលរដ្ឋ​វ័យចាស់ជរា​ដែលផ្តោតសំខាន់​នៅរាជធានីភ្នំពេញ ​ខេត្តកណ្តាល ​និងខេត្ត​ព្រះសីហនុ​។​ បន្ថែម​លើនេះ ​រដ្ឋាភិបាល​កម្ពុជា​ក៏គ្រោងទិញ​វ៉ាក់សាំង ​Sinovac​នេះចំនួន​៤លានដូស​បន្ថែមទៀតផងដែរ​នៅខែក្រោយៗនេះ​។

ផ្សាយពាណិជ្ជកម្ម

វ៉ាក់សាំងSinovacចំនួន១លាន៥សែនដូសនេះ គឺជាវ៉ាក់សាំងបង្ការជំងឺកូវីដ១៩លើកដំបូងដែលកម្ពុជាបានបញ្ជាទិញដោយផ្ទាល់ពីប្រទេសចិន ហើយវាក៏ជាវ៉ាក់សាំងទី៣ដែរដែលកម្ពុជានឹងចាក់ជូនប្រជាពលរដ្ឋ បន្ទាប់ពីវ៉ាក់សាំងSino​ph​-armរបស់ចិន និង Astra Zeneca របស់អង់គ្លេសផលិតនៅឥណ្ឌា។ លោកវង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុបានអះអាងនៅក្នុងពិធីទទួលវ៉ាក់សាំង Sinovacនាព្រឹកថ្ងៃសុក្រនេះថា ការមកដល់នៃវ៉ាក់សាំងនេះ គឺជាជោគជ័យនៃការខិតខំរបស់រដ្ឋាភិបាលកម្ពុជាក្នុងការស្វែងរកវ៉ាក់សាំងបង្ការជំងឺកូវីដ១៩មកចាក់ជូនប្រជាពលរដ្ឋដោយមិនគិតថ្លៃ។

ចំណែក លោកវ៉ាង វិនធាន ដែលជាឯកអគ្គរដ្ឋទូតចិនប្រចាំនៅកម្ពុជាវិញ បានចាត់ទុកការមកដល់នៃវ៉ាក់សាំងនេះថា ជាការបង្ហាញពីចំណងមិត្តភាព និងកិច្ចសហប្រតិបត្តិការដោយជោគជ័យរវាងកម្ពុជា និងចិនក្នុងការប្រយុទ្ធប្រឆាំងនឹងជំងឺកូវីដ១៩។ លោកឯកអគ្គរដ្ឋទូតចិនក៏បានអះអាងថា វ៉ាក់សាំងរបស់ចិនទាំងSino​ph​arm និង Sinovacនេះ នឹងក្លាយជាជញ្ជាំងសុខភាពរបស់ប្រជាពលរដ្ឋកម្ពុជាប្រឆាំងនឹងជំងឺកូវីដ១៩។​ បើតាមលោកវ៉ាង វិនធាន ក្រុមហ៊ុនផលិតវ៉ាក់សាំងរបស់ចិនបានលក់វ៉ាក់សាំងដល់កម្ពុជាក្នុងតម្លៃយ៉ាងពិសេសបំផុតដោយផ្អែកលើទំនាក់ទំនងរវាងកម្ពុជា និងចិន។

ក្រៅតែពីវ៉ាក់សាំង Sinovacចំនួន១លាន៥សែនដូសនៅថ្ងៃនេះ  វ៉ាក់សាំងSino​ph​arm ចំនួន៧០ម៉ឺនដូសដែលជាជំនួ​យ​បន្ថែមរបស់ចិននឹងមកដល់កម្ពុជានៅថ្ងៃទី៣១ ខែមីនាខាងមុខនេះ បើសិនគ្មានអ្វីប្រែប្រួលនោះទេ។ នេះបើតាមការគូសបញ្ជាកក់ឱ្យដឹងរបស់លោកវង្សី វិស្សុត។ ក្នុងចំណោម៧០ម៉ឺនដូសនេះ ចិនបានផ្តល់ឱ្យវិស័យយោធាកម្ពុជាចំនួន៣០ម៉ឺនដូស។ រីឯ វ៉ាក់សាំងAstra Zeneca ឬ Covishield មួយចំនួនទៀតដែលជាជំនួយតាមរយៈយន្តការCOVAX ក៏នឹងមកដល់កម្ពុជានៅក្នុងអំឡុងពេលបុណ្យចូលឆ្នាំខ្មែរនាពេលខាងមុខនេះ។ ជាមួយគ្នានេះ កម្ពុជាក៏កំពុងចរចាបញ្ជាទិញវ៉ាក់សាំងJohnson & Johnson របស់អាមេរិកថែមទៀតផងដែរ។

សូមបញ្ជាក់ថា គិតមកដល់ថ្ងៃទី២៥ មីនា ម្សិលមិញនេះ ក្រសួងសុខាភិបាលកម្ពុជាបានចាក់វ៉ាក់សាំង Sino​ph​arm និងAstra Zeneca ដល់ប្រជាពលរដ្ឋជាង២៤ម៉ឺននាក់ហើយនៅទូទាំងប្រទេសកម្ពុជា។ នៅពេលនេះ ក្រសួងសុខាភិបាលកម្ពុជាក៏កំពុងចាក់វ៉ាក់សាំង Astra Zeneca ដល់មនុស្សវ័យចាស់ចាប់ពីអាយុ៦០ឆ្នាំឡើងទៅចំនួនជាង៥ម៉ឺននាក់នៅក្នុងរាជធានីភ្នំពេញផងដែរ។ ការចាក់វ៉ាក់សាំងនេះ គឺទៅតាមខណ្ឌនីមួយៗ ហើយមានរយៈ២សប្តាហ៍៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI