កម្ពុជា-កូវីដ១៩

កូវីដ១៩៖រដ្ឋាភិបាលកម្ពុជាប្រកាសបិទការធ្វើដំណើរ និងបិទរមនីយដ្ឋានទេសចរណ៍ទូទាំងប្រទេសរហូតចប់បុណ្យចូលឆ្នាំ

ការធ្វើដំណើររបស់ប្រជាជន (រូបតំណាង)
ការធ្វើដំណើររបស់ប្រជាជន (រូបតំណាង) © Internet

បម្រាម​បិទការធ្វើដំណើរ​ឆ្លងកាត់​ពីខេត្តមួយ​ទៅខេត្តមួយ ​និងបិទ​រមនីយដ្ឋាន​ទេសចរណ៍​ទូទាំង​ប្រទេស​បានចាប់អនុវត្តហើយ​តាំងពីម៉ោង១២​យប់ថ្ងៃអង្គារ​ គឺក្រោយពី​ការចេញសេចក្តី​សម្រេច​របស់​រដ្ឋាភិបាល​កម្ពុជា​តែប៉ុន្មាន​ម៉ោងប៉ុណ្ណោះ។​ ការបិទការ​ធ្វើដំណើរ ​និងរមនីយដ្ឋាន​ទេសចរណ៍នេះ ​គឺរហូតដល់​ថ្ងៃទី២០​ ខែមេសា ​ពោល គឺ​ក្រោយបញ្ចប់​ពិធីបុណ្យ​ចូលឆ្នាំ​ថ្មី​ប្រណីជាតិ​។​ ការសម្រេច​របស់​រដ្ឋាភិបាល​កម្ពុជា​នេះ ​គឺក្នុងគោលបំណង​ប្រយុទ្ធប្រឆាំង​ និងទប់ស្កាត់​ការឆ្លងរាលដាល​ជំងឺកូវីដ១៩​ ពីខេត្តមួយ​ ទៅខេត្ត​មួយទៀត​។

ផ្សាយពាណិជ្ជកម្ម

រដ្ឋាភិបាលកម្ពុជាបានសម្រេចបិទការធ្វើដំណើរពីខេត្តមួយទៅខេត្តមួយជាថ្មីម្តងទៀតរយៈពេល១៤ថ្ងៃចាប់ពីថ្ងៃទី០៧ ខែមេសានេះ រហូតដល់ថ្ងៃ២០ ខែមេសាខាងមុខ។ ប៉ុន្តែ រាជធានីភ្នំពេញ និងខេត្តកណ្តាល ត្រូវបានរដ្ឋាភិបាលកម្ពុជាចាត់ទុកថា ជាតំបន់តែមួយដែលអាចធ្វើដំណើរចេញចូលដូចធម្មតា។ បើទោះបីបិទការធ្វើដំណើរនៅទូទាំងប្រទេសក្តី ប៉ុន្តែក៏មានការលើកលែងលើករណីមួយចំនួនដែរ ដូចជា ការដឹកជញ្ជូនទំនិញគ្រប់ប្រភេទទាំងតាមផ្លូវគោក ផ្លូវទឹក និងផ្លូវដែក ការធ្វើដំណើររបស់មន្ត្រីរាជការសាធារណៈទាំងថ្នាក់ជាតិ និងថ្នាក់ក្រោមជាតិ ក្នុងគោលដៅបំពេញការងារប្រចាំថ្ងៃ ដោយត្រូវបង្ហាញដល់កងកម្លាំងមានសមត្ថកិច្ចត្រួតពិនិត្យនូវប័ណ្ណសម្គាល់ការងាររបស់ខ្លួន ឯកសារបេសកកម្ម និងឯកសារពាក់ព័ន្ធផ្សេងទៀត។

បន្ថែមនេះ ក៏លើកលែងចំពោះការធ្វើដំណើររបស់កងកម្លាំងប្រដាប់អាវុធគ្រប់ប្រភេទទៅបំពេញភារកិច្ចរបស់ខ្លួន ការដឹកជញ្ជូនពលករដែលធ្វើដំណើរវិលត្រឡប់ពីក្រៅប្រទេសចូលមកកម្ពុជាទៅកាន់ស្រុកកំណើតដើម្បីធ្វើចត្តាឡីស័ក ការធ្វើដំណើររបស់រថយន្តសង្គ្រោះបន្ទាន់របស់មន្ទីរពេទ្យរដ្ឋ និងឯកជន រថយន្តពន្លត់អគ្គិភ័យ រថយន្តបម្រើសេវាដឹកជញ្ជូនសំ​រាម និងកាកសំណល់។ ជាមួយគ្នានេះ ក៏អាចធ្វើដំណើរបានផងដែរចំពោះការដឹកជញ្ជូនកម្មករ ទៅកាន់ទីកន្លែងការងារនៅតាមរោងចក្រ សហគ្រាស ដែលត្រូវមានប័ណ្ណអនុញ្ញាតចេញដោយក្រសួងការងារ ឬមន្ទីរការងារ  ការធ្វើដំណើររប​ស់​ពលរដ្ឋទៅកាន់មន្ទីរពេទ្យ ឬមណ្ឌលសុខភាព និងការធ្វើដំណើរដោយមូលហេតុចាំបាច់ផ្សេងទៀត ដោយមានការអនុញ្ញាតពីអាជ្ញាធរមានសមត្ថកិច្ច។

ក្រៅពីបិទការធ្វើដំណើរនេះ រដ្ឋាភិបាលកម្ពុជាក៏បានសម្រេចបិទរមនីយដ្ឋានទេសចរណ៍នៅទូទាំងប្រទេសកម្ពុជារយៈពេល១៤ថ្ងៃផងដែរ ដើម្បីប្រយុទ្ធប្រឆាំង និងទប់ស្កាត់ការឆ្លងរាលដាលនៃជំងឺកូវីដ១៩។ ការបិទរមនីយដ្ឋានទេសចរណ៍នេះ គឺលើកទី១ហើយសម្រាប់កម្ពុជាដែលកាលពីឆ្នាំទៅ ពោល គឺនៅថ្ងៃទី០៩ ខែមេសា ឆ្នាំ២០២០ រដ្ឋាភិបាលក៏បានប្រកាសបិទការធ្វើដំណើរដែរ តែមិនមានការបិទរមនីយដ្ឋានទេសចរណ៍បែបហ្នឹងឡើយ។​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI